GAUDIA EDIA PRAIS IA BADA

Hariharibada Karana Hahedinaraia

Bema gaudia edia davana ia bada dainai emu mauri ia auka. Reana do oi mamia hariharibada karana hahedinaraia be gau badana lasi. To, ma haida dekenai unai kara oi hahedinaraia neganai, unai ese oi do ia durua moni ena hekwakwanai oi haheaukalaia totona. Ena be moni sisina oi haboua diba, to danu hariharibada karana be mai ena namo.

DAHAKA DAINAI UNAI BE MAI ANINA BADA?

Dala idauidau ai hariharibada karana ita hahedinaraia neganai, do ita moale bona iseda hemami do ia namo. Bona tahua gaukara haida ese idia hamomokania, henia karana ese iseda helt ia durua diba. Hegeregere, lalohekwarahi, lalometau, blood pressure bona tauanina ai hisihisi ia hamaragia. Danu do ita mahuta namonamo.

“Henia kara ena moale be bada, to abia kara ena moale be maragi.”—Kara 20:35.

Howard be England ai ia noho, ia gwau: “Dala idauidau lau tahua haida lau durua bona hariharibada karana lau hahedinaraia. Unai dainai, lau bona egu hahine ai mamia ia auka lasi ma haida edia heduru ai abia dae totona.” Moni amo eiava dala ma ta ai haida dekenai heduru ita henia. Bona oi dabu neganai, do ia auka lasi haida edia heduru oi abia dae totona. Oibe, hariharibada taudia be gau ta abia totona unai idia karaia lasi. To edia dabu negadiai, tura korikoridia ese heduru idia henia.

“Henia karana do umui manadalaia, vadaeni taunimanima ese umui dekenai do idia henia.”—Luka 6:38.

OI KARAIA DIBA GAUDIA

Oi dekenai ia noho gauna oi haria. Hegeregere, bema oi dekenai ia noho aniani ena be ia bada lasi, reana haida ida oi haria diba eiava idia oi boiria umui aniani hebou totona. Duncan bona ena famili be Uganda ai idia noho. Ena be idia ogogami, to mai ura ida hariharibada karana idia hahedinaraia. Duncan ia gwau: “Sunday ibounai, lau bona egu hahine be ta ai boiria emai ruma dekenai aniani sisina ai ania hebou. Unai bamona hebamo karana ai moalelaia.”

Ma haida dekenai unai bamona henia karana oi hahedinaraia diba, to emu famili edia dabu gaudia danu oi laloa be namo.—Iobu 17:5.

Inai oi karaia: Ta dekenai aniani sisina o ranu oi henia. Bona, bema emu kohu haida be nega daudau oi gaukaralaia lasi. Turadia o neiba taudia dekenai oi henia diba. Reana idia dekenai, unai be mai ena heduru bada.

Henia karana ena dala ma haida. Harihari gaudia namodia haida be davana lasi. Hegeregere, iseda nega ita gaukaralaia haida ita durua totona. Ita gwauraia hereva namodia danu be harihari gauna ta. Unai dainai emu famili o turadia oi hamaoroa idia oi laloa bada bona lalokau henia.

Inai oi karaia: Ma haida oi durua edia ruma ai idia dika gaudia oi hanamoa o idia ura henia gaudia hoia totona sitoa dekenai oi lao. Emu turana totona, kadi ta oi torea eiava teks mesiji oi siaia. Ena be oi gwau sibona ia oi laloa noho.

Bema dala idauidau ai hariharibada karana oi hahedinaraia, emu mauri do oi moalelaia.

“Umui laloaboio lasi, kara namodia do umui karaia noho bona ma haida ida emui kohu do umui haria.”—Heberu 13:16.

Headava tau bona ena adavana ida buruka hahine ena gabu idia hagoevaia. Idia totona kofi ia mailaia.