Iehova Ena Witnes Taudia Edia Lagani 2004 “Dirava ida Ita Raka” Distrik Hebouhebou
1 Dahaka dainai lagani ta ta ai ita abia distrik hebouheboudia oi laloa bada? “Hesiai tauna mai ena kamonai, bona mai ena kara maoromaoro” ese ita totona ia hegaegaelaia hagoadaia herevadia bona drama dainai, a? (Mat. 24:45-47) Buka matamatadia lalonai nega korikori ai idia henia lauma aniani namodia dainai, a? Tadikaka bona taihu edia ekspiriens, Baibel ese edia mauri ia haidaua bona hanamoa dalana idia gwauraia dainai, a? Tano ma haida ai Basileia harorolaia gaukara ia bada ia lao dalana dainai, a? Tadikaka mai edia mauri lagani idauidau ida ita hebamo dainai, a? Oibe, unai gaudia bona ma badina haida dainai mai iseda ura bada ida iseda hebouhebou negana ita naria noho!
2 Dina Toi Iboudiai Ita Lao: Iehova ese Mose amo inai hahegani ia henia: “Taunimanima ibounai do umui haboua . . . do idia kamonai, edia lalona be do idia kehoa.” (Deu. 31:12) Iehova ese hesiai tauna mai ena kamonai bona mai ena kara maoromaoro oreana amo eda hebouhebou ena dina ta ta ena program namona ta ia hegaegaelaia. Iehova ese ‘eda namo habadaia’ totona ita ia hadibaia dainai, ita ura ena hadibaia hereva ibounai ita kamonai. (Isa. 48:17) To, vanegai lagani ena “Dirava Ita Hanamoa” Distrik Hebouhebou haida dekenai, Saturday bona Sunday idia mai taudia edia namba ese Friday ena ia hanaia momokani. Unai ena anina be iseda tadikaka momo be hebouhebou ai idia henia mai anina bada hereva haida idia reaia! Danu, tadikaka edia hebamo namona idia reaia.
3 Haida be idia ura lasi edia moni gaukara idia haboioa, reana unai badina dainai idia ese vanegai lagani ena Friday hebouhebouna dekenai idia lao lasi. To, Witnes taudia momo idia davaria bema nega bada ia do noho lalonai edia biaguna idia noia hebouhebou negana ai idia laga-ani totona, edia biaguna ese gwaumaoro ia henia diba. Oi gwau lasi emu biaguna be oi dekenai laga-ani negana do ia henia lasi, eiava oi gwau lasi hebouhebou ena dina ta oi reaia be gau badana lasi. Painia taihu ta ena gaukara biaguna ia hoa bada, badina taihu be ia ura bada kongregesen hebou bona hebouhebou ibounai ia lao henia totona, unai dainai unai gaukara biaguna be taihu ena hebouhebou dekenai ia lao bona dina ta ibounai ena program ia kamonai henia!
4 Mai kudouna ibounai ida oi hegaegae, aonega dalanai Baibel amo emu biaguna dekenai oi hahedinaraia dahaka dainai hebouhebou lao henia karana be emu tomadiho karana badana ta. (Heb. 10:24, 25) Gari lasi tauna Nehemia ena haheitalai oi badinaia, Iehova oi guriguri henia bena emu biaguna oi noia. (Neh. 1:11; 2:4) Danu, iseda hebouhebou negana do lasi lalonai, abidadama tamona lasi ruma bese taudia dekenai oiemu palani oi hadibaia guna be lalokau karana.
5 Bena Iehova ena gwauhamata dekenai oi tabekau momokani, oi diba tauanina dalanai oi noia gauna be oi do ia henia bema lauma gaudia be emu mauri dekenai oi atoa guna.—Mat. 6:33; Heb. 13:5, 6.
6 Vaira Negana Totona Palani Karaia: Papua New Guinea dekenai, ita itaia distrik hebouhebou haida ai ruma bese amo ta eiava rua sibona idia mai. Tama e, hari palani oi karaia be namo, unai amo oi, emu adavana bona natudia be December lalonai “Dirava ida Ita Raka” Distrik Hebouhebou dekenai do idia henia mai anina bada lauma aniani umui abia diba. (Luka 2:41-44) Natudia be edia tama sina ida lagani ta ta ai distrik hebouhebou idia lao henia karana idia laloaboio diba lasi. Danu, unai be nega namona ruma bese taudia idia moale hebou totona. Oi gwau lasi hebouhebou huana be ia do daudau dainai, palani be gabeai do oi karaia. Hari be nega namona palani oi karaia, hebouhebou dekenai oi lao totona.
7 Moni Haboua Karana: Danu, hari be nega namona moni haboua gaukaradia oi karaia, hebouhebou dekenai oi lao totona. Momokani, hari inai negai distrik hebouhebou haida dekenai oi lao totona, moni davaria karana be mai ena hekwarahi. Dahaka oi karaia diba? Ruma bese haida be kokoroku idia ubudia, unai amo hebouhebou ia kahirakahira neganai idia hoihoilaia diba. Haida be pinati idia hadoa, idia hoihoilaia totona. Ma haida be gwarume idia tahua, eiava idia hoihoilaia diba gaudia haida idia hadoa. To mai anina bada gauna be emu tahua gauna, “Dirava ida Ita Raka” Distrik Hebouhebou do oi lao henia, ia guguru totona hari moni oi haboua matamaia be namo, bona Iehova dekenai oi guriguri emu hekwarahi ia hanamoa totona.—1 Ioa. 5:14.
8 Laloa Bada Karana: Mai anina bada gauna be “gau namodia” do ita laloa bada, unai ese eda lalona ia veria palani ita karaia, Iehova ia henia mai anina bada gaudia amo namo bada ita davaria totona.—Fili. 1:10, 11; Sal. 27:4.
9 Papua New Guinea dekenai, haida be hebouhebou lao henia totona gabu daudaudia idia raka eiava motuka, bouti bona peleini idia abia be namo, to idia ura lasi hebou ta do idia reaia. Vanegai lagani ai, taunimanima badadia 4 bona maragidia 6 be dina foa lalonai Popondetta amo Kokoda Trail idia raka hanai, Port Moresby ena “Dirava Ita Hanamoa” Distrik Hebouhebou dekenai idia lao totona. Dala badinai idia noho hanuadia dekenai idia mahuta bona palani idia karaia, hebouhebou murinai idia raka giroa lou totona. Tadikaka, taihu bona maragidia ma haida danu be unai bamona, West New Britain ena saut kahana konena amo dina toi idia raka, Kimbe ena distrik hebouhebou dekenai idia lao totona. Unai bamona taudia be iseda abidadama Africa tadikaka momo bamona. Democratic Republic of Congo (guna ena ladana be Zaire) ai, tadikaka ta ena mauri lagani 73 be kilomita 450 bamona ia raka, hebouhebou ta dekenai ia lao totona. Ia raka matamaia, bena dina 16 murinai ia ginidae, aena idia gudu, to unuseniai ia noho dainai ia moale. Hebouhebou murinai, ia moale bona lauma dalanai goada ia abia, bona ena noho gabuna dekenai ia raka giroa lou. Lagani momo lalonai ia be unai bamona ia karaia!
10 Do Oi Lao, A?: Lagani daudau Witnes tauna ta ia gwau: “Bema hebouhebou ena dina ginigunana oi reaia, oi be gau momo herea oi reaia unai!” Dahaka dainai unai bamona ia laloa? Badina dina ginigunana be Iehova ena orea ese ita totona ia hegaegaelaia lauma aria badana ena matamana. (Isa. 25:6) Dina ginigunana dekenai ita noho ese ia hahedinaraia salamo torea tauna ena hereva ita abia dae: “Lau dekenai idia hereva, idia gwau, ‘Lohiabada ena Ruma dekenai do ita lao.’ Inai bamona idia hereva neganai, lau be mai moale bada danu.”—Sal. 122:1.
11 Lagani 2,500 bamona gunanai, Iehova ena taunimanima ese idia abia hebouhebou ai, Esera bona ena bamoa Levi taudia be Dirava ena Hereva idia duahia bona ena anina idia gwauraia hedinarai taunimanima dekenai. Dahaka ia vara? Nehemia 8:12 ese ita ia hamaoroa, “taunimanima ibounai ta ta edia ruma, edia ruma dekenai idia lao, bona mai moale danu . . . bona haida dekenai danu idia henia, badina be Esera ia gwauraia vadaeni hereva ena anina idia davaria.” Esera bona Levi taudia bamona, horoa hesiai oreana be Dirava ena Hereva ia gaukaralaia, ena anina ia gwauraia hedinarai, bona ita ia hadibaia edena bamona eda mauri lalonai ita badinaia dainai ita moale bada, ani? Unai hesiai tauna be unai bamona ia karaia dainai, Iehova ena lalokau bona Iena taunimanima ibounai ia laloa bada karana ia hahedinaraia. Emu lalona oi hadaia “Dirava ida Ita Raka” Distrik Hebouhebou ena dina ta oi reaia lasi totona!
This article has been taken partly from km-E 12/03 “2004 ‘Walk With God’ District Convention of Jehovah’s Witnesses”