Kara Goeva Bona Hemataurai Bada Karana ese Ta Ena Kudouna Ia Hamarerea Diba

Keristani hahine be edia kara namodia dainai edia tau idia durua hereva momokani idia abia dae totona. To unai be mai ena hekwarahi badina lagani momo lalonai hekwakwanai momo idia haheaukalaia. (1Pe 2:21-23; 3:1, 2) To Bema dagedage oi davaria noho, namona be kara namodia amo dika oi halusia noho. (Ro 12:21) Reana emu tau dekenai Iehova oi herevalaia to ia kamonai lasi, to emu haheitalai namona ia itaia neganai hereva momokani dekenai lalohadai maorona ia abia diba.

Namona be emu adavana ena lalohadai oi dibaia danu. (Fp 2:3, 4) Namona be hebogahisi oi hahedinaraia bona oi gaukara goada mai hemataurai ida emu maduna oi huaia namonamo totona. Kamonai karana oi hahedinaraia. (Ia 1:19) Oi haheauka, bona emu adavana oi hamaoroa ia oi lalokau henia. Ena be emu adavana ese oi dekenai unai bamona kara namo bona hemataurai ia hahedinaraia lasi, to oi moale, badina oi diba momokani Iehova ese oi karaia karadia ia laloa bada.​—1Pe 2:19, 20.

VIDIO LADANA, IEHOVA BE AI IA DURUA EMAI METAU AI HUAIA TOTONA ITAIA, BENA INAI HENANADAI HAERELAIA:

• Matamanai Grace Li ena headava maurina be edena bamona?

• Dahaka ese ena lalona ia veria Baibel ena hereva momokani ia abia dae totona?

• Edena dala ai Taihu Li be ia bapatiso murinai hekwakwanai ia haheaukalaia?

• Taihu Li be ena tau totona dahaka ia gurigurilaia?

• Taihu Li be ena kara goeva bona hemataurai bada karana dainai dahaka hahenamo ia moalelaia?