Iehova Ena Ura Gaudia Ita Karaia Diba
1 Hari Iehova ena taravatu bona hakaua herevadia badinaia karana be mauri dalana hereadaena, bona ita ia durua badina namona ita atoa vaira neganai mauri hanaihanai ita abia totona. (Sal. 19:7-11; 1 Tim. 6:19) To, Satani ena tanobada ese ita dekenai lalo-hekwarahi bada ia henia. Iseda goevadae lasi tauanina ese unai hekwakwanai ia habadaia. Baibel ese ia gwauraia maduna ita hagugurua toho dainai, reana nega haida ita laloa ita hegeregere lasi. (Sal. 40:12; 55:1-8) Reana ita daradara, Iehova ia ura ita karaia gaudia ibounai do ita karaia diba eiava lasi. Unai bamona negadiai, dahaka ese ita ia durua diba lauma dalanai ita laloa namonamo noho totona?
2 Iehova Ena Hahegani be Metau Lasi: Iehova ese ita karaia diba gaukara idauidau ita dekenai ia henia. Iena hahegani be metau lasi, to idia be iseda namo totona. (Deu. 10:12, 13; 1 Ioa. 5:3) Iehova be iseda noho dalana ia lalo-pararalaia, bona ia laloatao “ita be kahu sibona.” (Sal. 103:13, 14) Bema ita hekwarahi Dirava ita hesiai henia totona, ia be mai hebogahisi ida unai ia abia dae, herevana eda noho dalana dainai nega ibounai unai bamona ita karaia lasi. (Lev. 5:7, 11; Mar. 14:8) Dirava ese ita ia noia iseda laloa hekwarahi gaudia be ia dekenai do ita henia, bona ia gwau ita do ia durua ita gini goada noho totona.—Sal. 55:22; 1 Kor. 10:13.
3 Haheauka be Namo: Baibel dekenai Dirava badinaia taudia, hegeregere Elia, Ieremia, bona Paulo edia sivarai ese idia hahedinaraia, idia haheauka be namo. (Heb. 10:36) Metau bona lalo-manoka negadiai, Iehova ese idia ia durua. (1 Kin. 19:14-18; Ier. 20:7-11; 2 Kor. 1:8-11) Bona hari inai negai, iseda tadikaka edia abidadama karana ese ita ia hagoadaia. (1 Pet. 5:9) Unai haheitalai laloa dobu karana ese ita ia durua diba, ita hesiku lasi totona.
4 Iehova ena gwauhamata abidadama henia karana “be iseda mauri dogoatao gauna, dogo ese vanagi ia dogoatao bamona.” (Heb. 6:19) Unai bamona abidadama ese Aberahamo bona Sara edia lalona ia veria Iehova ena noinoi idia abia dae totona, unai be edia noho gabuna do idia rakatania bona ‘Dirava ese ia gwauhamata do ia henia tano dekenai, idau bese tauna bamona idia noho.’ Abidadama ese Mose ia hagoadaia mai gari lasi ida tomadiho momokanina ia goadalaia totona. Abidadama ese Iesu ia hagoadaia satauro ai hisihisi ia haheaukalaia totona. (Heb. 11:8-10, 13, 24-26; 12:2, 3) Iehova ese ia gwauhamatalaia kara maoromaoro tanobadana be eda kudouna dekenai ita laloa noho karana ese ita do ia durua ita gini goada totona.—2 Pet. 3:11-13.
5 Guna ita ese Dirava ita badinaia, sibona ita henia bona ita gari lasi karana ita laloa lou ese eda hesiai gaukara lalonai ita ia hagoadaia diba. (Heb. 10:32-34) Unai ese ita ia hadibaia Iehova ia ura ita karaia gaudia—mai lalona ibounai ida ia badinaia karadia—ita karaia neganai, moale ita abia.—Mat. 22:37.
[Study Questions]
1. Nega haida do ita davaria lalohadai haida be dahaka, bona dahaka dainai?
2. Iehova ese ia ura ita karaia gaudia be edena bamona ia lalodia maoromaoro?
3. Edena bamona Iehova ese ita ia hagoadaia ita haheauka totona?
4. Dahaka dainai Dirava ena gwauhamata ita laloa noho be gau badana?
5. Dahaka dainai abidadama karadia gunadia ita laloa lou neganai, unai ese ita idia hagoadaia diba?