“Baibel amo Dahaka Do Ita Dibaia?”—Buklet amo Herevahereva Hamatamaia
1. Haroro totona edena tulu matamata ita abia?
1 “Dirava Ena Basileia Tahua Guna!” rijinol hebouhebouna ai, buklet ta ladana, “Baibel amo Dahaka Do Ita Dibaia?” idia halasia. Haroro herevana ita hegaegaelaia neganai, edena dala ai unai tulu matamata ita gaukaralaia diba? Unai buklet be mai ena Baibel topik idauidau bona henunai be siri idia noho, ia be Herevalaia bukana bamona ita gaukaralaia diba herevahereva hamatamaia totona.
2. Edena dala ai buklet be haroro ai ita gaukaralaia?
2 Reana henanadai 8 oi gaukaralaia bona oi gwau: “Ai be dekena taudia ai vadivadi henia, badina momo idia daradara, ‘Dirava ese taunimanima ia panisia, a?’ [Teritori haida ai, ruma tauna dekenai henanadai ita hahedinaraia be mai ena namo.] Dahaka oi laloa? [Haere naria.] Baibel ese unai henanadai ia haerelaia.” Buklet ai idia noho siri ta o rua be Baibel amo umui duahia bona herevalaia. Bema ruma tauna ia kamonai namonamo, vadaeni rau 1 ai idia noho henanadai 20 oi hahedinaraia bona oi noia ta ia abia hidi, gabeai umui herevalaia totona. Eiava umui herevalaia topik ena stadi pablikeisen ta oi henia.
3. Dubu idia lao lasi o Dirava idia laloa bada lasi taudia ita davaria neganai, edena dala ai buklet amo herevahereva ita hamatamaia?
3 Dubu idia lao lasi o Dirava idia laloa bada lasi taudia oi davaria neganai, henanadai 4 bona henanadai 13-17 oi gaukaralaia diba. Hegeregere, reana henanadai 17 do oi gaukaralaia bena oi gwau: “Ai be famili ta ta ai vadivadi henia. Hari, famili momo be hekwakwanai idauidau idia davaria, ani? [Haere naria.] Headava taudia momo be inai aonega herevadia ese ia durua, ia gwau: ‘Hahine ese iena tau do ia matauraia bada be namo.’ [Oi gwau lasi, inai be Efeso 5:33 ena hereva. Bema hahine ta oi hereva henia, reana Efeso 5:28 oi herevalaia diba.] Oi laloa unai sisiba badinaia karana ese headava do ia hanamoa, a?”
4. Dubu ia lao lasi o Dirava ia laloa bada lasi tauna ida oi herevahereva murinai, dahaka oi karaia diba?
4 Emu hereva dokonai, dala oi karaia nega ma ta umui herevahereva totona. Reana oi gaukaralaia henanadai ena siri ma ta oi herevalaia. Nega maorona ai, ruma tauna oi hadibaia umui herevalaia gaudia be Baibel ai idia noho. Guna umui herevalaia gaudia bona ruma tauna ena lalohadai Baibel dekenai oi dibaia dainai, do ia moalelaia pablikeisen ta oi rakatania.—December 2013 Iseda Basileia Gaukara lalonai idia udaia pepana itaia.