Tomadiho Palai Rumana Ta

INAI ruma oi diba, a? Inai palai rumana be Iehova tomadiho henia totona idia karaia. Idia gwauraia palai dubuna. Aigupito idia rakatania bona lagani ta ia ore murinai, idia karaia haorea. Oi diba daika ena lalohadai dainai idia karaia, a?

Iehova ena lalohadai. Mose be Sinai Ororona ataiai ia noho neganai, Iehova ese ia dekenai karaia dalana ia hadibaia. Ia hamaoroa idia kokia haraga diba dalanai do idia karaia. Unai dala amo, ena kahana idauidau be gabu ma ta dekenai idia huaia lao diba, bona unuseniai idia haginia lou. Unai dainai, Israela taudia be taunimanima idia noho lasi gabuna dekenai idia loaloa neganai, palai be idia danu idia huaia.

Bema palai ena dokona kahanai ia noho daiutu maragina lalonai oi itaia, maua ta do oi itaia. Idia gwauraia Taravatu Mauana. Ena dokona kahana ta ta dekenai golo amo idia karaia aneru idia noho. Dirava ese nadi palaka rua dekenai Taravatu Ten ia torea lou, badina Mose ese gunadia ia hamakohia. Bona unai nadi rua be Taravatu Mauana lalonai idia noho. Mana ena kavabu ta be lalonai ia noho danu. Mana oi laloatao, a?

Iehova ese Mose ena kakana Arona, ia abia hidi hahelaga tauna badana ai ia lao totona. Taunimanima ia hakaudia Iehova idia tomadiho henia totona. Bona ena natudia memero be hahelaga taudia danu.

Palai ena daiutu badana mani ita itaia. Guna ita gwauraia daiutu maragina be nega rua amo ia hanaia. Kwalahu be maua ta amo ia daekau noho, unai oi itaia, a? Unai be pata ta bona unuseniai hahelaga taudia ese bonana namo muramurana idia gabua. Bena lamepa 7 ia dogoatao auna ta danu ia gini. Bona daiutu lalonai ia noho gau ihatoina be teibolo ta. Unai teibolo latanai paraoa 12 idia atoa.

Palai dubu ena murimuriai, ranu amo ia honu disi badana ta ia noho. Hahelaga taudia ese unai idia gaukaralaia edia aena bona imana idia huria totona. Boubou pata badana ta danu ia noho. Unuseniai mase animal idia gabua Iehova dekenai boubou gaudia bamona. Inai palai be Israela taudia edia kamepa huanai ia noho.