Mai Gari Lasi ida Sivarai Namona Harorolaia
1 Nega haida oi gari eiava hemarai dainai emu sikuli eiava gaukara gabuna dekenai emu abidadama oi gwauraia hedinarai lasi, a? Nega bona gabu idauidau ai emu varavara, dekena taudia, eiava oi diba lasi taudia haroro henia totona be ia auka, a? Dahaka ese ita do ia durua nega maorodia ai mai ‘gari lasi’ ida sivarai namona ita harorolaia totona?—Fili. 1:14.
2 Oi Gari Lasi: Bema haida ese emu turana eiava varavara idia samania koikoi, ia totona do oi hereva, a? Lagani handred momo lalonai, iseda turana namona Iehova, be taunimanima ese idia gwauraia dika. Ita abia hahenamo hereadaena be iseda Dirava badana ena ladana do ita gwauraia hedinarai! (Isa. 43:10-12) Iehova lalokau henia bada karana ese ita do ia durua hemarai eiava gari ita hanaia totona, bona mai gari lasi ida hereva momokani ita gwauraia hedinarai.—Kara 4:26, 29, 31.
3 Namona be ita laloatao, ita harorolaia herevana be sivarai namona. Taunimanima ese idia kamonai henia neganai, noho hanaihanai hahenamo do idia davaria. Namona be haroro gaukara ena namo ita laloa, to sibona eda namo eiava ita idia inai henia taudia edia hereva ita laloa momo lasi, unai ese ita do ia durua mai gari lasi ida ita haroro totona.
4 Ma Haida Edia Haheitalai: Mai gari lasi ida Dirava ena hereva idia gwauraia taudia edia haheitalai ese ita ia hagoadaia diba. Hegeregere, Enoka be mai gari lasi ida Dirava diba lasi taudia dekenai Iehova ena hahemaoro herevadia ia harorolaia. (Iuda 14, 15) Noa ena negai idia noho taudia be iena haroro herevana idia laloa bada lasi, to mai haheauka ida idia dekenai ia haroro. (Mat. 24:37-39) Keristani taudia ginigunadia be “sikuli bada lasi bona aonega bada lasi taudia,” bona herevana dagedage idia davaria, to edia haroro gaukara idia hadokoa lasi. (Kara 4:13, 18-20) Nega momo iseda magasin lalonai, iseda tadikaka edia sivarai idia noho, Iehova idia abidadama henia dainai taunimanima gari henia karana idia hanaia, bona haroro goadagoada taudia ai idia lao.
5 Dirava ena abidadama hesiai taudia idaunegai edia sivarai ita laloa neganai, unai ese ita do ia hagoadaia bada. (1 Kin. 19:2, 3; Mar. 14:66-71) ‘Dirava ese idia ia hagoadaia’ dainai mai gari lasi ida idia haroro. Ita danu be unai bamona ita karaia diba!—1 Tes. 2:2.