Haroro Herevadia Gaukaralaia Dalana

January 2018 amo, Iseda Haroro Bona Mauri Dalana​—Hebou Pepana ena vaira kahana ai haroro herevadia idia atoa matamaia. Edena dala ai ita gaukaralaia diba?

Stiuden Asainmen Oi Abia Neganai: Namona be haroro herevadia ena henanadai, siri, bona lou henia ena kahana oi gaukaralaia. To unai ese ia hahedinaraia lasi, haroro herevadia ena vidio ai oi kamonai herevadia ibounai oi tohotohoa. Reana karaia dalana bona hamatamaia hereva idauna eiava lalohadai ma ta oi gaukaralaia diba. Bona iseda Hadibaia Gaukara Ena Tulu Idauidau amo pablikeisen ta oi hariharilaia diba, herevana emu kahana ai unai idia herevalaia lasi.

Haroro Gaukara ai: Haroro herevadia be haheitalai (example) sibona ita idia durua totona. Bema ruma tauna ia ura diba ma haida ia abia, reana lou henia ena kahana ai ia noho henanadai bona siri oi gaukaralaia diba. Reana idia atoa haroro herevadia oi senisia eiava dala ma ta ai oi gaukaralaia diba. Hua gunanai, haroro herevadia ena kahana ai idia gaukaralaia topik ta eiava siri idauna ma ta be emu teritori ai idia noho taudia edia lalona do ia veria, a? Oi noho gabuna ai taunimanima be idia vara gaudia eiava nius ai idia kamonai o itaia gaudia idia laloa bada, a? Ena be edena haroro herevana oi gaukaralaia, gau badana be ‘sivarai namona totona gau ibounai oi karaia, unai amo ma haida dekenai sivarai namona oi harorolaia diba.’​—1Ko 9:22, 23.