Taunimanima Ibounai Dekenai Do Ita Haroro
1 Iesu be ‘gunalaia tauna bona lohia tauna’ dainai, ia ese iena hahediba taudia ia hegaegaelaia edia vairanai ia noho haroro gaukara badana do idia karaia totona. (Isa. 55:4; Luka 10:1-12; Kara 1:8) Aposetolo Petero be Iesu ese idia dekenai ia henia gaukarana be inai bamona ia gwauraia, ia gwau: “Ai dekenai ia hadibaia, taunimanima ibounai dekenai do ai haroro, bona do ai gwauraia hedinarai, Dirava ese inai Tau ia abia hidi vadaeni, mauri taudia bona mase taudia edia kota biaguna gaukara do ia karaia totona.” (Kara 10:42) Edena bamona taunimanima ibounai dekenai ita haroro diba?
2 Aposetolo Paulo ena haheitalai amo gau momo ita dibaia diba. Ia be Efeso kongregesen dekenai idia noho tatau badadia ida ia hebou neganai, idia ia hamaoroa, ia gwau: “Umui diba vadaeni umui dekenai lau haroro bona hadibaia neganai, emui ruma dekenai, bona taunimanima edia vairana dekenai durua hereva ta lau hunia lasi umui dekenai. Iuda taudia bona Helene taudia danu dekenai lau sisiba henia goada [harorolaia goevagoeva, NW ] edia lalona do idia giroa Dirava dekenai, bona Lohiabada Iesu do idia abidadama henia.” Ena be Paulo be hahetoho ia davaria, to ia hekwarahi sivarai namona be taunimanima ibounai dekenai ia harorolaia. Iena kamonai taudia dekenai Baibel ena hereva momokani badadia sibona ia hadibaia be hegeregere lasi, to ia ura “Dirava ena ura ibounai” do ia hadibaia. Unai ia karaia totona, ia gaukara goada bona sibona ena ura gaudia ia dadaraia. Ma ia gwau: “To lauegu mauri lau laloa lasi, badina be lau ura lauegu heau lau haorea, bona egu gaukara, Lohiabada Iesu ese lau dekenai ia henia gaukara do lau haorea. Inai gaukara be, Dirava ena hariharibada Sivarai Namona do lau gwauraia hedinarai.”—Kara 20:20, 21, 24, 27.
3 Hari inai negai, Paulo ena haheitalai be edena bamona ita badinaia diba? (1 Kor. 11:1) Ena be ita be hahetoho ita davaria, to kudou-maoro taudia ita tahua, bese bona gado idauidau taudia dekenai sivarai namona ita harorolaia, bona ita davaria kamonai taudia edia ura ita habadaia. (Mat. 10:12, 13) Unai ita karaia totona, nega ita atoa, ita hekwarahi, bona taunimanima ita lalokau henia be namo.
4 Heduru Painia Gaukara Oi Karaia Diba, A? March bona April be nega namona heduru painia oi karaia totona, unai amo taunimanima oi haroro henia diba. Vanegai lagani ai, momo ese heduru painia idia karaia be hagoadaia gauna!
5 Ia gorere momo taihu ta ena mauri lagani be 80, be Iehova ena orea amo ia mai hagoadaia herevadia ese ia durua. Ia gwau: “Egu kudouna dekenai ia noho daudau urana ia habadaia, bona unai ese egu lalona ia veria heduru painia lau karaia totona, bema nega tamona lau karaia unai be hegeregere.” March ia abia hidi. Ia gwau: “Gau ginigunana be lau helai bona lau laloa namonamo. Egu natuna kekeni ida egu palani lau herevalaia badina iena heduru lau abia be namo. Lau hoa bada badina aplikeisen fom ta ia abia.” Unai hua lalonai, taihu burukana be ena haroro gaukara dekenai hora 52 ia karaia. “Lau mamia egu goada ia ore neganai, nega momo Iehova lau guriguri henia lau dekenai goada matamata ia henia totona. Hua ena dokonai, lau moale bada herea, bona Iehova ese lau ia durua dainai nega momo ia lau tanikiu henia bada. Lau ura do lau tohoa lou.” Iena haheitalai namona ese idia ura heduru painia gaukara idia karaia, to gorere badadia dainai idia karaia diba lasi taudia do ia hagoadaia.
6 Tadikaka ta be idia hadibaia lasi to iena moni gaukara amo idia hadokoa, unai nega ia gaukaralaia heduru painia ia karaia totona. Unai hua lalonai, iena ura haroro gaukara dekenai ia bada daekau, bona hua ena dokonai, Baibel stadi ta ia matamaia vadaeni. Ia dekenai ia vara gauna ia laloa neganai, ia gwau: “Unai be hua namona ta!” Iehova amo hakaua dalana bona heduru ia abia dainai ia moale bada herea! Oibe, ia haroro goadagoada dainai Iehova ese ia dekenai hahenamo momo ia henia, bona Ia ese oi totona unai bamona do ia karaia danu.—Mal. 3:10.
7 Pablisa momo dekenai, heduru painia gaukarana karaia totona be mai ena hekwarahi. To, ena be tadikaka bona taihu momo be mai edia maduna idauidau edia moni gaukara bona ruma bese lalonai, bona danu idia be mai edia hekwakwanai, to unai gaukara idia karaia vadaeni. Taunimanima ita haroro henidia totona iseda nega bona goada ita henia, to unai gaudia amo ita abia hahenamo be gau ta ida ita hahegeregerea diba lasi.—Aon. 10:22.
8 March bona April be nega namona heduru painia karaia totona. March lalonai Saturday bona Sunday faiv idia noho. Unai nega bona adorahi horadia gaukaralaia namonamo karana ese dala ia kehoa diba, moni gaukara idia karaia taudia ese heduru painia idia karaia totona. Danu, April lalonai idia abia holide oi gaukaralaia diba oi haroro totona. Haida be reana sikuli eiava moni gaukara amo idia laga-ani, unai ese idia ia durua edia hora 50 idia hagugurua totona. March bona April ai haroro gaukara lalonai hora 50 oi abia totona, inai Iseda Basileia Gaukara pepana lalonai ia noho heduru painia ena sediual ta oi badinaia diba, a? Ma haida ida emu sediual oi herevalaia; ita daradara lasi unai ese haida do ia hagoadaia haroro gaukara dekenai oi idia bamoa totona. Bema oi hegeregere lasi heduru painia oi karaia totona, unai hua lalonai tahua gauna oi atoa, bona idia painia diba taudia oi durua. Hari emu palani oi karaia March bona April ai emu haroro gaukara oi habadaia totona.
9 Memorial Totona Laloa Bada Karana Hahedinaraia: Lagani ta ta ai Memorial ena vairana bona murina puradia lalonai, momo ese mauri davalaia boubou gauna idia laloa bada dainai, unai ese idia ia veria edia “nega namona” idia gaukaralaia heduru painia idia karaia totona. (Efe. 5:15, 16) Lagani gunana ai, Papua New Guinea dekenai, March lalonai heduru painia taudia edia namba be 348, bona April lalonai be 203. Unai hua rua edia averes be 276. Unai namba ese vanegai ena hesiai lagani ena hua ta ta ai idia painia taudia 58 ena averes ia hanaia. Inai lagani ena Memorial negana be nega namona iseda haroro gaukara ita habadaia, unai amo ita hahedinaraia Keriso ena mauri davalaia boubouna ita laloa bada.
10 April 16 ia mai kahirakahira lalonai, Memorial ena anina oi dekenai oi laloa namonamo. Keriso ena mase ia kahirakahira neganai idia vara gaudia, bona ia lalo-hekwarahilaia gaudia oi laloa. Bona Iesu vairanai ia noho moalena bona edena bamona unai moale ese ia durua dagedage karadia ia haheaukalaia totona, oi lalohadailaia danu. Hari ia be kongregesen ena Kwarana, haroro bona hahediba taudia halaoa gaukarana ia naria, unai danu oi laloa. (1 Kor. 11:3; Heb. 12:2; Apok. 14:14-16) Bena oiemu noho dalana hegeregerena haroro gaukara oi habadaia, unai amo emu tanikiu karana Iesu ia karaia gaudia totona oi hahedinaraia diba.
11 Ma Haida Hagoadaia Taunimanima Ibounai Idia Haroro Henia Totona: Elda bona hesiai taudia be heduru painia idia karaia neganai, unai ese dala namona ia kehoa idia ese ma haida idia hagoadaia totona. Pablisa taudia ida haroro gaukara idia karaia bona mamoe vadivadi gaukara idia karaia neganai, unai be nega namodia ma haida idia durua unai gaukara namona idia habadaia totona. Namona be unai hua lalonai do ita karaia gaudia ita gurigurilaia, unai amo goada ita abia diba taunimanima ibounai ita haroro henia totona.
12 March bona April lalonai, elda bona hesiai taudia ibounai be kongregesen danu do idia gaukara hebou neganai, namona be haroro naria tauna be haroro gaukara karaia daladia do ia laloa bada. Namona be ia ese pablisa momo dekenai idia hegeregere haroro ena grup idia abia gabudia, dinadia, bona negadia ia hegaegaelaia bona hesiai hebou dekenai idia gwauraia. Dina ta lalonai nega idauidau ai idia hebou totona dala ia hegaegaelaia, unai amo kongregesen taudia ibounai dekenai dala ia kehoa haroro daladia idauidau idia karaia totona. Reana unai bamona dala haida be, bisinesi teritori, dala ai magasin hariharilaia, ruma ta ruma ta gaukara, bona lou henia. Danu, namona be ia itaia unai hua totona buka bona magasin idia hegeregere, bona teritori ia hegaegaelaia danu.
13 March ena henia gauna be Diba bukana, iseda tahua gauna be Baibel stadi do ita hamatamaia. January 2002 Iseda Basileia Gaukara lalonai idia udaia pepana ai, Diba bukana henia ena heduru hereva namodia idia noho. April hua ena henia gauna be Gima Kohorona bona Awake! magasin. Namona be “Magasin Herevalaia Daladia” ena kahana ai idia noho herevadia oi gaukaralaia toho. Namona be ibounai ese nega idia atoa idia hegaegae namonamo totona, unai amo taunimanima ibounai idia haroro henia diba.
14 Kongregesen ena Kwarana, Iesu Keriso, ena hakaua henunai ita gaukara be moale gauna, bona ma haida dekenai sivarai namona ita harorolaia be hahenamo ta! March bona April hua idia mai kahirakahira lalonai, Keriso ena oda ita badinaia bona taunimanima ibounai dekenai ita haroro totona, namona be ita hekwarahi unai hua rua be hua namodia ai ita halaoa.
[Box on page 4]
March Bona April 2003 Lalonai Heduru Painia Gaukarana Karaia Ena Dala Idauidau
Dina Hora
Monday 1 2 — — 2 —
Tuesday 1 — 3 — — —
Wednesday 1 2 — 5 — —
Thursday 1 — 3 — — —
Friday 1 2 — — — —
Saturday 5 4 3 5 6 7
Sunday 2 2 3 2 2 3
March 56 56 54 55 50 50
April 50 50 51 53 — —
Inai sediual ta be oi dekenai do ia hegeregere, a?