Guna Oi Hahedinaraia Lalokauna Do Oi Haboioa Lasi
1 Iesu ese Efeso kongrigeisen ia sisiba henia, ia gwau: “Inai gau tamona dekenai oi be kerere: Guna be lau oi lalokau henia bada, to hari be lasi.” (Apok. 2:4) Unai ese ia hahedinaraia, momo be edia lalokau Iehova totona idia haboioa. Hereva momokani ita stadilaia matamaia neganai, Dirava bona iseda dekena taudia ita lalokau henia karana ia goada ia lao, bona unai dainai ita ura ita dibaia helaro matamatana be ma haida dekenai ita harorolaia. To, dahaka ese ita do ia durua iseda haroro gaukara do ita goadalaia bona guna ita hahedinaraia lalokauna do ia boio lasi totona?
2 Sibona Iseda Stadi Bona Hebou Lao Henia Karana: Hereva momokani ita stadilaia matamaia neganai, dahaka ese ita ia durua Dirava bona iseda dekena taudia ita lalokau henia totona? Iseda stadi karana amo Iehova ita dibaia neganai, unai ese ita ia durua. (1 Ioa. 4:16, 19) Unai dainai, iseda “lalokau be do ia bada lao noho” totona, namona be diba ma haida, ‘Dirava ena dobu gaudia’ do ita tahua noho.—Fili. 1:9-11; 1 Kor. 2:10.
3 Inai nega dokona ai, sibona iseda stadi karaia totona, sediual namona ita badinaia be ia auka, badina hekwakwanai bona lalona veria gaudia be momo. (2 Tim. 3:1) To, namona be nega ita atoa Baibel bona Baibel bukadia ita stadilaia totona. “Lohiabada ena Dina be kahirakahira do ia ginidae” dainai, hebou dekenai ita mai hanaihanai be mai anina bada.—Heb. 10:24, 25.
4 Haroro Gaukara: Haroro gaukara ita karaia goadagoada karana ese ita do ia durua, guna Dirava dekenai ita hahedinaraia lalokauna do ita haboioa lasi. Sivarai namona ita harorolaia neganai, Iehova ena gwauhamata namodia do ita laloatao, bona unai ese ita ia durua iseda helaro ita laloaboio lasi bona iseda lalokau do ia goada noho. Baibel ena hereva momokanidia be ma haida dekenai ita hadibaia dainai, namona be tahua gaukara ita karaia unai hereva ita lalopararalaia namonamo totona, bona unai ese iseda abidadama ia hagoadaia.—1 Tim. 4:15, 16.
5 Iehova ita lalokau henia bona matauraia be namo. (Apok. 4:11) Namona be unai oi laloaboio lasi. Namona be sibona emu Baibel stadi oi karaia, hebou dekenai oi mai hanaihanai bona oi laloa bada gaudia be ma haida dekenai oi harorolaia. Unai oi karaia neganai, guna oi hahedinaraia lalokauna be do ia goada noho.—Roma 10:10.