Hua Ibounai Ripoti Oi Henia, A?
1 Sekit naria taudia ese kongrigeisen idia vadivadi murinai idia siaia mai ripoti ese idia hahedinaraia, Papua New Guinea dekenai pablisa taudia edia namba be 3,500 bamona. To, hua ta ta ai Iseda Basileia Gaukara oi itaia neganai, iseda tano ena pablisa taudia edia namba ia daekau bona ia diho, bona nega momo pablisa edia namba be 3,000 henunai. Unai ese ia hahedinaraia pablisa momo be dala idia karaia lasi hua ibounai haroro gaukara idia karaia totona, bona momo be ripoti idia henia lasi. Ai diba henunai idia noho hagoadaia herevadia ese oi do ia durua.
2 Hahenamo Oi Laloa Bada: Ma haida dekenai Basileia ena sivarai namona ita harorolaia diba ena hahenamo ita laloa bada be namo. Unai gaukara ese Iehova ena kudouna ia hamoalea bona kudou-maoro taudia ia durua mauri ia lao henia dalana idia dibaia totona. (Aon. 27:11; 1 Tim. 4:16) Hanaihanai ita haroro karana ese iseda diba haroro gaukara dekenai do ia habadaia bona unai dainai moale bona mamina namona do ita abia.
3 Gaukara Ena Ripoti Oi Henia: Haroro gaukara idia karaia taudia haida be nega korikori ai edia gaukara ena ripoti idia henia lasi. Namo lasi ita laloa iseda hekwarahi be anina lasi dainai ripoti ita henia lasi. (Mareko 12:41-44 itaia.) Oibe, ita karaia gauna ena ripoti ita henia be namo! Ruma dekenai gaukara ita karaia namonamo dalana ia noho be namo, hegeregere bema kalenda ita gaukaralaia haroro gaukara dekenai ita gaukaralaia negana ita torea totona, unai ese hanaihanai ita do ia hadibaia hua ta ta ena dokonai ripoti maorona ita henia haraga. Ma danu, gau badana be kongrigeisen bona grup ibounai be hua ibounai ena dina namba 6 ia do abia lasi neganai hua gunana ena ripoti be brens opesi dekenai idia siaia. Ripoti ia naria tadikaka umui durua totona, mani emui kara emui haroro ripoti be hua ena dokona ibounai umui henia haraga.
4 Heduru Oi Henia: Reana emui kongrigeisen lalonai gau haida idia hanamoa be namo, bema haroro gaukara idia karaia hanaihanai totona haida idia ura heduru idia abia. Kongrigeisen ena seketere bona buka stadi naria taudia ese dala idia karaia be namo, idia manada pablisa taudia ese heduru idia henia totona. Nega haida, sekit naria tauna sibona be ia hegeregere unai bamona heduru ia hegaegaelaia totona. Bema oiemu natudia eiava Baibel stadi taudia ma haida be bapatiso lasi pablisa vadaeni, namona be idia oi hadibaia hua ibounai edia gaukara ena ripoti idia henia totona.
5 October 1, 1997 ena Gima Kohorona lalonai, inai sivarai ia noho: “Iehova Ena Hesiai Gaukara Lau Karaia Daudau Dainai Lau Tanikiu Bada.” Taihu Ottilie Mydland, Norway amo, be lagani 1921 ai bapatiso ia do abia lasi neganai, sivarai namona ia harorolaia hanaihanai. Lagani 76 murinai, ena mauri lagani be 99 neganai, ia gwau: “Lau moale badina dala ia do noho hanaihanai lau haroro totona.” Haheitalai namo hereana Iehova ena hesiai taudia ibounai ese idia tohotohoa totona!
This is a repeat of article in km 4/00 taken from km-E 4/00 “Are You a Regular Kingdom Proclaimer?”