Stadi Taudia Hegaegaelaia Hahetoho Idia Haheaukalaia Totona
1 Haida be Baibel idia stadilaia bona ‘Dirava badinaia idia ura taudia’ ai idia lao neganai, Satani be ia gaukara goada idia ia dagedage henia totona. (2 Tim. 3:12) Idia be gaukara turadia, sikuli turadia, o dekena taudia amo hahetoho idia davaria diba. Danu, edia ruma bese korikori taudia ese idia dagedage henia neganai, unai be hahetoho badana.—Mat. 10:21; Mar. 3:21.
2 Ita Hadibadia Hahetoho Do Idia Vara: Namona be stadi taudia idia laloparara vaira neganai dagedage do idia davaria, bona unai ese ia hahedinaraia idia be Keriso ena hahediba taudia momokanidia. (Ioa. 15:20) Nega haida, taunimanima haida be lalohadai kererena idia abia dainai Iehova ena Witnes taudia idia dagedage henia. Namona be stadi taudia matamatadia idia laloatao, bema ta be Keriso ena hahediba tauna ai ia lao bona Dirava ia badinaia dainai dagedage ia davaria, unai tauna be ia moale bada. (Kara 5:27-29, 40, 41) Stadi taudia matamatadia oi hadibaia, Iehova be idia do ia durua. (Sal. 27:10; Mar. 10:29, 30) Iehova idia badinaia neganai, idia be Iehova ena kahana ai idia gini bona idia hahedinaraia Iehova be guba bona tanobada edia King badana.—Aon. 27:11.
3 Diba Maoromaorona Ena Gaukara: Emu stadi taudia oi hadibaia, herevana dahaka hahetoho idia davaria, to diba maoromaoro stadilaia karana idia hadokoa lasi be gau badana. Satani be dagedage amo idia ia koua idia dibaia gaudia be edia kudouna dekenai idia atoa lasi totona. (Aon. 4:23; Luka 8:13) Namona be Dirava ena Hereva amo diba maoromaorona idia abia noho, unai amo edia abidadama do ia goada.—Sal. 1:2, 3; Kol. 2:6, 7.
4 Idia Haheauka be Gau Badana: Hahetoho idia vara neganai, haheauka karana be mai anina bada bona unai ese anina namona ia havaraia diba. (Luka 21:16-19) Bema stadi taudia be hahetoho idia davaria bona idia haheaukalaia, unai ese idia bona ma haida ia durua. Hahetoho lalonai idia itaia Iehova be idia haheauka taudia ia hanamoa diba.—Iam. 1:12.
5 Aposetolo Paulo be ia moale bada badina Tesalonika kongrigeisen dekenai ena tadikaka be idia goada noho. Unai taudia totona Paulo be Iehova ia tanikiu henia—idia momo be Paulo ese ia durudia hereva momokani idia dibaia totona. (2 Tes. 1:3-5) Ita danu do ita moale bada bema iseda stadi taudia ita hegaegaelaidia hahetoho idia haheaukalaia totona.