Iseda Buka Bona Magasin Ita Gaukaralaia Namonamo
1 Idia hanaia lagani seven lalonai, pablisa taudia, painia taudia, bona kamonai taudia dekenai magasin bona buka ena davana idia gwauraia lasi. To, buka bona magasin ita hariharilaia neganai, taunimanima edia ura hegeregerena idia henia kontribusen monina do ita abia tanobada ibounai sivarai namona halasia gaukarana durua totona. Unai ese ia hahedinaraia goevagoeva Iehova ese unai gaukara ia hanamoa. To, nega ta ta ai unai dala hegeregerena buka bona magasin ita gaukaralaia namonamo totona, hariharilaia dalana ita riviulaia be namo.
2 Haroro Gaukara ai Ita Gwauraia Diba Gaudia: Taunimanima edia lalona veria totona, namona be oi manadalaia herevana oi gaukaralaia—sibona emu kiki herevana ta eiava Iseda Basileia Gaukara lalonai idia hahedinaraia herevana ta. Bema ta ese kamonai lasi toana ia hahedinaraia, ia dekenai buka bona magasin ta do ita rakatania lasi. Ita ura lasi kamonai lasi taudia dekenai iseda buka bona magasin do ita henia kava. To, bema ta ia kamonai bona ia ura bada magasin eiava buka ia duahia, ta ita rakatania diba. Namona be ita laloatao, idia ita noia lasi kontribusen do idia henia guna bena magasin eiava buka idia abia.
3 Henunai idia noho heduru herevadia haida oi gaukaralaia diba buka eiava magasin oi hahedinaraia neganai: “Bema inai magasin oi ura duahia, oi ida lau rakatania diba.” Reana ruma tauna do ia henanadai: “Ena davana be hida?” Inai bamona oi haere diba: “Davana be ai gwauraia lasi. To do ai moale bema emu ura hegeregerena toea haida amo emai tanobada ibounai gaukarana oi durua totona.”
4 Magasin oi hariharilaia neganai, reana ena hereva badana ta amo henanadai ta oi henia, bena oi gwau: “Lau ura inai magasin lalonai ia noho hereva oi itaia. Bema oi ura inai magasin ruaosi oi duahidia, do lau moale bada oi dekenai lau rakatania totona.” Bema ruaosi ia abia, reana ma oi gwau: “Oi ida lau herevahereva dainai lau moale bada. Lau diba inai magasin do oi moalelaia. Bona lau ura vaira pura do lau mai bona inai magasin do ita herevalaia. To, bema oi ura emai Baibel hadibaia gaukarana oi durua, kontribusen moni sisina oi henia diba, do ai moale bada emu kontribusen dainai.”
5 Eiava ruma tauna be reana maoromaoro magasin do ia abia bona ia gwau, “Tanikiu.” Reana inai bamona oi haere henia diba: “Namo. Unai magasin do oi moalelaia. To oi diba emai gaukara be edena dala ai oi durua diba, a? Tanobada ibounai dekenai taunimanima ese inai magasin idia moalelaia. Unai dainai heduru moni amo inai gaukara idia durua. Bema oi dekenai ia hegeregere emu heduru moni amo emai gaukara oi durua diba, emu heduru do ai moalelaia.”
6 Momokani Idia Ura Kamonai, A? Bema ita itaia ruma taudia be lauma gaudia idia laloa bada lasi, namo lasi iseda buka bona magasin ita rakatania. (Heb. 12:16) Edena bamona do oi diba bema ta be ia ura momokani ia kamonai? Mai ena ura bada ida oi danu ia herevahereva be toa namona. Eiava emu hereva ia hakala henia namonamo, henanadai edia haere ia henia, bona lalohadai ta ia gwauraia ese ia hahedinaraia herevahereva lalonai ia vareai. Oi ia hereva henia mai ena hemataurai bona lalomanau ida ese ia hahedinaraia ia be manau tauna. Baibel oi duahia neganai, oi duahia sirina ia badinaia karana ese ia hahedinaraia Dirava ena Hereva ia matauraia. Nega momo, heduru gauna be oi nanadaia bema oi hariharilaia buka eiava magasin do ia duahia momokani eiava lasi. Bona danu, namona be lou henia dalana oi herevalaia, unai amo oi lou mai neganai guna umui herevalaia gauna umui kikilaia diba. Bema unai ia abia dae, unai ese ia hahedinaraia ia ura kamonai. Bema oi itaia ia ura kamonai, oi diba ia abia magasin eiava buka do ia duahia. Nega haida reana ruma tauna dekenai pepapepa sibona ita rakatania be hegeregere. Dala haroro ita karaia neganai, haida be nega lasi ita hereva henidia totona, unai dainai idia dekenai pepapepa sibona ita henia diba.
7 Momokani, namona be ita laloaboio lasi, kamonai taudia amo ita abia kontribusen be Kingdom Hall dekenai idia makaia maua ladana “Tanobada Ibounai Gaukarana Durua Monina—Mataio 24:14” lalonai ita udaia.
8 Ita ibounai, haroro bona hadibaia gaukara ita karaia taudia, be mai moale ida kontribusen ita henia danu. Iseda tahua gauna be hereva momokani idia tahua taudia ibounai ese do idia davaria. (Isa. 55:1; Apok. 22:17) Unai be iseda hahenamo bona maduna, iseda noho dalana hegeregerena, iseda gau namodia amo Iehova ita hanamoa totona.—Aon. 3:9, 10; 10:22.
This is a repeat of article in km 12/05 taken from km-E 12/05 “Use Our Literature Wisely.” Also repeated in km 6/08.