Gibeona Taudia Idia Aonega

KANANA ena hanua momo be hari idia hegaegae Israela idia tuari henia totona. Idia laloa idia kwalimu diba. To kahirakahira ia noho Gibeona hanua ai idia noho taudia edia lalohadai be idau. Idia abia dae Dirava ese Israela taudia ia durua noho, bona idia ura lasi Dirava idia tuari henia. Unai dainai Gibeona taudia ese idia karaia karana oi diba, a?

Idia be gabu daudau taudia edia toana bamona idia karaia. Unai dainai tatau haida be dabua dikadia bona idia dika vadaeni tamaka idia karaia. Doniki dekenai puse gunadia idia kwatua bona paraoa kakoro idia abia. Bena Iosua dekenai idia lao bona idia gwau: ‘Ai be tano daudauna amo ai mai, badina emu Dirava badana, Iehova ena sivarai ai kamonai. Umui totona Aigupito dekenai ia karaia karadia ibounai ai kamonai. Unai dainai emai hakaua taudia ese ai idia hamaoroa aniani ai hegaegaelaia emai laolao totona, bona oi dekenai ai mai bona ai gwau: “Ai be emu hesiai taudia. Mani oi gwauhamata, ai dekenai do oi tuari lasi.” Oi itaia, emai dabua idia dika vadaeni, badina nega daudau ai laolao bona emai paraoa ia kakoro bona ia dika vadaeni.’

Iosua bona hakaua taudia ma haida ese Gibeona taudia edia hereva idia abia dae. Unai dainai idia gwauhamata do idia tuari henidia lasi. To dina toi murinai, idia kamonai Gibeona taudia be idia kahirakahira idia noho taudia.

Iosua be idia ia nanadaia: ‘Dahaka dainai umui ese ai umui koia, umui gwau umui be gabu daudauna amo umui mai?’

Gibeona taudia idia haere: ‘Ai karaia badina ai kamonai emui Dirava Iehova ia gwauhamata Kanana tano ibounai be umui dekenai do ia henia. Unai dainai, ai umui alaia mase garina ai gari.’ To Israela taudia ese edia gwauhamata idia hamomokania, bona Gibeona taudia idia alaia lasi. To edia hesiai taudia ai idia halaodia.

Ierusalema ena king ia badu badina Gibeona taudia be Israela danu maino idia karaia. Unai dainai ma king 4 dekenai ia gwau: ‘Umui mai bona lau umui durua Gibeona taudia tuari henia totona.’ Vadaeni, unai bamona idia karaia. Gibeona taudia be Israela danu idia maino karaia neganai, idia aonega, eiava? Do ita itaia.