Sekit Hebouhebou ese Ita Ia Durua Dirava Tura Henia Karana Ita Gimaia Totona
1. Edena dala ta amo Iehova be ita ia durua sivarai namona ita harorolaia guguru totona?
1 Sivarai namona ita harorolaia totona, Iehova be ita dekenai haroro herevadia bona haroro dalana ia hadibaia, bona ita dekenai goada ia henia. (Mat. 24:14; 2 Tim. 4:17) Lagani ta ta ena sekit hebouhebou amo unai bamona heduru ita abia. Lagani 2010 ena sekit hebouhebou ena sinado be, “Dirava Tura Henia Karana Gimaia,” unai be Roma 8:5 bona Iuda 17-19 amo idia abia.
2. (a) Edena dala ai sekit hebouhebou ese ita do ia durua? (b) Edena dala ai sekit hebouhebou gunadia ese emu haroro gaukara dalana idia hanamoa?
2 Ena Namo: Unai hebouhebou ese do ia hahedinaraia edena bamona gaudia be anina lasi bona mai anina bada gaudia karaia ena nega idia haorea kava. Kara dika ita abia dae lasi daladia do ita dibaia, bona Dirava ia tura henia namonamo tauna ena kara do ita dibaia danu. Sunday ai hereva toi ese do idia hahedinaraia, ita ta ta bona ruma bese taudia be edena dala ai hekwakwanai bona hahetoho lalonai eda Dirava tura henia karana ita hagoadaia diba. Inai hebouhebou ese ita do ia durua eda kudouna ita gimaia, lo Keristani taudia ai ita lao, bona Dirava tura henia karana idia gimaia namonamo taudia ese idia abia hahenamo idauidau ita naria totona.
3. Emu lalona oi hadaia dahaka do oi karaia totona?
3 Sekit hebouhebou ena nega bona gabu oi diba murinai, namona be palani oi karaia unai hebouhebou oi lao bona do idia henia herevadia oi kamonai namonamo. Namona be oi diba, Iehova be idia gaukara goada taudia ia hanamoa.—Aon. 21:5.
4. Lagani 2010 ena sekit hebouhebou amo dahaka heduru do ita abia?
4 Oibe, Iehova ese inai sekit hebouhebou namona be ita dekenai ia henia. Hesiai tauna mai ena kamonai oreana ese idia hegaegaelaia program ese ita do ia durua iseda haroro gaukara ita karaia noho totona. Iehova ita tanikiu henia, badina ia henia gaudia ese ita ia durua “iseda helaro gwauraia hedinarai karana ita dogoatao” totona.—Heb. 10:23-25, NW; Iam. 1:17.