Iesu Ena Hadibaia Dalana

DINA ta Iesu ese tau ta ia hamaoroa ena dekena tauna ia lalokau henia be namo. Unai tauna ese Iesu ia nanadaia: ‘Lauegu dekena tauna be daika?’ Iesu be unai tauna ena lalohadai ia diba. Unai tauna ia laloa ena bese bona tomadiho taudia sibodia be ena dekena taudia. Unai dainai Iesu ese ia dekenai ia gwauraia herevana mani ita laloa.

Nega haida Iesu be sivarai ta amo taunimanima ia hadibaia. Hari unai bamona ia karaia. Iuda tauna bona Samaria tauna ta edia sivarai ia gwauraia. Ita diba vadaeni Iuda taudia momo be Samaria taudia idia ura henia lasi. Vadaeni, Iesu ena sivarai be inai:

Dina ta Iuda tauna ta be Ieriko ia lao henia dalana dekenai ia raka diho lao. To henaohenao taudia ese ia idia dogoatao. Iena moni idia abia bona ia idia botaia ela bona kahirakahira ia mase.

Gabeai, Iuda hahelaga tauna ta be unai dala dekenai ia raka lao. Idia botaia tauna ia itaia. Oi laloa dahaka ia karaia? Ia be dala kahana dekenai ia hanaia bona ia raka lao sibona. Bena tomadiho ia laloa bada tauna ma ta ia mai. Ia be Levi tauna. Unai tauna do ia durua, a? Lasi, ia danu ese idia botaia tauna ia durua lasi. Hahelaga tauna bona Levi tauna oi itaia, dala dekenai idia diho lao noho.

To idia botaia tauna ida ia noho tauna mani oi itaia. Ia be Samaria tauna ta. Bona Iuda tauna ia durua noho. Iena bero dekenai muramura haida ia atoa noho. Gabeai, ia ese Iuda tauna be gabu ta dekenai ia abia lao ia laga-ani bona ia namo totona.

Ena sivarai ia haorea murinai, Iesu be unai henanadai ia henia tauna dekenai ia gwau: ‘Inai tatau toi amo oi laloa edena tau be botaia tauna ena dekena tauna bamona? Hahelaga tauna, Levi tauna eiava Samaria tauna?’

Unai tau ia haere: ‘Samaria tauna. Ia be idia botaia tauna dekenai ia hebogahisi.’

Iesu ia gwau: ‘Oiemu hereva be maoro. Unai dainai oi lao bona haida dekenai unai bamona oi karaia danu.’

Iesu ena hadibaia dalana oi ura henia, a? Bema Iesu ena hereva Baibel lalonai ita kamonai henia, mai anina bada gaudia momo herea do ita dibaia, ani?