Stadi 4
Stadi ese Ita Ia Durua
1 Iseda abidadama bona lalokau Dirava dekenai ita habadaia totona, bona iseda haroro gaukarana ita hanamoa totona, ita stadi be namo. Stadi ese ita ia hahegaegaea, Dirava ena nega matamatana lalonai do ita noho totona.—Mat. 4:4.
2 Nega haida ita stadi gwauraia to nega be lasi, unai dainai namona be iseda nega ita haorea kava lasi. (Ef. 5:15-17) Bema nega momo ita kiki kava, eiava televisen o reidio ita kamonai dainai ita be nega lasi stadi totona, namona be unai kara ita hamaragia, bena ita be mai eda nega stadi totona.—Fil. 1:9-11.
3 Stadi ena anina be, hereva ta ena anina ita tahua namonamo bona ita lalohadailaia mai eda lalona ibounai ida. Keristani tauna ia diba, Dirava ena lauma helaga, ena orea, bona ena Hereva ese idia durua. Unai dainai, ia stadi neganai ia guriguri guna.—Iam. 1:5; Luka 11:9-13.
4 Baibel stadi. Haroro Sikuli ena sediual ese pura ta ta iboudiai do ita duahia Baibel siridia ia hahedinaraia. Bema mai emu ruma bese ida umui duahidia hebou, namona be paragraf ta umui duahia ore neganai, duahia tauna ese paragraf ena hereva badana ia gwauraia hedinarai. Bema oi sibona oi duahia, paragraf ta oi duahia murinai, unai hereva ese oi ia durua dalana oi laloa.
5 Bema hereva haida edia anina oi abia namonamo lasi, oi duahia ore neganai, Society ena buka haida lalonai unai hereva edia anina oi tahua be namo. Lagani ta ta iboudiai, ena Gima Kohorona ginigabena lalonai, Gima Kohorona edia hereva bona Baibel siridia iboudiai edia lista idia torea. Unai oi tahua be namo, hereva ta ena anina do oi davaria totona.
6 Oi stadi, haere davaridia totona. Nega haida, oi lou henia tauna eiava oi stadi henia tauna be mai ena henanadai, bona unai henanadai ena haere oi diba lasi. Sibona emu stadi oi karaia neganai, unai henanadai ena haere oi tahua be namo. Bema henanadai be Baibel ena siri ta dekenai, unai siri vairanai bona murinai idia noho herevadia oi duahidia namonamo, bena Society edia buka o “Gima Kohorona” edia Baibel Siridia edia lista lalonai unai siri oi tahua ena anina davaria totona.
7 Haere oi davaria neganai, inai bamona oi laloa be namo: Edena bamona do oi gwauraia hedinarai, bena oi hereva henia tauna do ia diba, haere maorona be unai.
8 “Gima Kohorona” stadi hegaegaelaia dalana. Magasin matamatana oi abia neganai, ena hereva iboudiai oi duahia. Bena kongregesen ena stadi dinana be kahirakahira neganai, stadi herevana be oi sibona oi duahia lou, eiava emu ruma bese ida umui duahia lou. Ena kwara hereva, ena siri badana, bona ena kahana ta ta edia kwara herevadia oi duahia guna. Paragraf ta oi duahia neganai, henanadai ena haere oi makaia, bena oi duahia ore murinai, oi sibona emu hereva amo paragraf ena haere oi gwauraia. Baibel ena siri, paragraf lalonai idia gwauraidia, be Baibel lalonai oi duahidia. Hereva ena kahana ta oi haorea neganai, ena badina oi laloa lou, bona stadi dokonai danu unai bamona oi karaia.
9 Ruma bese ena stadi. Namona be ruma bese ena kwarana ese ena ruma bese be lauma dalana dekenai ia naridia. (1 Tim. 5:8) Dina ta ta iboudiai ia be ena ruma bese taudia ida dina ena siri idia herevalaia hebou be namo. Danu, namona be nega idia abia hidi, pura ta ta iboudiai ruma bese ena stadi do idia karaia totona. Unai stadi lalonai, tau ese ena ruma bese taudia ia durudia diba, Baibel ena hereva momo do idia dibaia bona edia kudouna lalonai do idia atoa totona. (Ef. 6:4; Deut. 6:4-7) Ruma bese momo lalodiai, Gima Kohorona idia stadilaia hebou, edia ruma bese stadi unai, to emu ruma bese durua totona, reana ma buka haida umui stadilaia be namo.
10 Stadi goadagoada karana ena davana namona. Stadi goadagoada karana ese ita ia durua gau momo ita laloatao totona. Kamonai matamata taudia edia henanadai do ita haerelaia diba, bona Baibel ena siri do ita davaria haraga diba. Stadi dainai, Dirava ena Hereva ita diba namonamo, eda abidadama ia goada, bona Dirava ena gaukara ita karaia mai eda moale bada ida.
11 Namona be stadi ita goadalaia bona lauma gaudia ita tahudia guna. Iehova ia gwau unai bamona idia karaia taudia ese ‘Ia do idia davaria.’ (1 Siv. 28:9) Stadi ena badina momokanina be aposetolo Paulo ese ena guriguri herevana ta lalonai ia gwauraia hedinarai; ia gwau: “Lohiabada ena ura hegeregerena do umui noho, bona nega ibounai umui ese ia do umui hamoalea.”—Kol. 1:9, 10.