Iseda Haroro Gaukara Dekenai Manau Karana be mai Anina Bada
1 Dirava ena Hereva ese ita ia sisiba henia, namona be ‘do ita manau. Tau ta bema ita dekenai ia kara dika neganai, davana do ita henia lasi, . . . to hanamoa hereva do ita henia lou, bona ita ese Dirava do ita noia, ia ese idia do ia hanamoa.’ (1 Pet. 3:8, 9) Unai sisiba herevana be mai anina bada haroro gaukara lalonai. Momokani, Keristani hesiai gaukara be iseda manau karana ia tohoa diba gaukarana.
2 Manau karana ese ita ia durua hekwakwanai ita haheaukalaia totona. Haroro gaukara ita karaia neganai, ita diba lasi taudia ita davaria, ita diba haida be hebogahisi lasi dalana ai ita do idia kara henia. Ena be haroro gaukara lalonai unai bamona kara ita davaria, to namona be ita manau. Tano ta dekenai, lagani rua lalonai, painia taihu rua be dina ibounai lalonai ruma ta ruma ta gaukara idia karaia to kamonai tauna ta idia davaria lasi! To idia haheauka, bona hari, unai gabu dekenai kongregesen rua idia noho.
3 Hemataurai Lasi Karana Ita Kara Henia Dalana: Ma haida be hebogahisi eiava hemataurai lasi karana idia hahedinaraia lasi neganai, manau karana ese ita ia durua Iesu ita tohotohoa totona. (1 Pet. 2:21-23) Ruma ta dekenai, taihu ta be hahine ta ese ia gwau henia, bena murinai unai hahine ena tau ese ia gwau henia bona ia oda henia ruma ia rakatania totona. Unai taihu ia kiri sibona bona ia gwau reana ma nega ta ai do ia hereva henidia. Unai kara ese unai tau bona ena adavana edia lalona ia veria bena gabeai ia vadivadi Witnes hahinena idia kamonai henia, bona boiboi herevana idia abia dae Kingdom Hall dekenai hebou idia lao henia totona. Guna idia gwau henia taihuna be idia dekenai hanamoa herevadia gwauraia totona ia noho, bona ia haroro henidia. Ita danu ese idia ura lasi kamonai taudia edia lalona ita veria diba bema ‘hemataurai bona manau’ karana ita hahedinaraia.—1 Pet. 3:15; Aon. 25:15.
4 Hekokoroku Karana Dadaraia: Baibel amo iseda diba ita habadaia dainai, unai ese badina ta ia henia lasi taunimanima ita laloa maragi eiava ita gwauraia dika totona. (Ioa. 7:49) To, Dirava ena Hereva ese ita ia sisiba henia, ‘tau ta do ita gwauraia dika lasi.’ (Tito 3:2) Iesu bamona, ita manau neganai, ma haida dekenai laga-ani ita henia. (Mat. 11:28, 29) Mai manau ida ita hereva neganai, unai ese ita abia lao sivaraina ia hahairaia.
5 Oibe, manau karana ese ita ia durua teritori aukadia lalonai ita haheauka totona. Idia ura lasi kamonai taudia edia lalona ia veria, bona Basileia ena sivarai dekenai ma haida ia veria mai. To gau badana be inai, unai ese Iehova, “manau taudia dekenai iena hariharibada ia henia” Diravana, ia hamoalea.—1 Pet. 5:5.