Iesu, Uma Lalonai

ATAI daiutuna idia rakatania murinai, Iesu bona ena aposetolo taudia be Getesemane umana dekenai idia lao. Nega momo iniseniai idia mai. Hari Iesu ese idia ia hamaoroa do idia noga noho bona idia guriguri. Bena ia lao sisina daudau dekenai, ia tui diho bona ia guriguri.

Gabeai Iesu be ena aposetolo taudia idia noho gabuna dekenai ia giroa. Oi laloa idia be dahaka idia karaia noho? Idia mahuta! Nega toi Iesu ese ia hamaorodia do idia noga noho be namo, to nega toi ia giroa neganai, ia davaria idia mahuta noho. Iesu be nega ihatoina ia giroa neganai, ia gwau: ‘Inai bamona nega lalonai dahaka dainai umui mahuta? Lauegu inai taudia dekenai lau idia henia horana be ia ginidae vadaeni.’

Unai nega korikorina ai hutuma bada edia regena idia kamonai. Itaia! Tatau be tuari kaia bona au danu idia mai noho! Bona tosi idia dogoatao idia dekenai diari ia henia totona. Idia mai kahirakahira neganai, tau ta be hutuma ia rakatania bona maoromaoro Iesu dekenai ia mai. Bona ia kisi henia, inai laulau dekenai oi itaia bamona. Unai tau be Iuda Iskariote! Dahaka dainai Iesu ia kisi henia?

Iesu ia henanadai: ‘Iuda e, kisi amo lau oi hahedinaraia, a?’ Oibe, unai kisi be toa ta. Unai kara amo Iuda ida idia mai taudia do idia diba inai be Iesu, idia ura henia tauna. Unai dainai Iesu ena inai taudia ese ia idia dogoatao. To Petero ia ura lasi Iesu idia abia dainai ia heatu. Iena tuari kaia ia veria bona ia badinai ia gini tauna ia botaia. Tuari kaia ese unai tauna ena kwarana ia reaia bona ena taiana idibana ia utua. To Iesu ese ena taiana ia dogoatao bona ia hanamoa.

Iesu ese Petero ia hamaoroa: ‘Emu tuari kaia oi atoa giroa. Oi laloa egu Tamana lau noia diba lasi aneru tausen momo ia siaia lau idia hamauria totona, a?’ Oibe, ia noia diba! To Iesu ese Dirava ia noia lasi aneru ta ia siaia totona, badina ia diba ena inai taudia ese ia idia dogoatao negana be inai. Unai dainai idia hakaua neganai ia koudia lasi. Hari Iesu dekenai ia vara gauna mani ita itaia.