Kahana 4—Baibel Stadi Namodia Karaia
Stiuden Hadibaia Idia Hegaegae Totona
1 Iena stadi ia duahia guna, haere ia makaia, bona sibona ena hereva amo haere ia hegaegaelaia stiuden ta be lauma dalanai do ia goada ia lao haraga. Unai dainai, stadi ta oi hamatamaia neganai, namona be stiuden ida stadi ta umui hegaegaelaia hebou, hegaegae dalana oi hahedinaraia totona. Stiuden momo ia durua gauna be, idia ida karoa ta eiava kahana ta ibounai ita hegaegaelaia hebou.
2 Haere Makaia Bona Hereva Kwadogidia Torea: Oi hahedinaraia, edena dala ai henanadai edia haere maorodia ia davaria diba. Emu buka lalonai haere ena point badadia oi makaia dalana be stiuden tauna dekenai oi hahedinaraia. Stadi umui hegaegaelaia lalonai, reana ia ura emu haheitalai do ia badinaia, ena buka lalonai hereva haida sibona do ia makaia, unai ese do ia durua haere ia laloa totona. (Luka 6:40) Bena oi noia, haere be sibona ena hereva amo ia henia totona. Unai amo do oi itaia, ia be stadi edena bamona ia lalo-pararalaia.
3 Stiuden tauna be stadi totona ia hegaegae neganai, stadi buka ese idia gwauraia siridia ia tahua namonamo be mai anina bada. (Kara 17:11) Oi durua, unai siri ta ta ese paragraf lalonai ia noho point badana ia durua dalana ia itaia totona. Oi hahedinaraia edena dala ai ena stadi bukana dekenai hereva kwadogidia ia torea diba. Oi hahedinaraia ia stadilaia gaudia ibounai be Baibel amo idia mai. Stadi lalonai ia oi hagoadaia, idia gwauraia siridia be ena haere lalonai ia gaukaralaidia namonamo totona.
4 Tahua Guna Bona Riviu: Stiuden tauna be ena stadi bukana ia do hegaegaelaia lasi neganai, do ia stadilaia kahana do ia tahua guna be namo. Oi hahedinaraia, namona be nega kwadogi lalonai karoa ena hereva kwarana, hereva kwarana maragidia, bona laulau haida amo, unai stadi kahana ia tahua guna diba. Oi hadibaia, iena hegaegae karana ia hadokoa gwauraia neganai, aonega karana be nega sisina lalonai stadi ena point badadia ia riviulaia, bema riviu mauana ia noho, reana unai ia gaukaralaia diba. Unai bamona dala ese ia do ia durua, ia dibaia gaudia ia laloatao totona.
5 Stiuden tauna dekenai hegaegae dalana ita hadibaia ese ia do ia durua, kongrigeisen hebou dekenai mai anina bada haeredia ia henia totona. Danu, unai hegaegae karana ese ia do ia durua bada, ena Baibel stadi ia ore murinai ena stadi karana ia habadaia totona.
[Blurb on page 1]
August lalonai pablisa edia namba ia daekau—3,579!
2004 ena Memorial dekenai idia mai taudia—19,539!
2004 hesiai laganina ena pablisa averes be 1% amo ia daekau!