Hebogahisi Karana amo Oi Hahedinaraia Ma Haida Oi Laloa Bada
1 Guna Iehova ena Witnes taudia ia ura henia lasi hahinena ta, be ena nega ginigunana Witnes hahine ta ia hedavari henia negana ia laloa lou, ia gwau: “Lau laloatao lasi dahaka ai herevalaia, to lau laloatao gauna be iena hebogahisi karana lau dekenai, ia be heabidae bona manau hahinena. Ena kara dainai ia lau ura henia.” Unai hereva ese ia hahedinaraia ita haroro henia taudia ita laloa bada be mai anina bada.—Fili. 2:4.
2 Lalokau be mai Ena Hebogahisi: Lalokau ita hahedinaraia dalana ta be, ma haida dekenai hebogahisi karana ita hahedinaraia. (1 Kor. 13:4) Hebogahisi tauna be ma haida edia namo ia laloa bada dainai ia ura idia ia durua. Oibe, iseda haroro gaukara amo hebogahisi karana ita hahedinaraia. To taunimanima ita haroro henia karana sibona ese ia hahedinaraia lasi ita be idia ita laloa bada. Iseda hetura karadia, kara namodia, kamonai karana, iseda hereva, bona danu iseda vairana ena toana amo ita hahedinaraia diba, ita be taunimanima ita laloa bada.—Mat. 8:2, 3.
3 Mai lalokau ida taunimanima ita laloa bada karana ese ita ia durua diba idia totona gau ta ita karaia. Painia tadikaka ta ia haroro lalonai, ruma ta dekenai hahine buruka ta ia davaria. Tadikaka ia gwau ia be Iehova ena Witnes tauna ta neganai, unai hahine buruka ia ura lasi kamonai. Ia gwau ia be kisini dekenai lait ena golobu ia haidaua lalonai iduara ena pidipidi regena ia kamonai. To tadikaka ia gwau: “Namo lasi unai gaukara be oi sibona oi karaia, dika do oi davaria diba.” Vadaeni unai hahine ese ia boiria vareai. Bona tadikaka ese lait golobu ia haidaua murinai, ruma ia rakatania bona ia lao. Gabeai unai hahine buruka ena natuna mero be ruma dekenai ia mai neganai, hahine buruka ese ia vara gauna ia hadibaia. Unai mero be unai kara dainai ia hoa bada, bona tadikaka ia tahua matamaia tanikiu herevana ia gwauraia totona. Unai mero ese tadikaka ia davaria neganai, idia ruaosi idia herevahereva bona unai mero be stadi ia abia dae.
4 Iseda hebogahisi karana dainai, ita ese taunimanima dekenai Iehova ena lalokau ita hahedinaraia bona Basileia ena sivarai namona ita hahairaia. Unai dainai, nega ibounai hebogahisi karana amo ita hahedinaraia ita be “Dirava ena hesiai taudia.”—2 Kor. 6:4, 6.