Ma Haida Laloa Bada Dainai Haroro Daladia Haidaua
1 Paulo ena kara namona ta be inai: hanaihanai ena kamonai taudia edia noho bona laloa dalana ia laloa bada, bona unai hegeregerena ena haroro dalana ia haidaua. (1 Kor. 9:19-23) Namona be ita hekwarahi unai bamona ita karaia totona. Bema ita hegaegae, nega momo Iseda Basileia Gaukara pepana lalonai idia noho hamatamaia herevadia ita haidaua diba, iseda teritori taudia ita haroro henidia totona. Ruma ta ai ita ginidae neganai, reana ruma tauna ese ia ura henia gaudia ita itaia, bona unai hegeregerena iseda hereva ita hamatamaia. To, iseda haroro lalonai ita haidaua gauna ma ta ia noho.
2 Ma Haida Idia Gwauraia Gaudia Habadaia: Sivarai namona ita harorolaia neganai, nega momo ruma taudia dekenai henanadai ta ita henia bona ita noia idia haere totona. Edia haere be edena bamona oi laloa? Edia haere oi laloa bada lasi bona oi hegaegaelaia haroro herevana oi gwauraia sibona, a? Eiava emu hereva amo oi hahedinaraia oi be ruma taudia edia haere oi laloa bada, a? Bema haida idia herevalaia gaudia oi laloa bada, reana henanadai ma haida do oi gaukaralaia edia lalohadai oi dibaia totona. (Aon. 20:5) Bena Basileia ena sivarai amo kamonai tauna ia laloa bada gauna oi haerelaia diba.
3 Anina be ita hegaegaelaia haroro herevana sibona lasi, to gau ma haida ita herevalaia diba. Hegeregere, bema ita be hekwakwanai ta ita herevalaia, to ruma tauna ese ena gabu ai ia vara gauna eiava ia laloa bada gauna ta ia gwauraia, namona be ruma tauna ia laloa bada gaudia be Baibel amo ita herevalaia.—Fili. 2:4.
4 Haroro Dalana Haidaua: Ruma tauna ese henanadai ta ia gwauraia neganai, namona be nega ma ta ita abia hidi bena tahua karana ita karaia murinai, ena henanadai ita haerelaia diba. Bona unai henanadai ia haerelaia buka eiava magasin ita rakatania diba. Unai ibounai ese idia hahedinaraia, ita ura bada ma haida ita durua Iehova idia diba totona.—2 Kor. 2:17.