Haroro ai Nega Gaukaralaia Namonamo
Hesiai laganina 2014 ai, Iehova ena Witnes taudia be haroro gaukara ai hora 1,945,487,604 idia gaukaralaia, unai ese ia hamomokania ita be mai lalona ibounai ida Iehova hesiai henia gaukarana dekenai ita bisi! (Sal. 110:3; 1 Kor. 15:58) ‘Nega be kwadogi’ dainai, haroro ai eda nega ita gaukaralaia namonamo momo ita haroro henia totona.—1 Kor. 7:29.
Haroro ai nega ita gaukaralaia namonamo totona, eda haroro daladia do ita haidaua. Hegeregere, hanaihanai hora ta o rua oi haroro, to ta oi hereva henia lasi, edena dala ai haroro dalana oi haidaua unai amo taunimanima momo do oi haroro henia? Gabu ta ta ai taunimanima edia noho daladia be idauidau. To, henunai idia noho heduru daladia ese oi do idia durua nega oi gaukaralaia namonamo, unai amo oi be “hodahoda ia paisia kava tauna bamona” lasi.—1 Kor. 9:26.
Ruma-Ta-Ruma-Ta Haroro Gaukara: Lagani momo lalodiai, pablisa be daba ai ruma-ta-ruma-ta haroro gaukara idia karaia. To, dina ai momo be moni gaukara idia karaia dainai, ruma ai ita davaria lasi. Unai dainai, adorahi ai ruma-ta-ruma-ta ita karaia toho neganai reana momo do ita davaria. To, daba kahanai dala o bisinesi gabudiai ita haroro be mai ena namo.
Pablik Gabudiai Haroro: Kongrigeisen ena teritori lalodiai, hutuma idia lao mai gabudia ai teibolo o troli idia atoa be namo. (July 2013 Iseda Basileia Gaukara pepana ena rau 5 itaia.) Bema Kongrigeisen Hesiai Komiti ese ia abia hidi pablik gabuna ai taunimanima be momo lasi, vadaeni pablik gabuna ma ta dekenai troli o teibolo ita atoa diba.
Lou Henia Bona Baibel Stadi: Haroro daladia ma haida ese anina namona idia havaraia lasi neganai, lou henia bona Baibel stadi oi karaia diba, a? Hegeregere, bema Saturday daba ai ruma-ta-ruma-ta haroro gaukara ai momo ita davaria, vadaeni eda Baibel stadi be adorahi ai ita karaia diba. Pablisa be lou henia idia karaia neganai, namona be palani idia karaia teritori ai idia noho lou henia o stadi be nega tamona idia itaia, unai amo edia haroro gaukara idia habadaia.
Momokani, haroro ai eda nega ita gaukaralaia namonamo neganai, ita moale. To, eda gaukara ese anina namona ia havaraia neganai, ita moale bada. Bema haroro daladia ta oi gaukaralaia to anina namona ia vara lasi, vadaeni unai nega ai haroro dalana ma ta ita tohoa diba. Namona be “gogoa gaukara ena Biaguna,” Iehova ita noia ita ia hakaua haroro ai eda nega do ita gaukaralaia namonamo totona!—Mat. 9:38.