Iesu ese Dubu Ia Hagoevaia

INISENIAI Iesu ia badu dikadika, ani? Ia badu ena badina oi diba, a? Badina Ierusalema dekenai Dirava ena dubu lalonai inai tatau ese kohu idia mataganigani henia. Idia ura iniseniai Dirava tomadiho henia totona idia mai taudia amo moni momo idia abia.

Inai boromakau, mamoe bona pune manu ibounai oi itaia, a? Inai tatau ese inai animal be dubu lalonai idia hoihoilaidia noho. Ena badina oi diba, a? Badina Israela taudia ese animal bona manu idia gaukaralaia Dirava dekenai boubou gaudia idia henia totona.

Dirava ena taravatu ia gwau, Israela tauna ta ia kerere neganai, Dirava dekenai boubou gauna ia henia be namo. Bona ma nega haida ai danu Israela taudia ese boubou gaudia idia henia. To Israela tauna be edeseni amo manu bona animal ia abia diba Dirava dekenai ia bouboulaia totona?

Israela taudia haida be mai edia manu bona animal. Unai dainai unai idia henia diba. To Israela taudia momo dekenai animal eiava manu be lasi. Bona ma haida edia hanua be Ierusalema amo ia daudau dainai, dubu dekenai edia animal ta idia abia mai diba lasi. Unai dainai taunimanima be iniseniai idia mai bona edia ura animal eiava manu idia hoia. To inai tatau ese edia davadia idia habadaia. Idia ese taunimanima idia koidia. Unai sibona lasi, to dubu lalonai idia hoihoi be maoro lasi.

Unai dainai Iesu ia badu dikadika. Bona inai tatau edia teibolo ia hagirodia bona edia moni be gabu idauidau dekenai idia lao. Danu, varo amo kwadia gauna ta ia karaia bona dubu amo animal ibounai ia luludia. Pune manu idia hoihoilaia taudia ia haganidia: ‘Inai gabu amo umui kokidia! Egu Tamana ena ruma be moni momo gogoa gabuna ai umui halaoa lasi.’

Iesu ena hahediba taudia haida be iniseniai Ierusalema ena dubu dekenai idia noho. Idia be Iesu ia karaia karana dekenai idia hoa bada. Bena Dirava ena Natuna ia herevalaia Baibel sirina ta idia laloatao, ia gwau: ‘Dirava ena ruma lalokau henia karana be ia lalonai do ia araia lahi bamona.’

Iesu be Ierusalema ena Pasova ariana totona ia mai neganai, hoa karadia momo ia karaia. Gabeai, Iesu be Iudea ia rakatania bona Galilea dekenai ia giroa lou. To dala dekenai Samaria hanuana ia raka hanai. Unuseniai ia vara gauna mani ita itaia.