Henanadai Mauana

◼ Witnes taudia haida be sibodia edia orea maragidia idia karaia, unai amo tahua karana idia karaia Baibel ena hereva idia hamomokania totona. To, “hesiai tauna mai ena kamonai, bona mai ena kara maoromaoro” ese gwaumaoro ia henidia unai idia karaia totona, a?​​—Mat. 24:​45, 47.

Lasi, gwaumaoro idia henia lasi. To, tano haida ai, Witnes taudia haida be sibona edia orea idia karaia, unai amo tahua karana idia karaia Baibel ena hereva idia hamomokania totona. Haida be Heberu bona Greek gado idia stadilaia, unai amo idia ura hamomokania New World Translation be idia hahanaia maoro eiava lasi. Ma haida be saiens idia stadilaia, unai amo Baibel ese ia herevalaia gaudia idia hamomokania diba. Bona Internet Web sait ai edia lalohadai bona hepapahuahu herevadia idia hahedinaraia. Hebou haida idia karaia danu, unai amo edia tahua karana ai idia davaria gaudia idia herevalaia diba, bona buka bona magasin ai idia halasia, bena iseda kongrigeisen heboudia dekenai bona iseda buka amo ita dibaia gaudia dekenai idia ese hereva ma haida idia atoa kau.

Tanobada hegegemadai, Iehova ena orea taudia be kongrigeisen heboudia, hebouhebou badadia, bona Iena orea ese ia halasia buka bona magasin amo lauma aniani momo idia abia. Iehova be ena lauma helaga bona iena Hereva amo iena taunimanima ia durua mai lalotamona ida do idia gaukara hebou bona edia abidadama dekenai do idia gini goada totona. (1 Kor. 1:​10; Kol. 2:​6, 7) Inai nega dokona lalonai Iehova ese ita dekenai ia henia gaudia dainai, Ia ita tanikiu henia be namo. Unai dainai, “hesiai tauna mai ena kamonai, bona mai ena kara maoromaoro” be ma orea maragidia ese idia halasia bukadia, idia karaia heboudia, eiava edia Web sait amo idia halasia lalohadai dekenai gwaumaoro ia henia lasi sibodia edia tahua karana idia karaia totona.​​—Mat. 24:​45-​47.

Ita moale badina haida be edia diba idia gaukaralaia sivarai namona harorolaia gaukarana idia durua totona. To, namo lasi ita ura karaia gaudia be iseda nega bada ia abia dainai, Iesu Keriso ese tanobada dekenai ena kongrigeisen amo ia hagugurua gaudia ita laloaboio. Paulo be Keristani taudia ginigunadia ia haganidia nega bada idia haorea kava hepapahuahu bona “ladana tahua herevadia do idia hadokoa. Badina laloa inai bamona ese hepapahuahu sibona idia havaraia. To Dirava ena gaukara be abidadama dekena amo ia tubu noho.” (1 Tim. 1:​3-7) Unai dainai, namona be Keristani taudia ibounai idia hekwarahi ‘hepapahuahu kavakavadia, sene taudia edia ladana tahua, heai, bona Taravatu totona badu herevadia dekena amo do idia gini siri. Badina idia be anina lasi, bona tau ta idia durua lasi.’​​—Tito 3:9.

Idia ura tahua karana ma haida idia karaia taudia ai hagoadaia Insight on the Scriptures, “All Scripture Is Inspired of God and Beneficial,” bona Baibel buka Daniela, Isaia, bona Apokalupo idia herevalaia bukadia idia gaukaralaia be namo. Unai buka ese ita idia durua Baibel ita stadilaia bona ena hereva ita laloa dobu totona, unai amo Dirava be ena ‘Lauma Helaga ena diba bona diari ita dekenai do ia henia. Vadaeni Lohiabada ena ura hegeregerena do ita noho, bona nega ibounai ita ese ia do ita hamoalea. Iseda mauri ese kara namodia edia anina do idia havaraia, bona Dirava ena diba bona diari ese ita do idia hatubua daekau.’​​—Kol. 1:​9, 10.