Karoa 2
Dirava Momokani Iehova Hanamoa
APOSETOLO Paulo ese Keristen taudia ia tore henidia, ia gwau, ena be “dirava” idia gwauraidia gaudia be momo, to “ita be mai iseda Dirava tamona, ia be Tamana . . . Bona Lohiabada danu be tamona, Iesu Keriso.” (1 Kor. 8:5, 6) Paulo ese ia gwauraia Diravana be tamona, Iehova, gau iboudiai ia havaraia Diravana. (Deut. 6:4; Apok. 4:11) Iena kara namodia bona ena heduru taunimanima dekenai idia diba taudia ese ia idia ura henia. Unai dainai dahaka idia karaia? Idia matauraia bada Diravana be edia hereva bona kara amo idia hanamoa. Edia lalokau Dirava dekenai ia bada ia lao noho lalonai, idia ura ia idia harorolaia, bona idia ura idia tohotohoa, edia diba hegeregerena. Bible ese ita ibounai ia hamaoroa unai bamona ita karaia be namo, ia gwau: “Umui be Dirava ena natuna, iena lalokau. Unai dainai, Dirava ena kara bamona do umui karaia be namo.” (Ef. 5:1, 2) Unai sisiba badinaia totona, namona be Iehova ita diba momokani.
IEHOVA ENA KARA TOANA
2 Bible ena buka idauidau lalodiai Dirava ena kara badadia idia gwauraia. Inai oi duahia neganai, mani inai kara edia toana bona edia anina bada oi dekenai oi laloa namonamo. Hegeregere: “Dirava be lalokau.” (1 Ioane 4:8) “Iena dala iboudiai be hahemaoro daladia.” (Deut. 32:4) “Aonega . . . be ia dekenai.” (Iobu 12:13) “Ena siahu be bada.” (Isa. 40:26) Inai iena kara oi laloa neganai, Dirava oi matauraia dainai oi ura oi hanamoa, ani?
3 Bible ese iena hebogahisi karadia ma ia gwauraia, ia gwau Iehova be “hebogahisi bona harihari bada Diravana, ia badu haraga lasi, iena hebogahisi bona kara momokani be bada herea.” (Eso. 34:6) “Iehova e, oi be namo, oi be dika oi gwauatao.” (Sal. 86:5) “Iehova ena matana ese tanobada ibounai idia itaia, ia idia badinaia momokani taudia iena siahu amo ia durudia totona.” (2 Sis. 16:9) “Dirava ese taunimanima edia toana ia laloa lasi. To bese ibounai lalonai, Dirava dekenai ia gari bona kara maoromaoro ia karaia tauna, Dirava ese do ia abia dae.” (Kara 10:34, 35) Iehova ese “gau namodia ia henia noho,” bona ia be “moale Diravana.” (Iak. 1:5; 1 Tim. 1:11, NW) Inai Dirava hereadaena ena hesiai gaukara ita karaia bona ena lalokau ena mamina ita abia, be iseda lalona ia hagoadaia momokani!
4 Danu, ‘ia ura ita be ia sibona ena.’ (Eso. 20:5) Ita ia abia dae totona, namona be ita lalokau henia mai eda lalona ibounai danu. Inai tanobada ita lalokau henia danu be maoro lasi, badina be Satana be ena dirava. (1 Ioane 2:15-17; 2 Kor. 4:3, 4) Bema ta ia kara maoromaoro koikoi, Iehova be unai ia diba. Iseda kara sibona lasi, to iseda lalohadai bona iseda ura danu be ia diba. Bema kara maoromaoro ita ura henia momokani, ita ia durua. (Ier. 17:10; Her. 15:9) Iehova ena kara namo dainai, taunimanima milion haida tanobada ibounai lalonai ese salamo torea tauna ena hereva hegeregerena idia karaia, ia gwau: “Lau danu Iehova do ita hanamoa, iena ladana do ita hanamoa hebou.” (Sal. 34:3) Oi danu oi hanamoa, a?
5 Bema Dirava ena kara hereadaedia oi tahua namonamo, do oi ura bada oi herevalaia bona oi tohotohoa. Inai oi tahua be namo: (1) Ena kara ta ta be dahaka dahaka? Idia ta be ma ta amo edena bamona ia idau? (2) Iehova ese unai kara edena bamona ia hahedinaraia bona daika dekenai ia hahedinaraia? (3) Unai kara be edena bamona oi hahedinaraia diba, o emu lalohadai edena bamona oi haidaua be namo?
6 Haheitalai ta mani oi laloa. Bible ena hereva, “Dirava be lalokau,” anina be dahaka? (1 Ioane 4:8) Lalokau be idauidau. Inai siri lalonai Greek hereva a·gaʹpe idia torea, anina be lalokau hereadaena, Iehova Dirava ese ia hahedinaraia lalokauna. Unai bamona lalokau ese sibona ena ura ia tahua lasi, lasi vaitani. Unai oi laloatao, bona henuai ai torea henanadai oi haerelaidia, Bible ena siri amo.
Iehova ena lalokau be edena bamona ia hahedinaraia, ia karaia gaudia lalodiai? (Kara 14:16, 17)
Edena dala amo Iehova ese lalokau bada ia hahedinaraia taunimanima dekenai? (Ioane 3:16) Taunimanima edia kara namo dainai Iehova be unai bamona ia karaia a? (Roma 5:8)
Iehova ese ena Natuna ena amo ia karaia karadia dainai iseda mauri be edena bamona ita gaukaralaia be namo? (2 Kor. 5:14, 15, 18, 19)
Edena dala amo ita Keristen taudia ita hahedinaraia diba iseda orea taudia be unai bamona ita lalokau henidia? (1 Kor. 13:4-7; 1 Ioane 4:10, 11; 3:16-18)
Daidia danu ita lalokau henidia be namo, bona edena dala amo? (Mat. 5:43-48; 28:19, 20; Gal. 6:10)
HAIDA DURUDIA DIRAVA IDIA DIBA MAOROMAORO TOTONA
7 Taunimanima ese Dirava momokani idia dadaraia bona dirava idaudia milion momo idia tomadiho henidia. Kerisendom ese “Toi Tamona Diravana” idia tomadiho henia, idau negai Babulono, Egypt, Hindu bona Buddhist taudia idia karaia bamona. Danu, lohia taudia mai siahudia, bona gadara helulu dekenai idia kwalimu herea taudia, bona ane abia taudia mai edia ladana badadia, be taunimanima ese idia hanamodia bada, edia dirava bamona. Haida ese moni o idia sibodia o sihari kava karana idia laloa bada, edia dirava bamona. Daika ese ia hakereredia? “Inai tanobada ena dirava,” Satana Diabolo, ese. (2 Kor. 4:4; 1 Kor. 10:20) Iena koikoi karadia idauidau amo taunimanima ia veridia toho, Iehova do idia rakatania o do idia laloa maragi totona.
8 Unai bamona taudia, sibodia be Keristen idia gwauraia taudia bona ma haida danu, edena bamona ita durudia diba, Dirava idia diba maoromaoro totona? Durudia dalana namo hereana be Bible ena hereva Dirava momokani bona ena kara dekenai ita hahedinarai henidia. Bona unai ita hamomokania totona, namona be Dirava ena kara namodia ita tohotohoa, iseda mauri lalonai.—1 Pet. 2:12.
9 To bema Kerisendom ena dubu orea taudia haida ese oi idia heai henia, idia gwau Bible ese “Toi Tamona” herevana ia hamomokania, be edena bamona? Inai oi laloa, ena be edia orea be mai edia hadibaia herevana unai gau dekenai, to taunimanima momo be sibodia mai edia lalohadai idaudia. Oi noidia, edia lalohadai do idia gwauraia hedinarai, bena oi durudia edia lalohadai idia tahua namonamo totona, ia be sibodia edia Bible ena hereva hegeregerena eiava lasi. Gabeai oi durudia, edia dubu orea ena hadibaia herevana danu unai bamona idia tahua namonamo totona.
10 Henuai ai torea Bible siridia oi duahia neganai, inai oi laloa: Inai siri amo lalo-namo taudia be edena bamona oi hadibaia diba, inai hereva ta ta dekenai lalohadai maoromaoro idia abia totona?
1) Toi Tamona herevana abia dae taudia haida idia gwau Tamana, Natuna bona Lauma Helaga, toiosi be Dirava tamona lalonai.
o Kara 2:4, 17 ese ia hahedinaraia lauma helaga be lauma tauna ta eiava gau ta, a?
Bema ita laloa namonamo inai siri ese hida idia gwauraidia, unai ese ita edena bamona ia durua? (Ioane 17:20-22; Kara 7:56; Apok. 7:10)
(2) Haida idia gwau “Toi Tamona” taudia toiosi edia siahu be hegeregere, ta ese ta ia hereaia lasi, toiosi be matamana lasi bona dokona lasi.
Bible ese unai lalohadai ia hamomokania, a? (Ioane 14:28; Mataio 24:36; Apokalupo 3:14 itaia.)
(3) Taunimanima haida idia gwau Ioane 1:1 ese “Toi Tamona” herevana ia hamomokania, idia gwau unai siri ena anina be “Hereva be Dirava,” “dirava ta” lasi.
To Ioane 1:1 ese hida ia gwauraidia? Toi? Eiava rua?
Ioane 1:18 ese danu “Toi Tamona” herevana edena bamona ia hakoikoia?
Danu, An American Translation ese ia hahedinaraia hegeregerena, Ioane 1:1 Motu gado dekenai torea dalana ma ta be inai: “Hereva be Dirava bamona,” anina be iena kara be Dirava ena hegeregeredia.
(4) Dubu oreadia momo ese Iesu idia herevalaia momo bona Iehova ena ladana be edia Bible momo amo idia kokia, unai dainai taunimanima momo idia laloa Iesu be Dirava.
To Iesu ia gwau daika sibona ita tomadiho henia be namo? (Luka 4:8)
11 Ena be Bible ia gwau Iesu be “Dirava hegeregerena,” bona “Siahu Bada Diravana” ia gwauraia, to ia ese ena Tamana ena ladana ia abia isi, “egu Dirava bona emui Dirava” ia gwauraia. (Ioane 1:1; 20:17; Isa. 9:6) Ia ese Mose ena hereva ia hamomokania, ia be gunaguna ia gwau: “Iehova be Dirava momokani; idauna ta be lasi.” (Deut. 4:35) Taunimanima ese kaivakuku, taunimanima bona Satana Diabolo idia tomadiho henidia, to Iehova be idia edia amo ia idau vaitani. Unai dainai Iesu ese ia gwauraia “Dirava momokani tamona.”—Ioane 17:3.
“IEHOVA ENA LADANA DEKENAI DO ITA RAKA”
12 Taunimanima momo be lagani momo lalodiai idia daradara daika be Dirava, unai dainai Dirava ena ladana korikori, Iehova, edia Bible lalonai idia itaia neganai, idia hoa bona idia moale bada. (Eso. 6:3) To inai diba ese ia hanamodia hanaihanai totona, namona be ‘Iehova ena ladana dekenai idia raka ela bona hanaihanai.’ (Mika 4:5) Ena be inai ladana “Iehova” idia diba bona idia gwau idia be Iehova ena Witness taudia, to unai sibona be hegeregere lasi.
13 Salamo 9:10 ese Dirava ena ladana ena anina inai bamona ia gwauraia: “Oiemu ladana idia diba taudia ese oi idia abidadama henia, . . . Iehova e.” Anina be dahaka? Ta be inai ladana, Iehova, ia diba sibona be hegeregere lasi, badina be idia diba taudia haida ese Iehova idia abidadama henia lasi. Inai siri lalonai, Dirava ena ladana ita “diba,” anina be Iehova ena kara toana ita diba, ena lohia siahuna ita matauraia bona ena oda ita badinaia. Unai hegeregerena, ‘Iehova ena ladana dekenai ita raka’ anina be sibona ita henia ia dekenai, ena tomadiho taudia hegeregeredia iena ladana ai ita hereva, bona iseda mauri ita gaukaralaia Dirava ena ura hegeregerena. (Luka 10:27) Oi be unai bamona oi karaia noho, a?
14 Iehova ena hesiai gaukara ita karaia be iseda maduna bamona, to bema inai maduna ita huaia lasi mai eda ura momokani danu, ena hesiai gaukara do ita karaia hanaihanai lasi. Paulo ese Timoteo ia hamaoroa, ia gwau: “Dirava ena ura kara do oi tahua bona do oi badinaia noho.” (1 Tim. 4:7) Bema Iehova bona ena kara ita laloa bada bona ia ita matauraia momokani, ena ura karadia do ita tahua bona do ita badinaia mai eda kudouna ibounai danu. Do ita lalokau henia bona do ita badinaia. Do ita ura taunimanima iboudiai ese iena ladana do idia matauraia. Iehova, Dirava momokani, ena ladana dekenai ita raka hanaihanai totona, namona be ena ura karadia ita tahua bona ita badinaia noho.—Sal. 37:4; 2 Pet. 3:11.
INAI HEREVALAIA LOU
● Iehova be edena bamona Diravana? Bema iena kara namodia idauidau ita diba, unai ese ita edena bamona ia durua?
● Ita ese taunimanima edena bamona ita durudia diba, Dirava idia diba maoromaoro totona?
● Iehova ita “diba” bona ‘ena ladana dekenai ita raka’ anina be dahaka?
[Study Questions]
1. (a) Dirava momokani be daika? (b) Ia ita dibaia noho lalonai, unai ese iseda mauri edena bamona ia haidaua?
2. Iehova ena kara badadia haida, idia dainai ia ita hanamoa gaudia, be dahaka dahaka?
3. Iehova ena kara namodia ma haida be dahaka dahaka?
4. (a) Iehova ia ura ita ese daika sibona ita tomadiho henia, bona unai be mai anina bada eiava? (b) Salamo 34:3 ese ita ia hamaoroa dahaka do ita karaia?
5. Iehova ena kara ita tahua neganai, edena henanadai edia haere tahua karana ese ita do ia durua bada?
6. Iehova ena lalokau karadia tahua dalana oi gwauraia hedinarai. Unai oi karaia totona, inai paragraph dokonai idia noho henanadai oi haerelaia bona Bible ena siri danu oi herevalaia.
7. (a) Tanobada taudia ese dahaka dirava idauidau idia tomadiho henidia? (b) Daika ese inai heiriheiri ia havaraia, bona dahaka dainai oi be unai bamona oi haere?
8. Tau ta durua Dirava ia diba maoromaoro totona, dalana namona be dahaka?
9. Dahaka dainai, “Toi Tamona” herevana ia abia dae tauna ta ita hereva henia neganai, namona be iseda lalona dekenai ita gwau lasi iena lalohadai ita diba vadaeni?
10. “Toi Tamona” herevana hakoikoia totona, inai hereva badadia ta ta oi herevalaia; inai paragraph murinai idia torea henanadai bona Bible siridia oi gaukaralaia.
11. Dahaka dainai Iesu ese ena Tamana na “Dirava momokani tamona” ia gwauraia be maoro?
12, 13. Iehova ena ladana ita “diba” bona ia ‘dekenai ita raka,’ anina momokani be dahaka?
14. Ita diba iseda maduna be Iehova ena hesiai gaukara ita karaia, to ita karaia hanaihanai totona, dahaka danu ita laloa be namo?