Tiokratik Haroro Sikuli Ena Riviu
Inai henanadai be Tiokratik Haroro Sikuli dekenai do ita herevalaia, February 28, 2005 ia matamaia purana ai. Sikuli naria tauna ese miniti 30 lalonai riviu do ia karaia, unai gaudia be January 3 ia lao February 28, 2005 wiki herevadia dekenai. [Itaia: Bema henanadai edia dokona ai buka ta idia torea lasi, sibona emu tahua karana oi karaia be namo haere oi davaria totona.—Haroro Sikuli bukana, rau 36-7 itaia.]
HEREVA KARANA
1. Edena dala ai iseda hereva be kamonai taudia ese idia lalo-pararalaia dalanai ita gwauraia diba? [1, be rau 226 par. 1–rau 227 par. 1] Iesu ese Ororo Harorona ai ia karaia bamona ita karaia totona, namona be auka lasi herevadia, sentens kwadogidia bona hereva badadia haida sibona ita gaukaralaia, danu hereva ita hegaegaelaia namonamo, kamonai taudia idia diba lasi herevadia edia anina ita gwauraia, bona siri ita duahia bona edia anina ita gwauraia hedinarai.
2. Edena bamona herevadia edia anina ita gwauraia hedinarai be namo? [2, be rau 227 par. 2–rau 228 par. 1] (1) Iehova ena Witnes taudia idia diba herevadia, hegeregere “painia,” “sekit naria tauna,” bona “Memorial”; (2) momo ese idia gaukaralaia to edia anina idia lalo-pararalaia namonamo lasi herevadia, hegeregere “souli,” “Aramagedono,” bona “heudahanai”; (3) Baibel herevadia, idaunegai taudia edia mauri eiava gau idauidau edia bada idia hahedinaraia herevadia, hegeregere “lababa eiava lata,” ita gwauraia hedinarai.
3. Edena dala ese ita do ia durua kamonai taudia ia durua dalanai hereva ita henia totona? [6, be rau 231 par. 1-3] Iseda laloa karana ita durua totona ita sibona dekenai inai henanadai ita henia, hegeregere dahaka, dahaka dainai, edena negai, edeseniai, daika, bona edena bamona. Ita laloatao haraga gaudia sibona eiava taunimanima idia diba vadaeni herevadia ita gwauraia lou lasi, to tahua karana amo iseda diba ita habadaia be namo.
4. Kamonai taudia idia diba vadaeni siridia ita duahia neganai, dahaka ita karaia diba ita herevalaia dalana amo diba idia abia totona? [7, be rau 231 par. 4-5] Namona be siri ena kahana idauidau ita herevalaia bona iseda hereva ena sinado idia herevalaia herevadia ita gwauraia. Hegeregere, Mika 6:8 ita duahia neganai, reana ita henanadai “kara maoromaoro” be dahaka? Daika ena lalohadai kara maoromaoro dekenai ia herevalaia? “Kara maoromaoro do ita karaia” ena anina be dahaka? Unai murinai, unai siri ena anina be iseda hereva ena sinado, tahua gauna bona kamonai taudia dekenai ita herevalaia diba.
5. Bema iseda kamonai taudia ita hagoadaia idia diba vadaeni Baibel sivaraina ena hereva idauidau idia laloa namonamo totona, dahaka ia vara diba? [9, be rau 232 par. 2-4] Bema kamonai taudia dekenai siri ena badina siridia, ia hereva tauna, bona unai siri idia torea neganai idia vara gaudia ita herevalaia, kamonai taudia do idia lalo-parara. Unai ese idia do ia durua Dirava ena Hereva idia duahia namonamo bona Baibel negadiai idia vara gaudia idia lalo-pararalaia totona. (Mat. 22:41-45; Luka 20:37, 38)
HEREVA NAMBA 1
6. Taunimanima ita hadibaia ‘Dirava momokanina do idia gari henia, bona iena oda do idia badinaia’ ena anina be dahaka? (Had. 12:13, NW ) [1, be rau 272 par. 3–rau 273 par. 1] Namona be taunimanima ita hadibaia guba bona tanobada ia Havaraia Tauna be Dirava momokanina tamona. Ia sibona be vaira negana ia gwauraia maoromaoro bona ena hereva ia hamomokania diba, guna negadiai ia karaia bamona. Taunimanima ibounai be iena vairanai edia kara ena badina do idia gwauraia hedinarai. (Isa. 45:18, 21, 22; 55:10, 11; Kara 17:30, 31)
7. Edena dala ai inai ladana Iehova sibona lasi, to unai ladana ese ia hahedinaraia Diravana ita gwauraia hedinarai namonamo diba? (Ioe. 2:32) [3, be rau 274 par. 3-5] Bema taunimanima ita hadibaia Havaraia Tauna be mai ena ladana, namona be ita hahedinaraia danu ia be edena bamona Diravana. (Eso. 34:6, 7) Basileia ena hahenamo, Dirava ena taravatu bona ena hahegani idauidau ita gwauraia neganai, unai gaudia ese Iehova ena kara idia hahedinaraia dalana ita herevalaia. Ita ura taunimanima ita hadibaia Dirava idia gari henia, badina ia dainai vaira negana namona ita abia diba. (Sal. 89:7; Roma 14:12)
8. Dahaka dainai Iesu ita diba bona ia ita gwauraia hedinarai be gau badana? (Ioa. 17:3) [5, be rau 276 par. 1] Mauri hanaihanai ita abia totona, Iesu Keriso ita diba namonamo be gau badana. Dirava ia ura taunimanima ibounai ese “Iesu Keriso do idia gwauraia hedinarai ‘Lohiabada.’ ” (Fili. 2:9-11) Unai dainai, ita be Dirava ena kamonai hesiai taudia dainai, ita ura nega ibounai Iesu ita gwauraia hedinarai. (1 Tim. 2:3-7)
9. Edena dala ai Dirava hetura henia namonamo bona Baibel lalo-pararalaia karana amo Iesu ena gaukara ita lalo-pararalaia diba? [6, be rau 276 par. 2] Ioane 14:6 ena hereva hegeregerena, Iesu Keriso sibona amo ta be Dirava ida hetura karana namona ia abia bona Dirava ia hereva henia diba. Iehova ese Iena ura ibounai hagugurua karana lalonai, gaukara badana be unai Natuna dekenai ia henia. (Kol. 1:17-20) Baibel ena peroveta herevadia lalonai unai be mai anina bada. (Apok. 19:10)
10. Edena dala ai ita hahedinaraia diba, ita abia dae Iesu Keriso be King? [8, be rau 277 par. 4] Iseda mauri lalonai Basileia ita tahua guna, ita haroro goadagoada, bona hahediba taudia ita halaoa gaukarana amo iseda hereva ita hamomokania. (Mat. 6:19-34; 24:14; 28:19, 20) Namona be Iesu tohotohoa karana dekenai lalokau korikorina ita hahedinaraia, unai amo Ioane 13:34, 35 ai ia henia “Taravatu matamatana” ita badinaia unai.
WIKI TA TA ENA BAIBEL DUAHIDUAHI
11. Aberahamo ena tamana, Tera, be kaivakuku tomadiho henia tauna, a? (Ios. 24:2) Guna, Tera be Iehova Dirava ia tomadiho henia lasi. Ia be hua diravana Sin—Uru hanua lalonai momo ese idia tomadiho henia diravana unai—ia tomadiho henia. Iuda taudia edia kastom hegeregerena, reana Tera be kaivakuku ia karaia danu. [2, w05 1/1 “Iosua Bukana Ena Hereva Badadia”]
12. Gideona ia gari dainai Iehova ese ia dekenai ia henia gaukarana ia hagugurua lasi, a? Dahaka dainai unai bamona oi haere? (Gun. 6:25-27) Gideona ena gari lasi karana be Heberu 11:32-38 ese ia hamomokania, “tuari lalonai idia be mai siahu” taudia ida idia gwauraia hebou. To danu ia karaia gaukarana lalonai manau bona aonega karana ia hahedinaraia. Taunimanima vairana ia karaia lasi, to hanuaboi ai, taunimanima momo idia loaloa lasi negana ai, ia karaia. Danu, Gideona ia naria namonamo badina hesiai taudia 10 ia mailaia—reana ena anina be haida be gima taudia bona oredia ese boubou patana bona au helagana hadikaia gaukara lalona ia do idia durua. [4, w00 8/1 rau 17 par. 12]
13. Gideona ese Eparaima iduhuna ia kara henia dalana amo dahaka ita dibaia? (Gun. 8:1-3) Gideona ese ena lalo-namo herevadia ia abia hidi namonamo dainai, tuari ia havaraia diba hepapahuahu ia koua. Reana Eparaima iduhu taudia edia hekwakwanai be sibona edia namo idia laloa bada bona idia hekokoroku. To, unai ese Gideona ena hekwarahi maino havaraia totona be ia koua lasi. Unai hegeregerena, hari inai negai, reana haida do idia badu bona ita do idia inai henia. To, namona be edia hemami ita laloa bada, bona ita hekwarahi edia lalohadai ita lalo-pararalaia totona. [5, w00 8/15 rau 25 par. 3-4]
14. Gibea taudia idia ura lasi heabidae idia hahedinaraia lasi karana ese dahaka ia hahedinaraia? (Gun. 19:14, 15) Unai bamona kara be kara idauna Israela ena hanua ta totona. Heabidae idia hahedinaraia lasi ese ia hahedinaraia, idia huanai kerere badana ia noho, bona gabu ia dibura ia lao neganai ta ese heabidae ia hahedinaraia lasi. Baibel ese Keristani taudia ia hagoadaia edia ruma dekenai ‘idau taudia do idia abia dae.’ (Rom. 12:13) [8, w05 3/1 “Gunalaia Taudia Bukana Ena Hereva Badadia”]
15. Bema “ta sibona ena matana ai dahaka be maoro, unai gauna be vaia ia karaia,” anina be gwau-edeede karana ia hahedinaraia, a? (Gun. 21:25) Lasi, badina Iehova ese dala ia karaia ena taunimanima ia hakaua totona. Ia ese idia dekenai taravatu bona hahelaga taudia oreana ia henia, idia ia hadibaia totona. Urima bona Tumima amo hahelaga tauna be mai anina bada gaudia totona Dirava ia hereva henia diba. (Eso. 28:30) Hanua ibounai lalonai, sisiba namodia idia henia tatau badadia idia noho. Israela tauna be unai dala ia badinaia bona ‘ena matana ai ia maoro gauna ia karaia’ neganai, namo ia davaria. [8, w05 3/1 “Gunalaia Taudia Bukana Ena Hereva Badadia”]