Witnes Lasi Adavana ta Oi Durua Diba, A?
1 Emu kongrigeisen ai pablisa ta ena adavana be hereva momokani ia diba lasi, a? Bema oibe, reana unai pablisa ia ura ena adavana danu be tomadiho momokani lalonai ia noho. To, unai pablisa sibona lasi. Kongrigeisen taudia ibounai ese Dirava ena ura idia abia be namo—Dirava ia ura “taunimanima ibounai ese mauri do idia davaria, bona hereva momokani do idia diba.” (1 Tim. 2:4) Bema eda kongrigeisen ai unai bamona pablisa ta ia noho, vadaeni ena adavana be edena dala ai ita durua diba?
2 Dala ginigunana be, hereva momokani idia diba lasi taudia edia lalohadai ita lalopararalaia guna be namo. Idia momo be edia ruma bese idia lalokau henia, bona idia hekwarahi edia adavana idia durua bona tama eiava sina ena maduna idia huaia. Reana idia abia dae gaudia haida be iseda amo ia idau. Eiava Iehova ena Witnes taudia edia sivarai sisina idia diba, to edia turadia edia koikoi herevadia idia abia dae. Haida be idia badu badina edia Witnes adavadia ese edia nega bada be tomadiho totona idia gaukaralaia, to guna unai nega be ruma bese totona idia gaukaralaia. Unai gaudia ita lalopararalaia neganai, unai ese ita do ia durua hereva momokani ia diba lasi tauna o hahine ita kara namo henia, matauraia, bona tura henia.—Aon. 16:20-23.
3 Ta Ena Namo Laloa Bada: Witnes lasi adavana ese hereva momokani ia abia dae totona, gau ginigunana be, Baibel ita herevalaia sibona lasi, to iseda kara namodia ita hahedinaraia. (1 Pet. 3:1, 2) Gau badana be ita hahedinaraia ita be edia namo ita laloa bada. Kongrigeisen ai, taihu ese Witnes lasi hahine idia durua dalana idia laloa diba, bona tadikaka danu be Witnes lasi tauna dekenai unai bamona idia karaia diba. Edena dala ai?
4 Bema oi be pablisa ta ena adavana oi do hedavari henia lasi, reana pablisa oi nanadaia guna, bena ena adavana oi vadivadi henia diba. Bema unai Witnes lasi adavana be oi ia abia dae lasi, oi lalohisihisi lasi. Iseda kara namona bona ena namo ita laloa bada karana ese ia do ia durua Iehova ena Witnes taudia ia abia dae totona. (Roma 12:20) Lo Keristani taudia haida be pablisa ena Witnes lasi adavana bona ena ruma bese idia boiria edia ruma dekenai idia aniani hebou totona, unai dala amo ia idia diba namonamo bona Iehova ena Witnes taudia ia abia dae diba. Idia ese Witnes lasi adavana idia doria lasi Baibel idia herevalaia totona, to ia abia dae gaudia idia herevalaia. Gabeai, bema idia itaia Witnes lasi adavana idia hereva henia be auka lasi, vadaeni Baibel gaudia idia herevalaia diba. Eiava reana kongrigeisen ai haida ia diba vadaeni dainai, ia ura eda hebou dekenai ia mai, unai amo do ia itaia ena adavana be dahaka ia dibaia. Ena be Baibel stadi ia do abia dae lasi, to ena pablisa adavana ia durua dainai ia ita hanamoa diba.
5 Elda taudia ese Witnes lasi adavadia idia durua be namo bona idia hegaegae idia haroro henidia totona. Reana Witnes lasi adavana ta be ia ura lasi Baibel ena hereva ia kamonai, to hospital ai ia noho o hekwakwanai badana ta ia davaria neganai, do ia ura Baibel amo hagoadaia herevadia ia kamonai. Bema tomadiho dalanai ia parara ruma bese ta be hekwakwanai ta ia davaria, hegeregere famili tauna ta ia mase, elda taudia be unai ruma bese idia hagoadaia neganai, Witnes lasi adavana idia boiria danu be namo.
6 Mani oi laloa, iseda kongrigeisen lalonai ia noho pablisa tauna be do ia moale bada bema ena Witnes lasi adavana be hereva momokani ia abia dae bona orea lalonai ia vareai! Unai bamona ia vara neganai, Iehova, aneru, bona kongrigeisen taudia idia moale bada danu. (Luka 15:7, 10) To, bema Witnes lasi adavana be ia kamonai, to kara ta ia karaia lasi, namona be ita moale noho badina iseda gaukara ese Iehova ia hamoalea, ia be “ia ura lasi tau ta ia mase, to ia ura taunimanima ibounai idia helalo-kerehai.”—2 Pet. 3:9, NW.
[Study Questions]
1. Dahaka dainai pablisa sibona lasi, to ita ibounai ese ena adavana ita durua hereva momokani ia abia dae totona?
2. Dahaka gaudia ita lalopararalaia karana amo Witnes lasi adavana ita durua diba?
3. Edena dala ai Witnes lasi adavana ta ita durua hereva momokani ia abia dae totona?
4. Edena dala ai ita hahedinaraia ita be ma haida edia namo ita laloa bada?
5. Edena dala ai elda taudia ese Witnes lasi adavana ta idia durua diba?
6. Dahaka badina idauidau dainai Witnes lasi adavadia ita durudia be namo?
[Blurb on page 6]
Witnes lasi adavana ese hereva momokani ia abia dae totona, gau ginigunana be, Baibel ita herevalaia sibona lasi, to iseda kara namodia ita hahedinaraia