GAUDIA EDIA PRAIS IA BADA

Oi Abia Dae Gau Namodia Do Idia Vara

Emu tano ai moni ena hekwakwanai oi davaria noho, a? Famili edia dabu gaudia hoia totona oi laloa momo, a? Bema oibe, vaira nega totona do oi daradara diba. To, unai bamona nega aukadia ai helaro be mai anina bada.

DAHAKA DAINAI UNAI BE MAI ANINA BADA?

Helaro idia laloa taudia be, gau namodia do idia vara totona idia laloa sibona lasi. To nega aukadia ai helaro ese idia ia durua. Hegeregere, tahua gaukara ese idia hahedinaraia helaro idia laloa taudia be . . .

idia haheauka
idia vara senisi idia abia dae
abia hidi maorodia idia karaia, unai ese edia helt ia durua

OI KARAIA DIBA GAUDIA

Ginigunana be, Baibel ese hari inai nega ai oi ia durua diba dalana oi laloa. Gaudia edia davana ia bada noho karana oi haheaukalaia bona emu mauri ai abia hidi namodia oi karaia totona, Baibel ena hereva ese oi ia durua diba. Unai amo do idia vara gaudia totona do oi hegaegae diba.

“Oiemu laloa kehoa bona oiemu diba maoro ese, oiemu mauri do idia naria namonamo.”—Aonega Herevadia 2:11, Buka Helaga.

Iharuana be, Baibel ese vaira nega ia herevalaia. Baibel ena aonega herevadia badinaia karana ena namo oi itaia neganai, do oi ura Baibel amo diba ma haida oi abia. Hegeregere; Baibel amo do oi dibaia gauna ta be, Dirava ia ura ‘vaira nega ai noho namo oi davaria.’ (Ieremia 29:11) Danu unai helaro ita abidadama henia ena badina be, Dirava ena Basileia ese unai do ia havaraia.

DIRAVA ENA BASILEIA BE DAHAKA, BONA DAHAKA DO IA KARAIA?

Dirava ena Basileia be gavamani ta, guba amo tanobada ibounai do ia lohiaia. (Daniela 2:44; Mataio 6:10) Unai gavamani ese hisihisi idauidau bona ogogami maurina do ia haorea. Bona taunimanima be maino ai do idia noho bona gau namodia do idia moalelaia. Baibel siri haida be inai.

“Oi be do oi moale bona emu mauri do ia namo.”—Salamo 128:2.

“[Basileia henunai noho taudia] do idia hekwarahi kava lasi.”—Isaia 65:23.

“Tanobada ai aniani be do ia momo herea.”—Salamo 72:16.

Unai gwauhamata idia abidadama henia taudia idia diba momokani, Dirava be ia “koikoi diba lasi.” (Tito 1:2) Unai dainai, Baibel ena hereva oi duahia be namo, ani? Unai ese oi dekenai goada do ia henia moni ena hekwakwanai oi haheaukalaia, bona mai lalogoada ida vaira nega namona totona oi naria.