Kara Namodia amo Ma Haida Laloa Bada
1 Ena be Iehova be Guba bona Tanobada ena Lohiabada, to goevadae lasi taudia ia hebogahisi henidia, ia lalodia bada bona ia kara namo henidia. (Gen. 19:18-21, 29) Sivarai namona ita harorolaia neganai, namona be Dirava ena kara namodia ita hahedinaraia. (Kol. 4:6) Iseda hereva bona hemataurai karana amo ita hahedinaraia ma haida ita matauraia sibona lasi, to kara ma haida ita karaia danu be namo.
2 Ruma-Ta-Ruma-Ta Ai: Bema nega kererena ai ruma tauna ita vadivadi henia eiava ia bisi bada, dahaka do ita karaia be namo? Ita diba unai be nega maorona lasi dainai, namona be iseda hereva ita hakwadogia, eiava ruma tauna ita noia nega ma ta ai ia ita lou henia totona. Bema iseda buka eiava magasin idia ura lasi abia, namona be edia ura ita matauraia. Ma haida ita laloa bada ena anina be edia kohu ita matauraia, hegeregere edia geiti bona iduara ita koua bona iseda natudia ita hadibaia unai bamona idia karaia totona. Bema taunimanima be edia ruma dekenai idia noho lasi, namona be raka hanai taudia ese idia itaia lasi gabunai magasin eiava pepapepa ita atoa. Oibe, ita ura taunimanima ese ita idia kara namo henia hegeregerena, ita ese idia danu ita kara namo henidia be namo.—Luka 6:31.
3 Dala Haroro Ai: Dala ai ita haroro neganai, raka hanai taudia edia dala ita koua lasi, bona namo lasi hutuma be sitoa vairanai idia gini, unai amo ita hahedinaraia ma haida edia namo ita laloa. Namona be taunimanima edia noho dalana ita laloa, bema ita itaia ta be ia lao haraga gabu ta dekenai, ita hereva henia lasi, to bema ia dekenai nega ia noho, ita hereva henia diba. Taunimanima haida idia ura lasi iseda hereva idia kamonai, to idia ura idia hepapahuahu, namo lasi taunimanima vairanai unai bamona taudia ida ita hepapahuahu. To namona be mai hemataurai ida ita kara henidia bona ita hekokoroku lasi.—Mat. 12:19.
4 Telefon Haroro: Bema ita ura telefon amo ita haroro, namona be regerege lasi gabuna dekenai telefon ita gaukaralaia, unai amo ita hereva henia taudia ita laloa bada. Ita ringi neganai, namona be ita be daika bona ita ringi ena badina ita gwauraia hedinarai. Namona be telefon ita dogoatao namonamo bona mai gado namo ida ita hereva, unai amo Baibel ena hagoadaia herevadia be ma haida ida ita herevalaia namonamo diba. (1 Kor. 14:8, 9) Bema dala idauidau ai ma haida ita hebogahisi henidia, ita lalodia bada bona ita kara namo henidia, ita be Iehova Dirava ena kara ita tohotohoa unai.