Henanadai Mauana
◼ Edena dala idauidau ai painia taudia ita durudia diba?
Tanobada hegegemadai, hesiai laganina 2009 ai, kahirakahira tadikaka bona taihu 800,000 be regula bona spesel painia gaukarana idia karaia. Unai ful-taim hesiai taudia ese edia nega, goada, bona kohu idia gaukaralaia Basileia ena sivarai namona idia harorolaia totona. (Aon. 3:9) Iehova be edia hekwarahi dainai ia moale bada! Edena dala ai Iehova ena lalohadai ita hahedinaraia diba bona painia taudia ita durua edia painia gaukara idia moalelaia bona idia haheaukalaia totona?
Ita gwauraia hereva maorodia ese idia do ia hagoadaia edia painia gaukara idia karaia noho totona. (Aon. 25:11) Iseda wiki ena sediual ita haidaua bona idia ida ita haroro diba, a? Idia ida ita gaukara hebou neganai, reana edia basi davana ita karaia diba. Eiava bema painia taudia edia motuka dekenai ita guia, reana idia dekenai heduru moni sisina ita henia diba. (1 Kor. 13:5; Fili. 2:4) Idia ita durua dalana ta be idia dekenai heabidae karana ita hahedinaraia, hegeregere nega ta ta ai eda ruma dekenai idia ita boiria aniani totona.—1 Pet. 4:8, 9.
Baibel ese ia hahedinaraia Iehova be ena Basileia idia tahua guna taudia dekenai edia dabu gaudia do ia henia. (Sal. 37:25; Mat. 6:33) Dala ta be iseda lalokau Keristani tadikaka amo unai bamona ia karaia. (1 Ioa. 3:16-18) Oibe, painia taudia idia laloa lasi ma haida ese moni dalanai idia do idia durua. Bona idia dabu neganai, ma haida do idia hadibaia lasi. To, namona be ita gima noho bona ita itaia, edena dala idauidau ai unai painia taudia ita durudia bona edia ‘dabu gaudia do ita henia.’—2 Kor. 8:14, 15, NW.
Idaunegai Kenekrea kongrigeisen dekenai, Fibi, hesiai gaukara ia goadalaia hahinena, be Roma dekenai ia lao neganai, Paulo ese Roma tadikaka ia hagoadaia, ia gwau: “Lohiabada dainai Fibi do umui abia dae, Dirava ena taudia ta ta dekenai edia abia dae kara hegeregerena. Iena gaukara dekenai umui durua.” (Roma 16:1, 2) Dala ia noho iseda kongrigeisen lalonai idia noho regula bona spesel painia taudia ita durudia totona, unai amo sivarai namona harorolaia gaukarana do idia hadokoa lasi.—Kara 5:42.