Ruma Bese Sediual—Dina Ena Siri
1 Lalokau tama sina be dina ta ta ai idia hekwarahi edia natudia dekenai aniani namodia idia henia totona. To Dirava ena Hereva amo ia mai lauma aniani be idia dekenai oi henia be mai anina bada danu. (Mat. 4:4) Dala ta be emu natudia oi durua diba lauma aniani idia ura henia bona ‘hahemauri idia davaria’ totona, dina ta ta ai nega umui atoa ruma bese ida dina ena siri bona koment umui herevalaia totona. (1 Pet. 2:2) Unai oi karaia totona, emu ruma bese sediual ai edena nega be nega namona?
2 Aniani Negadiai: Daba ta ta ai dina ena siri herevalaia karana ese emu ruma bese ia durua diba dina ibounai Iehova umui laloa totona. (Sal. 16:8) Sina ta be inai bamona ia karaia, ena natuna mero be daba ena aniani ia ania lalonai, ia ida dina ena siri bona koment ia duahia bona ia herevalaia, bena ia guriguri murinai ena natuna be sikuli dekenai ia lao. Unai ese ena natuna mero ia hagoadaia bese abia isi karadia lalonai ia vareai lasi bona sihari kava karadia ia dadaraia totona, bona mai gari lasi ida stiuden bona tisa taudia dekenai ia haroro. Ena be unai sikuli dekenai ia sibona be Witnes merona, to ia mamia ia be sibona ia noho lasi.
3 Bema daba ai emu ruma bese ida dina siri umui herevalaia diba lasi, reana adorahi ena aniani umui do ania lasi neganai umui karaia diba. Danu unai nega ai haida be haroro gaukara ai idia davaria ekspiriens bona sibona edia Baibel duahiduahi ai idia davaria point namodia idia herevalaia. Momo idia gwau hanuaboi ai ruma bese ida idia aniani hebou negadia be moale negana.
4 Hanuaboi Ai: Ruma bese haida dekenai, nega namona be idia do mahuta lasi neganai dina ena siri idia herevalaia. Danu unai be nega namona umui guriguri hebou totona. Dina ta ta ai emui natudia be idia kamonai oi be Iehova oi herevalaia bona ia oi guriguri henia neganai, Iehova be edia turana korikorina ai ia lao diba.
5 Iehova ese emu hekwarahi do ia hanamoa, badina Dina Iboudiai Buka Helaga Tahua bukana umui gaukaralaia namonamo emui natudia dekenai hereva momokani umui hadibaia totona.
This is a repeat of article in km 5/05 taken from km-E 5/05 ”Family Schedule-The Daily Text”