KERISTANI TAUDIA EDIA MAURI DALANA

Wiki Ena Hebou ena Kahana Matamata

January 2018 ia matamaia neganai, wiki ena hebou lalonai kahana matamata do ia noho. Unai be stadi nouti bona iseda web sait ai ia noho New World Translation of the Holy Scriptures (nwtsty) ena stadi kahana. Herevana emui gado ai ia noho lasi to umui gaukaralaia diba. Inai kahana matamatana ese ita do ia durua hebou totona do ita hegaegae namonamo. To mai anina bada gauna be, unai kahana matamata ese iseda lalokau Tamana Iehova kahirakahira ia hakaua lao!

STADI NOUTI

Stadi nouti ena kahana ese Baibel ai idia noho tanodia edia kastom dalana, noho gabuna ena toana bona gado edia anina do ia herevalaia.

Mataio 12:20

Lamepa ena wiki mai kwalahuna: Ruma momo ai idia gaukaralaia lamepa maragina ena kavabu lalonai be olive oela idia gaukaralaia. Dabua maragina ta o wiki be kavabu amo oela ia abia unai amo lahi ia hururu diba. Grik gado ai inai hereva, “lamepa ena wiki mai kwalahuna” ese reana ia hahedinaraia, wiki ena lahi ia hururu sisina o ia bodo to ena gida ia noho dainai kwalahu sibona ia daekau. Isaia 42:3 ese Iesu ena hebogahisi karana ia peroveta; ia ese manau bona lalomanoka taudia edia helaro ena diari do ia habodoa lasi.

Mataio 26:13

Momokani: Grik herevana a men’, be Heberu gado herevana ‘a men amo idia abia, ena anina be “momokani” o “unai bamona do ia vara.” Iesu be ena hereva ia hamatamaia neganai, unai hereva ia gaukaralaia momo, unai ese ena gwauhamata o peroveta herevana ta ia hamomokania bona ia gwauraia herevadia be momokani bona do idia guguru. Iesu ese inai hereva “momokani,” o amen ia gaukaralaia amo ia hahedinaraia, toretore helagadia lalonai unai be mai anina bada. Ioane ena Evanelia bukana ai, Iesu ese inai hereva “momokani” ia gaukaralaia momo, unai ese ia hahedinaraia ia gwauraia herevana be momokani bona do ia hagugurua.—⁠Ioa 1:51.

LAULAU BONA VIDIO

Laulau bona vidio idauidau ese Baibel ai idia noho sivaraidia idia haheitalaia.

Ierusalema bona Olive Ororona, Betepage

Inai vidio kwadogina ese, Ierusalema dekenai lao ena dala ist kahana amo ia hahedinaraia, hari idia gwauraia hanua et-Tur—⁠Baibel negadia idia gwauraia Betepage amo—⁠bona unai gabu ai ena ororo be bada Olive Ororona ena dala ai ia hedinarai. Betania be Betepage ena ist kahanai ia noho, unai be Olive Ororona ena ist kahana. Unai negai, Ierusalema ai, Iesu bona ena hahediba taudia be Betania ai idia mahuta, hari idia gwauraia el-ʽAzariyeh (El ʽEizariya ) taoni, Arabic gado ai unai hereva ena anina be “Lasaro ena Gabu.” Iesu be Mata, Maria, bona Lasaro edia ruma ai ia noho. (Mt 21:17; Mr 11:11; Lu 21:37; Ioa 11:1) Iesu be edia ruma amo ia ura lao Ierusalema neganai, reana vidio ai ita itaia dalana ia badinaia. Nisan 9, 33 C.E. ai, Iesu be doniki ta latanai ia guia bena Olive Ororo amo ia lao Ierusalema dekenai ia hanaia, ia be reana Betepage amo Ierusalema lao henia dalana ia badinaia.

Betania amo ia lao Betepage ena dala
Betepage
Olive Ororona
Kiderona Kourana
Dubu Helaga Ororona

Aena Geduna Turiana ai Ia Noho Ikoko

Inai laulau o foto be taunimanima ta ena aena ai, auri ikoko idia kokoa bona unai ikoko ena lata be sentimita 11.5 bamona. Unai aena turia bona ikoko be lagani 1968 ai idia davaria bona ia be Roma taudia edia nega ai idia guria. Akioleji taudia be Ierusalema ena not kahanai, tahua gaukara karaia totona tano idia geia neganai unai idia davaria. Inai ikoko ena toana be idau nega ai Roma taudia ese Iesu Keriso be au dekenai idia kokoa kau neganai, unai bamona ikoko idia gaukaralaia. Unai ikoko bona turia be maua ta ladana ossuary lalonai idia davaria, unai maua lalonai mase taudia edia turia kakorodia idia udaia. Unai ese ia hahedinaraia ta be au dekenai idia kokoa kau bena ia mase neganai, ena tauanina idia kokia bona idia guria.—⁠Mt 27:35.