Edia Tauanina Ena Kahana Ta Ia Dika—To Anina Namona Idia Havaraia
1 Bema oi be Iehova ena Witnes tauna ta, bona emu tauanina ena kahana ta ia dika, haroro gaukara ai anina namona oi davaria diba. Momokani, emu noho dalana ese dala namodia ia kehoa diba oi haroro bona ma haida oi hagoadaia totona.
2 Dala ia Kehoa Neganai Oi Haroro: Edia tauanina ena kahana ta ia dika dainai idia hekwarahi taudia momo be haroro gaukara idia goadalaia noho. Hegeregere, opereisen badana ta ia abia dainai ena raka bona hereva dalana ia dika taihu ta ia davaria, bema iena tau ese motuka be taunimanima momo idia raka gabuna dekenai ia atoa, magasin gaukara do ia karaia diba. Nega ta ai, hora rua lalonai magasin 80 ia hariharilaia! Emu noho dalana dainai ita haroro henia diba lasi taudia dekenai, oi haroro diba. Bema unai bamona, idia be emu teritori namo hereana bamona oi laloa.
3 Oiemu haroro gaukara ese anina namona ia havaraia diba! Haida ese emu lalo-goada bona Baibel ena hereva momokani ese emu mauri dekenai namo ia havaraia dalana idia itaia neganai, reana Basileia ena sivarai do idia abia dae. Danu, hisihisi idia davaria taudia oi davaria neganai, reana emu mauri lalonai oi mamia gaudia ese oi ia durua diba Dirava ena Hereva amo idia oi hagoadaia totona.—2 Kor. 1:4.
4 Ma Haida Oi Hagoadaia Diba: Laurel Nisbet be lagani 37 lalonai, masini ta lalonai ia noho, ia hahodi diba totona, to taunimanima 17 ia durua Baibel ena hereva momokani idia diba maoromaoro totona, ena mauri sivaraina ese oi ia hagoadaia, ani? Unai hegeregerena, emu haheitalai ese haida ia durua diba, Iehova ena hesiai gaukara idia karaia goada totona.—g93-E 1/22 rau 18-21.
5 Ena be emu noho dalana dainai, emu ura hegeregerena haroro gaukara oi karaia badabada diba lasi, to oi ese ma haida oi hagoadaia diba. Tadikaka ta ia gwau: “Lau diba vadaeni, tauanina ena kahana ta ia dika tauna ese ma haida ia durudia bada diba. Lau bona egu adavana be kongregesen taudia haida edia dogo bamona. Aiemai mauri dainai, ai be nega ibounai iniseniai ai noho, aiemai heduru be nega ibounai idia abia diba.” To, emu tauanina ena kahana ta ia dika dainai, ai lalo-parara emu ura hegeregerena oi karaia diba lasi. To, heduru haida amo emu haroro gaukara oi karaia goadagoada diba. Unai dainai, bema heduru haida oi ura neganai, namona be elda taudia eiava kongregesen ai oi idia durua diba taudia haida oi hadibaia.
6 Iehova oi hesiai henia totona oi karaia gaudia ibounai ia itaia, bona emu lalona ibounai ida oi karaia hesiai gaukara ia moalelaia. (Sal. 139:1-4) Ia dekenai oi tabekau neganai, ia ese goada ia henia diba emu haroro gaukara lalonai anina namona oi havaraia totona.—2 Kor. 12:7-10.