Stadi 11

Hereva mai Anina Bada; Gwauraia Namonamo

¹ Hereva namona oi henia totona, oi hegaegae namonamo guna. Unai ena anina be, nega bada oi haorea bona oi gaukara goada. To, unai kara be mai ena davana namo hereana! Ia amo emu diba oi habadaia bona hereva namodia oi davaria, hebou taudia dekenai do oi gwauraia totona. Unai amo oi durudia Dirava ena Hereva do idia laloa bada totona, bona Iehova oi hanamoa danu.

² Hereva ena anina gwauraia goevagoeva. Bema oi ura taunimanima ese emu hereva do idia laloatao, namona be ena anina oi gwauraia hedinarai goevagoeva. Hereva ta oi hegaegaelaia neganai, namona be ena anina oi laloa bona inai bamona oi henanadai: Dahaka dainai? Edena negai? Edeseniai? Bena emu hereva lalonai unai henanadai edia haere oi gwauraia hedinarai be namo. Namona be oi gwauraia gabudia edia ladadia, bona oi gwauraia negadia edia lagani o edia dina, bona oi gwauraia karadia edia badina, be oi gwauraidia. Namo lasi oi gwau kava hereva ta ia momokani, to namona be unai hereva hamomokania dalana oi hahedinaraia, bona unai hereva dibalaia karana ena namo danu oi gwauraia be namo. Bema gaukara ta oi hadibalaidia, namona be karaia dalana oi gwauraia hedinarai idia dekenai. Emu hereva do idia kamonai taudia edia diba ena bada oi laloa guna be namo, bena do oi diba dahaka do oi hadibalaidia be namo, emu hereva ena anina do idia lalo-pararalaia totona.

³ Idia kamonai taudia ia hadibadia. Reana hereva ta ese idia kamonai taudia do ia durudia, to ma haida ese unai hereva do idia kamonai neganai do idia daradaralaia; unai dainai namona be taunimanima edia diba hegeregerena oi hereva henidia. Haheitalai ta be inai: Iseda haroro gaukarana karaia dalana be hesiai hebou dekenai oi gwauraia dalana, bona bapatiso totona ia hegaegae tauna dekenai oi gwauraia dalana, bona murimuri tauna dekenai oi gwauraia dalana be idauidau. Unai dainai, hereva oi henia neganai, namona be sibomu dekenai inai bamona oi henanadai: Egu hereva be hegeregere do idia kamonai taudia dekenai, eiava? Do ia hadibadia eiava?

⁴ Hereva oi hegaegaelaia neganai, sibona dekenai inai bamona oi henanadai: Lau ura inai hereva amo dahaka do lau karaia? Do lau hereva henidia taudia edia diba be edena bamona? Dahaka do lau gwauraia guna be namo, bena hereva ena anina korikorina do idia lalo-pararalaia? Inai hereva be taunimanima idaudia dekenai edena dala idauna amo do lau herevalaia?

⁵ Heduru momokani herevadia. Iseda Keristani maurina bona iseda haroro gaukarana lalodiai do ita badinaia herevadia be mai anina bada ita dekenai. Ita ura diba, unai hereva be edena bamona do ita gaukaralaia.

⁶ Hereva henia tauna ese iena hereva ia hegaegaelaia neganai, bona Sikuli naria tauna ese ia sisiba henia gwauraia neganai, reana idia ta ta be sibodia dekenai inai bamona idia henanadai be namo: Inai hereva ese edena sisiba herevadia ia gwauraidia? Taunimanima ia durudia gau ta do idia lalohadailaia maoromaoro totona, a? Dirava ena Hereva ia abia isi bona iena palani ia hahedinaraia, eiava?

⁷ Hereva ia maoro. Iehova ena Witness taudia be hereva momokani gwauraia oreana. Namona be ita ura nega ibounai hereva momokani sibona ita gwauraia. Hahediba herevadia ita gwauraia neganai, o haida edia hereva ita gwauraia lou neganai, o haida edia kara ita herevalaia neganai, o saiens herevadia o tanobada ena sivarai ita gwauraia neganai, namona be hereva momokani sibona ita gwauraia. Bema hereva kereredia ita gwauraidia, unai hereva idia kamonai taudia ese do idia gwauraia lou neganai, unai kerere do idia habadaia reana. Eiava, bema idia diba iseda hereva haida idia kerere, reana iseda hereva oredia do idia abia dae lasi bona ita ida do idia hebou lou lasi.

⁸ Sikuli naria tauna ese hereva henia tauna ia sisiba henia neganai, namo lasi iena hereva kereredia iboudiai ia sisibalai henia. Inai be mai anina bada, Sikuli lalonai ia vareai matamata tauna ia sisiba henia neganai. Namona be ia durua, hereva hegaegaelaia namonamo dalana do ia diba totona, bena hereva maorodia sibodia do ia gwauraidia.

⁹ Hereva namodia ma haida atodia kau. Oiemu stadi amo oi laloa davari herevana ta be emu hereva lalonai bema oi gwauraia danu, hebou taudia be mai edia moale ida do idia kamonai. To namo lasi sibona emu lalohadai oi gwauraia. Namona be Society ena buka amo lalohadai haida oi abidia.

¹⁰ Gwauraia namonamo. Hereva ta oi hegaegaelaia neganai, namona be oi laloa namonamo edena bamona do oi gwauraia. Bema unai oi karaia lasi, emu hereva idia kamonai taudia ese do idia laloatao lasi. Unai oi karaia namonamo totona, namona be inai gau badadia toiosi oi lalodia:

¹¹ Hereva be auka lasi. Bema hereva ta do oi henia, namo lasi oi naria ela bona henia negana be kahirakahira bena oi hegaegaelaia haraga. Namona be unai hereva ena badina o point ta ta iboudiai oi lalodia namonamo ela bona unai hereva ta ta edia anina oi lalo-pararalaia momokani bona hereva haragadia amo oi gwauraidia diba. Hereva henia negana be kahirakahira neganai, unai hereva o point oi lalodia lou be namo, bena hereva do oi henia neganai, do oi gwauraidia namonamo, bona do idia kamonai taudia ese do idia lalo-pararalaidia.

¹² Idia manadalaia lasi herevadia edia anina gwauraia hedinarai. Ita ese Baibel bona Society ena buka ita stadilaidia dainai, murimuri taudia idia diba namonamo lasi herevadia haida ita gwauraidia. Taunimanima haida ita hereva henidia neganai, bema unai hereva ita gwauraidia, iseda hereva ena anina do idia lalo-pararalaia lasi.

¹³ Do oi hereva henidia taudia be sibomu emu lalona ai inai bamona oi henanadailaidia be namo: Edia diba be edena bamona? Iseda gaukara idia diba bada eiava? Do oi gwauraia herevadia edia anina do idia lalo-pararalaia eiava? Murimuri taudia dekenai hereva haida edia anina be idau, eiava edia anina idia diba lasi. Unai hereva haida be inai: “orea maragi,” “orena taudia,” “mamoe idaudia,” “Aramagedono,” “Basileia,” bona “hel.” Unai dainai namona be unai hereva edia anina oi gwauraia hedinarai idia dekenai. To kongregesen oi hereva henia neganai, unai bamona hereva edia anina oi gwauraia hedinarai be anina lasi.

¹⁴ Hereva momo lasi. Hereva ta oi henia neganai, bema hereva idauidau momo herea oi gwauraidia, idia kamonai taudia ese anina do idia lalo-pararalaia lasi. Oiemu hereva ena nega hegeregerena hereva haida sibodia oi gwauraidia be namo. Bema kamonai taudia matamatadia oi hereva henidia, auka lasi herevadia oi gwauraidia be namo.

¹⁵ Sikuli ena hereva ta lalonai, hereva idauidau hida oi gwauraidia diba? Hereva oi hegaegaelaia neganai, do oi gwauraia herevadia oi laloa namonamo be namo. Do idia kamonai taudia ese unai hereva hida idia diba vadaeni, bona hida idia diba lasi? Bema hereva momo idia diba vadaeni, hereva matamatadia momo oi gwauraidia diba, to bema hereva momo idia diba lasi, namona be hereva momo oi gwauraidia lasi bona hereva edia anina oi gwauraia hedinarai goevagoeva.