Hemataurai Dabua Ita Atoa ese Dirava Matauraia Karana Ia Hahedinaraia
1 Kahirakahira ita be lagani 2003 ena “Dirava Ita Hanamoa” Distrik Hebouhebouna dekenai, Iehova ese vadivadi taudia bamona ita do ia hanamoa. Iehova ita tanikiu henia bada badina lauma aria badana dekenai ita ia boiria! Iseda dabua bona huina ena toana namona amo ita hahedinaraia diba ia ita matauraia bona ia henia lauma gaudia ita laloa bada.—Sal. 116:12, 17.
2 Dabua Bona Toana Idia Goeva Bona Idia Namo: Iseda toana ese iseda Dirava, ia be ia goeva bona namo, ena taravatu ia hahedinaraia. (1 Kor. 14:33; 2 Kor. 7:1) Namona be iseda tauanina, huina, bona iseda imana koukouna idia goeva, bona idia namo. Hari inai negai, taunimanima momo be dabua idia atoa namonamo lasi. To, muvini piksa ai ia hedinarai tauna ta eiava ladana bada spot gadara tauna ta ena toana ia namo lasi dainai, Keristani taudia be unai bamona idia karaia be badina namona lasi. Bema tanobada taudia edia sitaelo ita tohotohoa, taunimanima ese Dirava momokanina idia hesiai henia taudia bona idia hesiai henia lasi taudia ena idau do idia itaia lasi.—Mal. 3:18.
3 Mai Hemataurai ida Dabua Idia Atoa Keristani Taudia: Paulo ese Keristani naria tauna Timoteo ia tore henia neganai, ia ese hahine taudia ia hagoadaia “mai manau bona mai mataurai danu edia dabua do idia kwatua. Edia huina danu sitaelo sitaelo bamona do idia karaia lasi, bona golo o kavabukavabu herahera gaudia do idia atoa lasi. Davana bada dabua danu do idia abia lasi. To kara namodia ibounai, be herahera bamona do idia karaia. Unai be maoro, bona Dirava idia matauraia hahine edia kara korikori.” (1 Tim. 2:9, 10) Iseda dabua edia toana ia namo totona, ita laloa namonamo be namo. Namona be iseda dabua edia toana idia namo, idia goeva, bona mai hemataurai ida ita atoa—herahera gaudia momo eiava lebulebu toana idia hahedinaraia dabuadia ita atoa lasi.—1 Pet. 3:3.
4 Paulo danu ese inai sisiba ia henia, ia gwau “huina danu sitaelo sitaelo bamona do idia karaia lasi, bona golo o kavabukavabu herahera gaudia do idia atoa lasi. Davana bada dabua danu do idia abia lasi.” (1 Tim. 2:9) Herahera gaudia, vairana penia gaudia, bona hairai idia havaraia gaudia momo ita atoa lasi be aonega karana Keristani hahine ese ia badinaia totona.—Aon. 11:2.
5 Paulo ese Keristani hahine dekenai ia henia sisiba be mai anina Keristani tatau dekenai danu. Namona be tadikaka ese tanobada ena lalohadai ia hahedinaraia sitaelo idia dadaraia. (1 Ioa. 2:16) Hegeregere, tano haida dekenai, taunimanima momo ese idia dekenai idia hegeregere lasi dabua badadia idia atoa, to inai sitaelo be Dirava ena hesiai tauna ena toana ia hahedinaraia lasi.
6 Laga-Ani Negadiai: Program lalonai, tadikaka bona taihu momo be dabua bona edia toana dekenai haheitalai namona idia hahedinaraia. To, ripoti haida ese idia hahedinaraia haida be hebouhebou dekenai idia lao bona idia rakatania eiava program murinai moale karadia idia karaia neganai, edia dabua bona toana be idia namo lasi. Momokani, iseda toana—program lalonai eiava ma nega haida ai—ese ma haida edia lalohadai Dirava ena taunimanima dekenai ia haidaua diba. Ita be iseda hebouhebou ena lapel kadi ita atoa dainai, namona be nega ibounai Keristani hesiai taudia bamona iseda dabua ita atoa. Unai ese ma haida edia lalona ia veria ita idia hanamoa totona bona dala ia kehoa idia ita haroro henidia totona.—1 Kor. 10:31-33.
7 Kiri ese toana ia hanamoa bamona, iseda dabua mai hemataurai ida bona tauanina ena toana namona ese ita harorolaia sivaraina ia hahairaia bona iseda orea ia hanamoa. Inai lagani ena “Dirava Ita Hanamoa” Distrik Hebouhebouna dekenai ita idia itaia taudia edia lalona do ia veria ita idau ena badina do idia henanadailaia totona, bona reana do idia gwau: “Mani emu kara, oi danu do ita lao, badina be ai be ai kamonai vadaeni, Dirava be oi dekenai ia noho.” (Sek. 8:23) Namona be ita ta ta ese iseda dabua bona toana amo ita hahedinaraia Iehova ita matauraia.
[Study Questions]
1. Edena dala ai ia mai noho hebouhebouna dekenai iseda laloa bada karana ita hahedinaraia diba?
2. Dahaka dainai iseda tauanina ena toana ia goeva bona ia namo be gau badana?
3. Edena dala ai do ita diba iseda toana amo 1 Timoteo 2:9, 10 ena sisiba herevana ita badinaia?
4, 5. Keristani tatau bona hahine ese dahaka sisiba herevadia idia badinaia be gau badana?
6. Dahaka dainai iseda dabua bona tauanina ena toana be dina ta ta ai hebouhebou dekenai ita lao bona ita rakatania, hebouhebou dekenai ita noho neganai, bona program ia ore murinai, ia goeva noho be namo?
7. Iseda hemataurai dabua bona iseda tauanina ena toana ese ma haida dekenai dahaka anina namona ia havaraia diba?
[Box on page 6]
Hemataurai Toana Hahedinaraia
▪ Loaloa neganai
▪ Hebouhebou dekenai
▪ Program ia ore murinai