Ma Haida Durua ‘mai Lalona Ibounai ida Idia Kamonai’ Totona
1 Iehova ese iseda tomadiho karana ia abia dae totona, gau badana be ia ita kamonai henia. (Deu. 12:28; 1 Pet. 1:14-16) Kahirakahira, Dirava ese ‘ia idia diba lasi taudia, bona sivarai namona idia abia dae lasi taudia’ do ia hahemaoro henia. (2 Tes. 1:8) Edena dala ai ma haida ita durua diba, ‘mai edia lalona ibounai danu Dirava ena hadibaia hereva idia kamonai henia’ totona?—Roma 6:17.
2 Abidadama Bona Lalokau Habadaia: Baibel ese kamonai bona abidadama karana ia gwauraia hebou. Aposetolo Paulo ia gwau “noho hanaihanai Diravana ena oda” be, taunimanima ese Ia idia “abidadama henia bona kamonai henia totona.” (Roma 16:26) Heberu karoa 11 ese ia herevalaia abidadama taudia momo be Iehova ena ura idia badinaia bona karaia. (Heb. 11:7, 8, 17) To danu, Baibel ese kamonai lasi bona abidadama lasi karana ia gwauraia hebou. (Ioa. 3:36; Heb. 3:18, 19) Namona be Baibel gaukaralaia namonamo karana ita dibaia, unai amo ma haida ita durua Dirava idia abidadama henia, bena kamonai karana do idia hahedinaraia.—2 Tim. 2:15; Iam. 2:14, 17.
3 Baibel ese kamonai bona Dirava lalokau henia karana ia gwauraia hebou danu. (Deu. 5:10; 11:1, 22; 30:16) Ioane Ginigunana 5:3 ia gwau: “Dirava ita lalokau henia ena anina be inai: Dirava ena taravatu do ita badinaia. Iena taravatu be metau lasi.” Edena dala ai eda stadi taudia ita durua diba Iehova idia lalokau henia noho totona? Dala oi tahua Iehova ena kara idauidau idia laloa bada karana oi herevalaia totona. Oi ese Iehova oi laloa bada karana oi gwauraia. Stadi tauna oi durua Iehova hetura henia noho karana ia laloa totona. Gau badana be inai: Iehova lalokau henia karana ese ma haida—ita danu—do ia durua mai eda kudouna ibounai ida Ia ita kamonai henia totona.—Mat. 22:37.
4 Iseda Haheitalai Amo: Iseda haheitalai be mai anina bada, badina unai amo ma haida ita durua diba sivarai namona idia badinaia totona. To, namona be hanaihanai ita hekwarahi “kamonai kudouna” ita abia totona. (1 Kin. 3:9; Aon. 4:23; NW ) Unai ena anina be dahaka? Hanaihanai Baibel oi stadilaia bona hebou lao henia karana amo emu kudouna oi ubua bamona. (Sal. 1:1, 2; Heb. 10:24, 25) Mai edia kudouna ibounai ida tomadiho momokani idia badinaia taudia edia hebamo karana oi tahua. (Aon. 13:20) Oi haroro hanaihanai bona mai emu kudouna ibounai ida emu teritori dekenai idia noho taudia oi durua. Iehova oi guriguri henia, oi ia durua lalohadai namona oi abia totona. (Sal. 86:11) Emu kudouna idia hamiroa diba gaudia hegeregere, matabodaga o dagedage laulaudia o miusiki oi dadaraia. Dirava kahirakahira dekenai oi idia hakaua lao bona ia oi tura henia karana idia hagoadaia gaudia oi tahua.—Iam. 4:7, 8.
5 Idaunegai, Iehova ese Israela taudia ia hamaoroa, bema Ia idia kamonai henia, hahenamo do idia davaria. (Deu. 28:1, 2) Hari inai negai danu, Iehova ese ia idia “kamonai henia taudia” ia hanamodia bada noho. (Kara 5:32) Unai dainai, iseda hadibaia karana bona haheitalai amo, ma haida ita durua ‘mai lalona ibounai ida idia kamonai’ totona.
[Study Questions]
1. Iehova ia ura ia idia tomadiho henia taudia ese dahaka idia karaia be namo?
2. Dahaka dainai ma haida ita durua edia abidadama idia hagoadaia noho totona?
3. (a) Edena dala ai kamonai bona lalokau karana ia gwauraia hebou? (b) Edena dala ai eda stadi taudia ita durua diba Iehova idia lalokau henia noho totona?
4. (a) Dahaka dainai iseda haheitalai be mai anina bada? (b) Dahaka ita karaia be namo “kamonai kudouna” ita abia totona?
5. Iehova ese kamonai taudia be edena bamona ia hanamodia?
This is a repeat of article in km 9/05 taken from km-E 9/05 ’Help Others to Become ”Obedient From the Heart.”’