Emu Famili be Hahemauri Totona Ia Hegaegae Noho, A?
1 Idia guguru vadaeni Baibel ena peroveta herevadia ese idia hahedinaraia inai tanobada dikana be kahirakahira do ia ore. Ita be metau dikadia momo negana lalonai ita noho, bona unai be Abata do lasi negana bamona. (Mat. 24:37-39) Dirava ese unai kara dika taudia ia hadikaia ore neganai, Noa ia roho mauri, badina “Dirava momokanina ida ia raka.” (Gen. 6:9, NW ) Reana, Noa be ena famili dekenai Iehova ena dala ia hadibaia dainai idia ibounai idia roho mauri. Edena dala ai ita be Noa ena kara ita tohotohoa diba, bona iseda famili ida inai tanobada dikana ena dokona amo ita roho mauri diba?
2 Kara Maoromaoro Harorolaia Tauna: Noa be mai haheauka ida lagani 40 ia lao 50 bamona lalonai “kara maoromaoro ia harorolaia.” (2 Pet. 2: 5) Noa ena dekena taudia be gwau-edeede anerudia ese idia biagua eiava lasi, to idia be Noa idia kirikirilaia. Haroro gaukara lalonai taunimanima be iseda haroro herevana idia ura lasi kamonai bona ita idia kirikirilaia, to unai ese ia hamomokania tanobada ena dokona be ia kahirakahira. (2 Pet. 3:3, 4) To, taunimanima momo be Noa ena negai idia noho taudia bamona lasi. Ita haroro neganai, idia be eda haroro herevana idia kamonai henia bona “idia haboua” Iehova idia tomadiho henia totona. (Isa. 2: 2) Bema ita haheauka, ‘ita bona ita dekenai idia kamonai taudia danu ese mauri do idia davaria.’ (1 Tim. 4:16) Tama sina be edia kara bona hereva amo natudia do idia hadibaia haroro gaukara be mai anina bada!— 2 Tim. 4: 2.
3 ‘Dirava Ena Hereva Ibounai Hegeregerena’ Ia Kara: Noa bona ena famili be Iehova ena hereva hegeregerena idia kara dainai idia roho mauri. (Gen. 6:22) Hari inai negai, ita ese Baibel bona hesiai tauna oreana amo idia mai hakaua herevadia ita kamonai henia be mai anina bada. (Roma 6:17) Natudia haida idia laloatao edia tamana be Iehova ena orea amo idia mai heduru herevadia ia gaukaralaia idia ia hadibaia totona. Hegeregere, wiki ta ta ibounai lalonai famili stadi ia karaia bona wikeni ai ena famili ia abia lao haroro gaukara totona. Ia hekwarahi wiki ta ta ai ena natuna ta ida ia haroro hebou. Edia tamana be ‘Dirava ena hereva ibounai hegeregerena’ ia kara dainai, unai ese idia ia hagoadaia bona idia bada neganai, idia ibounai siks be Iehova idia hesiai henia.
4 Inai nega ena dokona be do ia mai haraga. (Luka 12:40) Bema Noa ena kara ita tohotohoa bona ita abia dae momokani Iehova ese ita do ia hamauria, ita bona eda famili be ita hegaegae vadaeni!— Heb. 11: 7.