Tiokratik Haroro Sikuli Ena Riviu

Inai henanadai be Tiokratik Haroro Sikuli dekenai do ita herevalaia, August 29, 2005 ia matamaia purana ai. Sikuli naria tauna ese miniti 30 lalonai riviu do ia karaia, unai gaudia be July 4 ia lao August 29, 2005 wiki herevadia dekenai. [Itaia: Bema henanadai edia dokona ai buka ta idia torea lasi, sibona emu tahua karana oi karaia be namo haere oi davaria totona.​—Haroro Sikuli bukana, rau 36-7 itaia.]

HEREVA KARANA

1. Iseda helaro be ma haida dekenai ita herevalaia neganai, edena dala ai taunimanima vairanai iseda “manau bona manada kara” ita hahedinaraia diba, bona dahaka dainai unai be mai anina bada? (Fili. 4:5; Iam. 3:17) [3, be rau 251 par. 1-3, maua] Laloa manada karana ita hahedinaraia diba bema ita hereva henia tauna ena mauri, noho dalana, bona hemami ita laloa. Danu iseda lalogoada bona ura bada be mai laloa kehoa ida ita gaukaralaia bona ita hereva henia tauna ena lalohadai ita abia dae neganai, laloa manada ita hahedinaraia. Unai be mai anina bada badina dala aukana ai lalohadai ita gwauraia neganai, taunimanima do idia ura lasi kamonai bona ita do idia abia dae lasi.

2. Bema laloa manada ita hahedinaraia negadia ita diba, unai ese edena bamona ita do ia durua ma haida ita kara namo henia totona? [5, be rau 252 par. 5–rau 253 par. 1] Ena be ita be mai eda badina namodia iseda hereva ita hamomokania totona, to nega haida ia namo bema unai ita rakatania sibona. Lalohadai kererena ita rakatania sibona, unai dala amo namo ia havaraia gauna ma ta ita herevalaia diba. Ita laloatao Iehova ese taunimanima dekenai diba ia henia abia hidi idia karaia totona, unai ese ita ia durua nega maoronai laloa manada ita hahedinaraia diba. (Ios. 24:15; Aon. 19:11)

3. Bema ma haida ita durua gau ta ena badina idia lalohadailaia totona, dahaka dainai henanadai ita gaukaralaia namonamo be mai anina bada? [6, be rau 253 par. 2-3] Henanadai be dala namona ai ita gaukaralaia neganai, unai ese dala ia kehoa taunimanima be edia kudouna ai idia noho gaudia idia herevalaia bona unai hereva idia lalohadailaia totona. Namo lasi henanadai ena haere ita henia haraga bona ita sibona ita hereva, to henanadai amo ta ita durua ita herevalaia gauna ia lalohadailaia bona ia sibona ese ena anina ia lalopararalaia totona. Henanadai ita gaukaralaia amo haere idia tahua taudia ita durua diba idia laloa bona ita herevalaia gauna idia lalopararalaia totona. (Luka 10:​25-37)

4. Dahaka gaudia ita laloa be namo, unai amo iseda hereva ese kamonai taudia edia lalona do ia veria? [7, be rau 255 par. 1-3, maua–rau 256 par. 2, maua] Kamonai taudia be iseda hereva do idia abia dae lasi bona badinaia lasi ela bona idia diba momokani ia be hereva momokani. Unai dainai, namona be ita hadibaia gaudia be Dirava ena Hereva momokani, Baibel amo ia mai. (Ioa. 17:17) Namona be ita ura ita gwauraia herevadia idia hamomokania gaudia ita hahedinaraia. Lalohadai ita gwauraia sibona lasi, to namona be ma haida dekenai badina maorodia ita henia ita herevalaia gaudia idia abia dae totona, inai ita laloaboio lasi, kamonai taudia be mai edia maoro idia henanadai totona: “Dahaka dainai unai be momokani?”

5. Bema ita ura hamomokania gaudia ma haida ita gaukaralaia Baibel ena namo ita hahedinaraia totona, dahaka ita laloatao be namo? [8, be rau 256 par. 4-6, maua] Namona be sivarai ia gwauraia maoromaoro bukana ma ta amo ita abia hamomokania herevadia ese idia hahedinaraia Baibel ena hereva be ita itaia gaudia ida ia hegeregere. Unai be iseda tahua gaudia bona ita hereva henia taudia edia lalohadai ida ia hegeregere be namo. Hanaihanai Dirava ena Hereva, hereva momokani buka badana unai, amo iseda hereva ita hamatamaia, bena saiens taudia idia davaria gaudia eiava diba bada taudia edia hereva amo iseda hereva ita hamomokania.

HEREVA NAMBA 1

6. Adamu ia mase neganai, dahaka ia vara ena souli dekenai? [2, ie rau 22 par. 4] Nega momo Baibel lalonai unai hereva “souli” ena anina be tau sibona. Unai dainai ita gwau Adamu ia mase neganai, ita gwau souli ta, ena ladana be Adamu, ia mase. Baibel ia gwau: “Ia kara dika soulina​—ia sibona do ia mase.” (Ese. 18:4, NW )

7. Reana dahaka dainai aposetolo taudia idia hekwarahi manau karana idia hahedinaraia totona? [3, gt karoa 62] Guna, idia be Iuda ena tomadiho oreana lalonai idia noho. Unai orea dekenai dagi bona ladana bada be mai anina bada. Danu, reana Petero ia laloa ia ese ma haida ia hereaia, badina Iesu ese ia gwauhamata henia Basileia ena “ki” do ia henia. Reana Iakobo bona Ioane danu be unai bamona idia laloa, badina be Iesu ena toana ia idau neganai unai idia itaia.

8. Iesu ena hereva Mataio 6:7 dekenai ena anina be dahaka? [4, gt karoa 35] Iesu ia gwau hereva haida ita gwauraia lou be kerere lasi. Nega ta ia guriguri neganai, “guna ia gwauraia gaudia ma ia gwauraia lou.” To ia ura lasi karana be inai: Hereva haida ita dibaia bena ita “gwauraia loulou” haida idia karaia bamona, ageva ena nadinadi ta ta idia dogoatao bona idia dibaia herevadia idia gwauraia loulou.

9. Matamata taudia be edeseniai tura namodia idia davaria diba? [6, yp karoa 8] Keristani kongrigeisen lalonai. Idia gwau Dirava idia abidadama henia bona edia kara amo unai idia hamomokania memerodia bona kekenidia oi tahua. Bema unai bamona memerodia bona kekenidia oi davaria diba lasi, Keristani taudia badadia oi tura henidia. Baibel ese Davida bona Ionatana edia hetura karana namona ia gwauraia; ena be Ionatana ena mauri laganidia be Davida ena tamana ena hegeregerena, to idia ruaosi idia hetura heheni.​—1 Sam. 18:1.

10. Dahaka dainai Baibel ia gwau ‘taunimanima gari henia karana be tarapu bamona’? (Aon. 29:25) [7, yp karoa 9] Baibel negadiai, tarapu dekenai aniani idia atoa, bena boroma ta, unai gau ena dika ia diba lasi gauna, be unai aniani ia abia gwauraia neganai, maoromaoro tarapu lalonai ia moru. Bema oi ura oiemu bamodia ese oi do idia abia dae, unai ura be tarapu ta bamona. Unai ura ese oi ia veria diba Dirava ena taravatu do oi utua totona.

WIKI TA TA ENA BAIBEL DUAHIDUAHI

11. Solomona ese ia haginia dubu ena iduara badinai idia gini du rua ladana Iakina bona Boasa ese dahaka idia hahedinaraia? (1 Kin. 7:​15-22) Idiba kahanai ia gini du ena ladana be Iakina, ena anina be “Dirava ese Do Ia Haginia.” Laurina kahana ai ia gini du ena ladana be Boasa, ena anina be “Iena Goada amo.” Heberu gado be idiba amo idia duahia matamaia ia lao lauri kahana dainai, unai du ese inai lalohadai ia hahedinaraia, “Dirava ese do ia haginia iena goada amo.” Unai du be idia gini kava, idia be dubu ena kahana ta lasi. Unai du rua ese idia hahedinaraia Dirava ese iena goada amo dubu ia haginia bona gwaumaoro ia henia unai dubu dekenai tomadiho momokani idia karaia totona. [1, 1 Kin. 7:21; it-1-E rau 348 par. 2; w66-E rau 32]

12. Solomona ese Galilea dekenai idia noho hanua 20 be Turo ena King Hirama dekenai ia henia karana be Mose ena Taravatu hegeregerena, a? (1 Kin. 9:​10-13) Reana momo idia laloa Levitiko 25:​23, 24 dekenai ia noho Taravatu be Israela taudia ese idia noholaia tanona sibona ia herevalaia. Solomona ese Hirama dekenai ia henia hanua be Israela lasi taudia ese idia noholaia, ena be Gwauhamata Tanona ena kahanai idia noho. (Eso. 23:31) Solomona ena kara ese ia hahedinaraia danu ia ese Taravatu ia badinaia goevagoeva lasi, badina ‘hosi momo ia abia’ bona hahine momo ia adavaia. (Deu. 17:​16, 17) Herevana ena badina be dahaka, Hirama be unai harihari gauna dekenai ia moale lasi. Reana unai hanuadia idia noholaia taudia, kaivakuku idia tomadiho henia taudia unai, ese edia hanua idia naria namonamo lasi, eiava gabu namona ai idia gini lasi. [2, w05 7/1 “Iehova Ena Hereva be Ia Mauri Noho​—King Taudia Ginigunana Bukana Ena Hereva Badadia.”]

13. Dirava ena peroveta tauna ta ena gwau-edeede karana amo dahaka ita dibaia? (1 Kin. 13:​1-25) Hanaihanai Iehova ena dala dekenai ita raka mai kerere lasi be namo. Nega ibounai Iehova ena heduru ita tahua be namo, to mauri lalonai nega aukadia eiava lalohisihisi ita davaria negadiai unai ita karaia be mai anina bada. Namo lasi mai hekokoroku ida, sibona eda lalohadai ita badinaia eiava ma ta ese ita ia doria gau ta ita karaia totona, ena be unai tauna be maduna haida ia huaia, eiava ia gwau Iehova ena orea lalonai gaukara badana ia karaia. [3, w05 7/1 “Iehova Ena Hereva be Ia Mauri Noho​​—King Taudia Ginigunana Bukana Ena Hereva Badadia”; w98 9/1 rau 23; w62-E rau 114 par. 14]

14. Iuda ena King Asa ese edena dala ai ena goada ia hahedinaraia, bona ena haheitalai amo dahaka ita dibaia? (1 Kin. 15:​11-13) King Asa ese kaivakuku bona dubu ai lebulebu karadia idia karaia taudia be Iuda amo ia kokidia. Danu ia ese ena tubuna hahine ena dagi badana ia kokia bona ena “kaivakuku” dikana ia gabua. Unai hegeregerena, iseda haroro bona hadibaia gaukara amo tomadiho goevana ita abia isi, bona hereva momokani negea karana ita dadaraia momokani. [4, w05 7/1 “Iehova Ena Hereva be Ia Mauri Noho​​—King Taudia Ginigunana Bukana Ena Hereva Badadia”; w93 11/15 rau 17 par. 20]

15. Edena dala ai King Ahaba bona Naboto dekenai ia vara gauna ese ia hahedinaraia, sibona hebogahisi henia karana be mai ena dika? (1 Kin. 21:​1-16) King Ahaba be sibona dekenai ia hebogahisi badina Naboto be ia ura lasi ia dekenai tano ta ia hoihoilaia. Ahaba ena adavana, Kwini Iesebele ia ura lasi Naboto ena hereva ia abia dae, unai dainai ia ese dala ia karaia bena Ahaba idia samania koikoi idia gwau ia ese Dirava ena ladana ia hadikaia bona nadi amo idia hodoa mase. Ahaba ese ia hahedinaraia bamona, sibona dekenai ia hebogahisi tauna be dala kererena dekenai ia raka. Badina sibona dekenai ia hebogahisi tauna be ia sibona ia laloa bada, bona unai kara ese ia do ia hadikaia diba. Unai kara dainai, tau ta ia vaira auka bona ia badu diba, hegeregere King Ahaba bamona. Unai dainai ia be ma haida do ia lalokau henidia lasi. Bona mai anina bada gaudia do ia laloa bada lasi dainai, hahemaoro kerere ia karaia diba. Danu, unai bamona kara dainai ta be lauma dalanai ia manoka diba bona hedibagani ia davaria neganai, dika do ia karaia, bona Dirava vairanai ena goeva karana do ia haboioa. [6, w77-E rau 547]