Tiokratik Haroro Sikuli Ena Riviu

Inai henanadai be Tiokratik Haroro Sikuli dekenai do ita herevalaia, October 25, 2004 ia matamaia purana ai. Sikuli naria tauna ese miniti 30 lalonai riviu do ia karaia, unai gaudia be September 6 ia lao October 25, 2004 wiki herevadia dekenai. [Itaia: Bema henanadai edia dokona ai buka ta idia torea lasi, sibona emu tahua karana oi karaia be namo haere oi davaria totona.​—Haroro Sikuli bukana, rau 36-7 itaia.]

HEREVA KARANA

1. Iseda Keristani gaukara ta ita herevalaia neganai, edena dala ai lalona hagoadaia dalanai ita hereva noho diba? [1, be rau 203 par. 3-4] Bema ita diba momokani iseda Keristani tadikaka be Iehova idia lalokau henia bona idia ura Ia idia hamoalea, ita gwauraia hereva ese unai do ia hahedinaraia. (2 Tes. 3:​4, 5; File. 21) Ena be sisiba aukana idia henia be mai badina, hereva dalana ia namo bema kara dika dadaraia, hekwakwanai hanaia, bona Iehova ia ura gaudia ese ita idia gimaia daladia ia hahedinaraia namonamo. (Sal. 119:​9-11)

2. Hereva gwauraia lou ena anina be dahaka, bona dahaka dainai ia be mai anina bada? [3, be rau 206 par. 1-4] Hereva gwauraia lou karana ena anina be lalohadai ta ita gwauraia lou, unai amo idia kamonai taudia ese ita gwauraia gauna idia laloatao diba. Iehova Dirava bona Iesu Keriso ese hereva gwauraia lou karana be ita dekenai idia haheitalaia. (Deu. 6:5; 10:12; 11:13; Mar. 9:​34-​37; 10:​35-​45) Bema kamonai taudia ese iseda hereva idia laloatao, anina be iseda hereva ese idia abia dae gaudia eiava edia mauri dalana do ia haidaua.

3. Edena dala ai iseda hereva ena sinado ita hahedinaraia diba? [6, be rau 210 par. 1-5, maua] Hereva ta ita hegaegaelaia neganai, sinado ena anina idia habadaia hereva badadia bona unai hereva idia durua namonamo lalohadaidia ita abia hidi. Hereva ita henia lalonai, nega haida sinado ena hereva eiava lalohadai badadia ita gwauraia lou.

4. Do ita henia hereva ena hereva badadia be edena bamona ita abia hidi diba? [7, be rau 212 par. 1-4] Hereva badadia ita abia hidi totona, dala ginigunana be iseda kamonai taudia ita laloa, do ita herevalaia gauna idia diba eiava lasi. Dala iharuana be, namona be kamonai taudia dekenai ita herevalaia gaudia amo dahaka ita ura hagugurua ita laloa noho. Ita davaria gaudia be unai dala rua ai ita laloa namonamo bona idia hegeregere gaudia sibona ita abia hidi.

5. Dahaka dainai hereva badadia momo ita hahedinaraia lasi be namo? [8, be rau 213 par. 2-4] Gau badana be kamonai taudia dekenai nega ita henia hereva badadia ta ta idia laloa namonamo totona, bena do idia laloatao diba. Bema iseda lalohadai be hereva badadia haida sibona idia durua namonamo bona idia ta ta edia nega ai edia anina ita herevalaia, hereva do idia kamonai be auka lasi bona do idia laloaboio lasi.

HEREVA NAMBA 1

6. Abata badana do lasi neganai, dahaka gaudia idia vara dainai taunimanima idia abia dae lasi unai nega be do ia doko? [1, w02 3/1 rau 5-6] Abata Badana ia do vara lasi neganai, taunimanima ibounai be gado tamona idia herevalaia. (Gen. 11:1) Taunimanima be lagani handred momo lalonai idia mauri bona lagani momo lalonai idia dibaia vadaeni gaudia be idia habadaia noho diba. Kaino be hanua ta ia haginia diba. (Gen. 4:17) Ima gaukara idauidau idia karaia danu. (Gen. 4:21) Taunimanima ese auri tulu idauidau idia karaia dainai, faktori gaukara idauidau idia karaia. (Gen. 4:22) Unai gaudia bona taunimanima edia mauri dalana dainai, Noa ena haroro herevana idia abia dae lasi ela bona “abata badana ia ginidae, vadaeni abata ranu ese ibounai ia abia lao.” (Mat. 24:​38, 39; 2 Pet. 2:5)

7. Dahaka dainai Iesu ena negai idia noho taudia ese ia idia gwauraia lasi “Gorere Hanamoa Tauna,” to “Hadibaia Tauna”? (Luka 3:​12; 7:​40) [2, w02 7/1 rau 4 par. 3; rau 6 par. 6] Iesu ese taunimanima edia gorere bona tauanina ai dika idauidau ibounai ia hanamoa bona unai ese ia hamomokania ia be Mesia. Danu, unai hoa karadia dainai, vaira negana ai gorere ibounai do ia hanamoa gwauhamatana ita abidadama henia diba. (Isa. 33:24) To, Iesu ena gaukara badana be, taunimanima dekenai edia hekwakwanai do ia kokia momokani gauna​—Dirava ena Basileia​—ia hadibaia. (Luka 4:43)

8. Genese 3:15 (NW ) ese ia herevalaia hahine be daika? [3, gm karoa 11 par. 22] Gaigai ia hasiahua gauna be lauma ta; unai hegeregerena, hahine danu be taunimanima lasi, to ia be lauma gauna ta. Ia be Iehova ena guba oreana, ia lalonai aneru idia noho. Iesu be unai orea amo ia diho mai, ‘hahine ena garana’ ena kara ia karaia totona.

9. Eden lalonai ia vara gwau-edeede karana ese dahaka hepapahuahu herevana ta ia havaraia bona unai gwau-edeede karana ese dahaka anina dikana ia havaraia? (Gen. 3:​1-6) [5, w03 4/1 rau 5 par. 6; rau 6 par. 2-3] Idia hepapahuahulaia herevana be, Iehova ese ia havaraia taudia be dala maorona ai ia lohiadia eiava lasi. Havaraia Tauna be mai ena maoro taunimanima ia hamaoroa ia do idia kamonai henia totona, a? Sedira taunimanima edia noho be do ia namo herea bema sibodia edia raka dalana idia biagua, a? Iehova ena lohia siahuna dadaraia karana ese kara dika bona mase ia mailaia, unai kara be tanobada ena histori lalonai idia vara tuari, hahemaoro gageva, dagedage bona hisihisi idauidau dekenai ita itaia diba.

10. Ierusalema dekenai tomadiho momokanina idia haginia lou negana be edena bamona ita dibaia diba? [6, bsi04 Stadi Namba 3 par. 5] Kurese ese lagani 539 B.C.E. ai Babulonia ia halusia neganai, ena lohia dagina ia abia laganina ia hamatamaia. Ena lohia laganidia ginigunana ai (Nisan 538 B.C.E. amo ela bona Nisan 537 B.C.E. ai), oda ia henia Israela taudia idia ruhaia totona. (Esr. 1:​1-3) Hua namba 7 ai, Israela taudia be Ierusalema dekenai idia ginidae. (Esr. 3:1) Unai be maoro, badina nega bada ia noho Israela taudia idia hegaegae edia laolao totona. Unai dainai, lagani 537 B.C.E. ena keru matamaia negana idia gwauraia Ierusalema ai Iehova ena tomadiho idia haginia lou negana.

WIKI TA TA ENA BAIBEL DUAHIDUAHI

11. Iehova ese Balama ia hamaoroa Balaki ena tatau danu do ia lao, to Balama be idia danu ia lao neganai, dahaka dainai Iehova ia badu? (Num. 22:​20-​22) Iehova ese Balama ia hamaoroa Israela taudia do ia gwauraia dika lasi, to unai mataganigani peroveta tauna be Israela taudia gwauraia dika lalohadaina danu ia lao, badina ia ura Moaba ena King Balaki amo davana do ia abia. (2 Pet. 2:​15; Iuda 11) Unai dainai Iehova ese Balama ia badu henia. Kaino hegeregerena, Balama be ia lalo-auka bona Dirava ena ura ia dadaraia. (Gen. 4:​6-8) [1, w84-E 4/15 rau 30 par. 2; w04 8/1 rau 31 par. 2]

12. Keristani hahine ta ese ia karaia gwauhamatadia be ena adavana ese ia koua diba, a? (Num. 30:​6-8) Lasi, badina Iesu murinai idia raka taudia be Taravatu henunai idia noho lasi. Iehova ese hari taunimanima ta ta ia kara henidia edia gwauhamata dainai, bona Keristani tau be mai ena siahu lasi idia ia koua eiava ia taravatua totona. Oibe, namo lasi Keristani hahinena ese ia karaia gwauhamatadia ese Dirava ena Hereva ia utua eiava Baibel ia gwauraia maduna idauidau ena tau dekenai ia utua. (Had. 5:​2-6) [3, w84-E 4/15 rau 30 par. 4; w04 8/1 rau 31 par. 3]

13. Hari inai negai, “heau mauri hanuadia” ese dahaka idia laulaulaia? (Num. 35:6) [4, w95 11/15 rau 17 par. 8] Ia be tanobada dekenai ia noho gabuna ta ia laulaulaia lasi. To, heau mauri hanuadia be Dirava ena hahemauri dalana, iena taravatu, rara ena helaga taravatuna, ita utua dainai do ita mase garina ita ia hamauria dalana unai. (Gen. 9:6)

14. Deuteronomi 6:​6-9 ai ia noho haheganina, Dirava ena ‘Taravatu be edia imana dekenai do idia kwatua, bona edia baguna dekenai do idia kwatua,’ be momokani unai bamona idia karaia, a? Lasi, ena torea dalana ese ia hahedinaraia unai be laulau herevana. (Eso. 13:9; Aon. 7:​2, 3) Israela taudia ese hanaihanai Dirava ena taravatu idia badinaia. Edia kudouna dekenai Dirava ena Taravatu idia atoa, edia natudia dekenai idia hadibaia, bona edia imana dekenai idia kwatua anina be edia kara amo idia hahedinaraia Iehova ena Taravatu idia badinaia. Taunimanima vairanai idia gwauraia be namo idia be Iehova ena Taravatu badinaia taudia, unai be hegeregere edia matana rua huanai idia torea ibounai ese idia itaia totona. [6, w84-E 7/15 rau 24 par. 1; w04 10/1 rau 28 par. 5]

15. Inai hereva “emui dabua idia dika lasi” anina be Israela taudia be dabua matamatadia idia abia, a? (Deu. 8:4) Lasi. Mana ia diho noho karana be hoa gauna. Lagani 40 tano gagaena ai edia dabua ia dika lasi bona edia aena ia gudu lasi be hoa gauna danu. Bema dabua matamata idia abia unai be hoa karana lasi. [7, w84-E 7/15 rau 24 par. 2; w04 10/1 rau 28 par 1]