Basileia Ia Parara

INAI tau ese ena dabua ia darea maragimaragi ena badina oi diba, a? Iehova ese ia hamaoroa dainai. Inai tauna be Dirava ena peroveta tauna Ahaisa. Peroveta tauna oi diba, a? Dirava be idia dekenai gabeai do idia vara gaudia ia hadibaia guna.

Iniseniai, Ahaisa be Ieroboama ia hereva henia noho. Solomona ese Ieroboama ia abia hidi ena ruma haginia gaukara haida ia naria totona. Ahaisa ese Ieroboama be inai dala dekenai ia davaria neganai, Ahaisa be kara idauna ta ia karaia. Ia karaia dabua matamatana ia kokia bona kahana 12 dekenai ia darea. Ieroboama ia hamaoroa: ‘Kahana 10 oi abia.’ Ahaisa ese Ieroboama dekenai kahana 10 ia henia ena badina oi diba, a?

Ahaisa ese ia gwauraia hedinarai Iehova ese Solomona amo basileia do ia kokia. Ia gwau, Iehova ese Ieroboama dekenai iduhu 10 do ia henia. Unai anina be Solomona ena natuna Rehoboama ese iduhu rua sibona do ia lohiaia.

Ahaisa ese Ieroboama dekenai ia gwauraia herevana be Solomona ese ia kamonai neganai, ia badu dikadika. Dala ia tahua Ieroboama ia alaia mase totona. To Ieroboama be Aigupito dekenai ia heau lao. Gabeai Solomona ia mase. Lagani 40 ia lohia, to hari ena natuna Rehoboama be king ai idia halaoa. Aigupito dekenai Ieroboama ia kamonai Solomona ia mase vadaeni, unai dainai Israela dekenai ia giroa lou.

Rehoboama be king namona lasi. Solomona ena kara taunimanima dekenai be namo lasi danu, to Rehoboama ena kara be dika herea. Ieroboama bona tatau badadia haida be King Rehoboama dekenai idia lao bona ia idia noia taunimanima ia kara namo henidia totona. To Rehoboama ia kamonai lasi. To iena kara dika ma ia habadaia. Unai dainai taunimanima ese Ieroboama be iduhu 10 edia king ai idia halaoa, to Beniamina bona Iuda iduhu be Rehoboama ese ia lohiaia.

Ieroboama ia ura lasi ena taunimanima idia lao Iehova ena dubu Ierusalema dekenai idia tomadiho totona. Unai dainai, golo boromakau rua ia karaia, bona iduhu 10 basileia taudia ia hakaudia idia tomadiho henia totona. Daudau lasi tano be kara dika bona dagedage amo ia honu.

Iduhu rua basileia lalonai danu hekwakwanai idia vara. Rehoboama ia king bena lagani 5 bamona murinai, Aigupito ena king ese Ierusalema ia tuari henia. Iehova ena dubu amo kohu momo ia abia lao. Unai dainai nega daudau lasi dubu idia karaia murinai ia dika haraga.