Nega Matamata Baibel Ena Kahana Haida​—Kahana 3

Baibel Herevadia Edia Indeks: Nega Matamata Baibel ena murina kahanai, “Baibel Herevadia Edia Indeks” ia noho. Unuseniai Baibel ena mai anina bada herevadia tausen momo, bona edia badina herevadia idia noho danu. Ia be konkodens ta bamona, unuseniai hereva idauidau momo idia noho. Unai indeks ia noho dainai, ita ia durua hahediba hereva badadia hegeregere, “toreisi lou” o “mauri davana” idia herevalaia siridia ita davaria, bona Baibel amo edia anina ita stadilaia namonamo diba. Bema haida ese pablisa ta dekenai unai bamona hereva ta idia henanadailaia, ia ese konkodens ai idia noho hereva kwadogidia ia gaukaralaia diba. Danu, lista ai Baibel ese ia sivarailaia taudia edia ladana bona gabu ladadia idia noho. Unai dainai inai Baibel idia gaukaralaia Baibel stiuden taudia ibounai ese inai kahana amo heduru bada do idia abia.

Bema ta ida Baibel umui herevalaia bona siri ta oi laloaboio, emu Baibel ena murina kahanai, “Baibel Herevadia Edia Indeks” oi kehoa bona unai siri oi davaria diba.

Hegeregere, haroro gaukara lalonai, Sabati ia abia dae tauna ta oi davaria. Unai siri oi laloatao diba lasi, to ena hereva, “umui ese dina, . . . umui badinaia goadagoada” oi laloatao. Hereva badana ta, hegeregere “badinaia” oi abia hidi bona “Baibel Herevadia Edia Indeks” ai unai hereva oi tahua (unai hereva be rau 513 ai ia noho). Inai hereva “badinaia” henunai idia noho siridia oi itaia neganai, inai siri “Ga 4:10 Umui ese dina, umui b. goadagoada” do oi itaia. Oi tahua sirina, Galatia 4:10 oi davaria unai. Nega haida unai hereva badana henunai oi laloa sirina do oi davaria lasi, unai dainai hereva ma haida dekenai unai oi tahua.

Siri edia badinai toretore koremana ia noho, hegeregere Galatia 4:10 ai leta “b.” mai ena fulstop ia noho, unai be hereva ta ena leta. Unai dainai bema leta “b.” oi itaia, anina be inai hereva “badinaia” oi gwauraia. Ataiai ia noho haheitalai be inai bamona do oi duahia, “umui ese dina, umui badinaia goadagoada.”

Ai diba, “Baibel Herevadia Edia Indeks” ese emu haroro gaukara lalonai oi do ia durua bada.

This article is unique to PNG