Hakaua Oreana Amo Ia Mai Revarevana

Tadikaka Bona Taihu e:

“Iseda Tamana Dirava bona Lohiabada Iesu Keriso ese hariharibada bona maino umui ibounai dekenai do idia henia.” (1 Kor. 1:3) Iehova ese hairai ia abia be maoro bona idia mauri noho gaudia ibounai ese Iehova do idia hanamoa negana ita naria noho mai eda ura bada ida, ani! (Sal. 150:6) Unai dina badana ita naria noho lalonai, ita ese Dirava ena Basileia ena sivarai namona ita harorolaia bona hahediba taudia halaoa gaukarana ita karaia noho.

Hari Iehova ena gaukara badana tanobada dekenai be sivarai namona harorolaia gaukarana. (Mar. 13:10) Ita diba momokani Iehova ese inai gaukara ia laloa bada dainai, mai guriguri ida ita karaia, bona ita abia dae taunimanima iboudiai dekenai dala ia kehoa mauri davalaia boubouna amo namo do idia abia totona. (Apok. 14:​6, 7, 14, 15) Momokani, ita ese hekwakwanai ita davaria, to ita moale bada, badina ‘ataiai dekena amo ia diho siahuna ita abia’ inai gaukara ita hagugurua totona!​—Luka 24:49.

Hesiai lagani gunana ita laloa bona Iehova ese ena kamonai hesiai taudia amo ia karaia gaukarana ita lalohadailaia amo moale ita abia diba. Dirava ena taunimanima be lauma helaga ese ia hasiahua dainai, Keriso ena lalokau idia hahedinaraia bona tanobada ibounai lalonai inai heheni karana idia hanaia. Unai bamona lalokau be iseda hebouhebou dekenai ia hedinarai. June amo ia lao December 2003 lalonai, tano handred ma haida amo tadikaka bona taihu be tano badadia 6 dekenai idia karaia intenesenel hebouheboudia 32 dekenai idia lao. Distrik bona intenesenel hebouheboudia dekenai misinari taudia, intenesenel konstraksen taudia, bona tano idauna dekenai idia gaukara Betele taudia idia inteviu henidia.

Unai hebouhebou dekenai, ita ese “See the Good Land” buklet bona Learn From the Great Teacher bukana ita abia. Danu, idia gwau Painia Sikuli Bukana do idia hahanaia lou bona hesiai laganina 2004 ena dokona kahana ai do idia halasia. Gabeai, nega daudau painia gaukara idia karaia bona sikuli lalonai idia vareai vadaeni taudia be painia taudia matamatadia ida do idia sikuli lou.

Dirava ena heduru bona taunimanima edia hariharibada karana dainai Kingdom Hall momo idia haginia diba, unai Kingdom Hall momo be ogogami tanodia dekenai idia haginidia. Tanobada hegegemadai lauma aniani idia ura taudia edia namba ia bada daekau dainai, tano momo dekenai palani idia karaia edia brens rumadia idia habadaia totona. Hari Mauri Hanaihanai Tanobada Dekenai Oi Abia! buklet be gado 299 ai idia halasia, bona idia printaia kopi iboudiai be milioni 139; Diba ese Mauri Dekenai Ita Ia Hakaua Lao bukana be gado 161 dekenai idia hahanaia bona ena kopi be milioni 93 ia hanaia; bona Dirava Ia Ura Dahaka Ita Karaia? buklet ena kopi milioni 200 mai kahana be gado 267 ai idia printaia vadaeni.

Hesiai lagani gunana lalonai, ranu bapatisona amo edia mauri idia gwauhamatalaia taudia 258,845 ita welkam henia! Ena be Dirava ena Basileia umui durua dainai Satani ese umui ia inai henia bada, to danu, emui vairanai ia noho heau helulu lalonai Iehova ena hahenamo umui abia bona lauma dalanai umui Ia naria noho. (Heb. 12:​1, 2; Apok. 12:17) Oibe, namona be umui diba umui ia naria Diravana “ia mahuta lasi.”​—Sal. 121:3.

Lagani 2004 ena siri badana, “Do umui naria . . . Do umui hegaegae,” be namo herea hari inai nega totona. (Mat. 24:​42, 44) Dirava ena Hereva ia gwau inai tanobada dikana ia ore gwauraia lalonai namona be Keristani taudia be hanua lasi taudia bamona idia noho. (1 Pet. 2:11; 4:7) Unai dainai, namona be mai anina bada gaudia ita atoa guna, kohu momo ita gogoa lasi, bona iseda kudouna ita tahua namonamo. “Huala badana” ia ura ita ia ania ore, ia ura ita be iena tanobada ena kara idauidau do ita badinaia.​—Apok. 12:9.

Ita naria namonamo noho totona dina ta ta ai Baibel ita duahia be gau badana. Unai ese ita ia durua, bena iseda gwauhamata dekenai iseda Oibe ena anina be Oibe bona ita hegeregere iseda “abidadama do ita badinaia noho, ela bona ita mase.” (Iam. 5:12; Heb. 3:14) Dina ta ta ai Baibel ita duahia karana ese ita ia durua bona ita laloatao inai tanobada taudia be Dirava ese ia haidaua diba lasi hakaua herevadia, amo idia daudau momokani. (Mal. 3:6; 2 Tim. 3:​1, 13) Baibel amo ita abia diba ese ita do ia durua diba “gori kava” ita dadaraia bona Iehova ita badinaia noho totona.​—2 Pet. 1:16; 3:11.

Tama sina e, emui natudia dekenai Iehova ena hadibaia herevadia umui hadibaia neganai, idia umui durua lauma gaudia do idia tahua bona do idia ‘naria namonamo’ totona, a? (Efe. 6:4) Idia umui durua, edia vaira negana be tanobada dekenai ia raka mai ena aonega hereadaena tauna ese ena vaira negana ia laloa bamona, a? Iesu be kapenta tauna hereadaena, gau matamatadia ia karaia tauna hereadaena, eiava doketa tauna hereadaena ai ia lao diba, to ia ese ful-taim hesiai gaukara ia tahua. Namona be iena haheitalai ese umui ia hagoadaia emui natudia do umui durua, edia mauri lalonai Basileia gaudia do idia atoa guna totona.

Ai, hesiai tauna mai ena kamonai oreana be Hakaua Oreana taudia amo, mai kudouna ibounai ida “hutuma bada herea” taudia ai tanikiu henia, badina ai idia durua emai maduna, ‘Basileia ena Sivarai Namona be tanobada ibounai dekenai harorolaia’ gaukarana, ai hagugurua totona. (Apok. 7:​9, Taravatu Matamatana; Mat. 24:​14, 45) Umui lalokau taudia dekenai Iehova ia gwau “emui kara namodia do ia laloaboio lasi,” badina “umui ese Dirava umui lalokau henia . . . Dirava ena taudia umui durua vadaeni, bona do umui durua noho danu.” (Heb. 6:10) Lagani 2004 Yearbook of Jehovah’s Witnesses dekenai idia noho ekspiriens namodia bona emui gaukara hebou karana ese ia havaraia anina namona umui duahia neganai, namona be umui diba inai tanobada ibounai haroro gaukarana lalonai umui be gaukara badana umui karaia.

‘Dirava do ia henia davana namona umui laloa’ noho lalonai, mai gari lasi ida umui raka, bona taunimanima ta eiava demoni ta ese umui do ia koia garina umui naria namonamo. (Heb. 11:26; Kol. 2:18) Oibe, Iehova umui abidadama henia, bona umui abia dae momokani ia idia lalokau henia taudia ibounai ia durua, mauri hanaihani idia abia totona.​—Ioa. 6:​48-54.

Namona be umui diba, ai moale bada umui ida ai gaukara hebou Iehova ita hanamoa totona.

Emui tadikaka,

Iehova ena Witnes taudia edia Hakaua Oreana