Duahia Taudia Edia Henanadai

June 2020 ena Gima Kohorona ai, atikol ladana “Ibounai ese Oiemu Ladana Do Idia Hahelagaia” ese edena dala ai Iehova ena ladana bona ena lohia siahuna ita abia dae dalana ia hahedinaraia?

Unai atikol amo ita dibaia gauna be taunimanima bona aneru ese mai anina bada herevana ta idia laloa be namo. Unai be Iehova ena ladana hahelagaia karana. Iehova ena ladana hahelagaia karana dekenai, Iehova ena lohia dalana be maoro herevana be mai anina bada. Danu, Iehova ena ladana hahelagaia karana dekenai, taunimanima ese Dirava idia badinaia eiava lasi be mai anina bada.   

Dahaka dainai ita gwau hepapahuahu bada lalonai, Iehova ena ladana ita abia isi bona ita hahelagaia karana be mai anina bada? Mani badina toi ita herevalaia:

(1) Eden umana lalonai Satani ese Iehova ena ladana bona ena kara ia gwauraia dika. Satani be mai koikoi ida Heva ia nanadaia bona ia hahedinaraia toana be Dirava be mataganigani tauna bona ia henia hakaua herevana be maoro lasi. Bena Satani ese Iehova ena hereva ia mogea, bona ia hahedinaraia Iehova be koikoi tauna. Unai amo ia be Dirava ena ladana ia hadikaia. Unai nega ai ia be “Diabolo” ai ia lao, unai hereva anina be “ladana hadikaia tauna.” (Ioa. 8:44) Heva be Satani ena koikoi herevana ia abia dae, Dirava ena taravatu ia utua bona ena lohia siahuna ia gwau-edeede henia. (Gen. 3:1-6) Unai nega amo ema bona hari, Satani be koikoi herevadia amo Dirava ena ladana bona ena kara ia hadikaia noho. Unai koikoi herevadia idia abia dae taudia be Iehova do idia badinaia lasi. Dirava ena taunimanima idia abia dae, Iehova ena ladana helagana gwauraia dika karana be kara dika badana. Unai kara dainai, tanobada ai hisihisi bona kara dika idia vara.

(2) Taunimanima bona aneru edia namo totona, Iehova be iena ladana do ia abia isi bona Satani ena koikoi herevadia do ia hamaoromaoroa. Iehova be unai ia laloa bada, ia gwau: “Lau ese egu ladana hereadaena do lau hahelagaia.” (Ese. 36:23) Bona Iesu ia gwau Iehova ena hesiai taudia ibounai ese edia guriguri lalonai unai idia gwauraia be gau badana. Ia gwau: “Namona be ibounai ese emu ladana idia hahelagaia.” (Mat. 6:9) Baibel be nega momo Iehova ena ladana hahelagaia karana ia herevalaia. Mani haheitalai haida ita itaia: “Iehova ena ladana dainai ia umui hanamoa.” (1 Siv. 16:29; Sal. 96:8) “Iena ladana hairaina dainai hanamoa anedia umui abia.” (Sal. 66:2) “Emu ladana do lau abia isi ela bona hanaihanai.” (Sal. 86:12) Nega ta Ierusalema ena dubu helagana ai Iehova sibona ia hereva. Unai nega ai Iesu ia gwau: “Tamagu e, emu ladana oi hanamoa.” Bena Iehova ia haere: “Unai ladana lau hanamoa vadaeni bona do lau hanamoa lou.”​—Ioa. 12:28.a

(3) Iehova ena ura be Iena ladana helagana do idia hanamoa ela bona hanaihanai. Mani inai oi laloa: Keriso ena Lohia Lagani 1,000 ena dokona bona hahetoho ginigabena murinai, dahaka do ia vara? Unai nega ai taunimanima bona aneru ese Iehova ena ladana be edena bamona do idia laloa? Unai henanadai haerelaia totona mani inai mai anina bada gaudia rua ita laloa lou—Dirava badinaia karana bona Iehova ena lohia siahuna. Unai nega ai, abidadama taudia ese edia Dirava badinaia karana do idia hamomokania be anina lasi. Badina idia be do idia goevadae bona hahetoho idia hanaia vadaeni, danu mauri hanaihanai do idia abia. Bona Iehova ena lohia siahuna be maoro do ita hamomokania be anina lasi. Unai nega ai guba bona tanobada taudia ibounai be do idia lalotamona bona Iehova ena lohia dalana do idia abia dae. To, Iehova ena ladana be edena bamona?

Iehova ena ladana be do ia helaga momokani bona hadikaia herevadia be do idia ore. To, Iehova ena hesiai taudia ibounai dekenai Iehova ena ladana be mai anina bada. Dahaka dainai? Badina do idia itaia Iehova be hoa karadia do ia karaia noho. Inai oi laloa: Iesu be mai manau ida lohia siahuna be Iehova dekenai do ia henia giroa, unai amo “Dirava sibona be gau ibounai edia Lohia ai do ia lao.” (1 Kor. 15:28) Unai murinai, tanobada ai idia noho taudia be “Dirava ena natudia edia ura kwalimu hereadaena do idia abia.” (Roma 8:21) Bena Iehova ese ena ura badana do ia hagugurua, bona ena natudia guba ai bona tanobada ai be mai lalotamona ida ruma bese badana ta bamona ai do idia noho.​—Efe. 1:10.

Unai gaudia idia vara murinai, Iehova ena famili guba bona tanobada ai edia hemami be edena bamona? Oibe, mai iseda lalona ibounai ida do ita ura Iehova ena ladana hairaina ita hanamoa noho. Salamo torea tauna Davida ia gwau, “Iehova Dirava, . . . idia hanamoa be namo . . . Iena ladana hairaina ita hanamoa hanaihanai be namo.” (Sal. 72:18, 19) Oibe, badina namodia dainai Dirava do ita hanamoa noho ela bona hanaihanai.

Momokani, Iehova ena ladana ese iena kara ibounai ia hahedinaraia. Iena ladana ita laloa neganai, iena lalokau ita laloa. (1 Ioa. 4:8) Hanaihanai do ita laloatao, lalokau dainai Iehova be ita ia havaraia, lalokau dainai mauri davalaia boubouna ia henia, bona lalokau dainai ia hahedinaraia iena lohia dalana be maoro. To Iehova ese ena lalokau be iena havaraia gaudia dekenai ia hahedinaraia karana do ita itaia noho. Oibe, do ita ura iseda Tamana Iehova kahirakahira do ita lao bona ane amo iena ladana hairaina do ita hanamoa ela bona hanaihanai.​—Sal. 73:28.