Hamatamaia Hereva Namodia Hegaegaelaia Daladia
1. Dahaka dainai hamatamaia hereva namodia ita gwauraia be mai anina bada?
1 Ta be aniani ena mamina namona ia mamia neganai, ia ura unai aniani ma haida ia ania. Unai hegeregerena, hamatamaia hereva namona ta ese dala ia kehoa Baibel ita herevalaia totona. Herevana hamatamaia herevadia edia lata bona anina be idauidau, to aniani ita karaia bamona, hanaihanai ita hegaegae bona laloa namonamo guna be namo. (Aon. 15:28) Edena dala ai hamatamaia hereva namodia ita hegaegaelaia?
2. Edena dala ai hamatamaia herevana ta ita hegaegaelaia?
2 Topik Namodia Abia Hidi: Hamatamaia herevadia dainai ruma taudia do idia kamonai o idia hesiku diba. Unai dainai, emu haroro herevana oi hegaegaelaia neganai, ruma tauna ese ia laloa bada gauna oi laloa be namo. Taunimanima idia ura gavamani namona ia gini, famili maurina ia namo, eiava tuari ia ore, a? Nega momo taunimanima idia ura edia lalohadai idia gwauraia dainai, henanadai namona ta oi hegaegaelaia. Iseda Basileia Gaukara ai idia noho hamatamaia hereva ta oi gaukaralaia diba, o taunimanima edia noho dalana hegeregerena oi haidaua, a? Nega haida emu Ruma Bese ena Tomadiho lalonai haroro ena hamatamaia herevadia haida umui praktislaia, a?
3. Edena dala ai taunimanima edia mauri dalana hegeregerena eda hamatamaia hereva ita gwauraia?
3 Taunimanima Edia Mauri Dalana Laloa: Teritori haida ai, ruma taudia idia ura eda hamatamaia herevana dekenai ita vadivadi ena badina ita gwauraia. Teritori ma haida ai, bema ita ese hamatamaia hereva dekenai ruma tauna ena ladana, hanua, mauri, o unai bamona gauna ta ita henanadailaia lasi, unai be hemataurai karana lasi. Ma teritori haida ai, taunimanima be mai edia dubu dainai, iseda hamatamaia hereva lalonai Baibel ita herevalaia be auka lasi. (Kara 2:14-17) To, teritori ma haida ai idia noho taudia be dubu idia lao lasi o tomadiho idia laloa bada lasi dainai, eda haroro ginigunana dekenai Baibel ita herevalaia lasi, to lou henia neganai Baibel ita herevalaia diba.—Kara 17:22-31.
4. Eda hamatamaia hereva ita gwauraia totona dahaka ita karaia be namo?
4 Hamatamaia Herevadia: Ita hegaegae namonamo. Eda hereva idia kwadogi be namo. Danu, ita hahedinaraia do ita herevalaia gauna ita ura henia. Ita kiri, unai amo ita hahedinaraia ruma tauna ita laloa bada. Unai dala namodia bona hamatamaia herevadia ita hegaegaelaia neganai, kamonai taudia do ita hagoadaia “Iehova ena pata” dekenai idia aniani totona.—1 Kor. 10:21.