Karoa 6
Inai Hepapahuahu amo Ita Siri Diba Lasi
GWAU-EDEEDE be Eden lalonai ia vara neganai, hepapahuahu badana ia vara, bona ia be mai anina taunimanima iboudiai dekenai. Satana ese Eva ia koia gwauraia dainai ia nanadaia, ia gwau: “Momokani, uma gabu ena au huahua ta ania lasi taravatu Dirava ese ia atoa o lasi?” Eva ia haere, ia gwau Dirava ese au tamona inai bamona ia taravatua, ia gwau: “Unai au ena huahua umui ania lasi, bona dogoatao lasi, umui mase garina.” Bena Satana ese Iehova ia samania, ia gwau ia be koikoi tauna. Ma ia gwau Eva bona Adam bema Dirava idia kamonai henia lasi do idia mase lasi. Ia gwau, taunimanima be sibodia edia taravatu idia atoa be namo to Dirava ese ia koudia unai hahenamo do idia abia lasi totona. Satana be ma ia gwau: “Dohore umui mase lasi. Dirava be inai bamona ia hereva badina ia diba, umui ania neganai aonega do umui davaria, bona Dirava bamona do umui noho, kara namona bona kara dikana do umui diba.” (Gen. 3:1-5) Satana ese Eva ia koia bena ia laloa ia be sibona ena lalohadai ia karaia be namo. Unai dala amo Satana ese Dirava ena lohia siahuna bona Iena lohia dalana ia maumauraia bona ia hepapahuahulaia.
2 Bema Eva ese Iehova ia lalokau henia, dika ia davaria lasi. Bema ena adavana ena kwara dagina ia matauraia, ia kara kerere lasi. To ia ura hahenamo ta ia abia haraga. Taravatu gauna ia ura henia. Satana ese ia koia vaitani dainai Dirava ena taravatu ia utua. Bena Adam ia hakererea. Ena be Satana ese unai tau ia koia lasi, to ia danu ese Dirava ena lalokau ia laloa maragi. Dirava ena kwara dagina ia matauraia lasi to ena gwau-edeede adavana ia badinaia.—Gen. 3:6; 1 Tim. 2:13, 14.
3 Unai kerere be Eden dekenai ia vara murinai Satana ese Iehova ena lohia siahuna ia hadikaia noho. Ia laloa unuseniai ia kwalimu, unai dainai ma haida ia samanidia, ia gwau Iehova idia badinaia momokani lasi. Adam ena bese taudia sibodia lasi, to Dirava ena lauma natudia, ena vara guna lalokau Natuna danu, be ia ese unai bamona ia samanidia. Iobu ena negai, Satana ia gwau Iehova idia tomadiho henia taudia ese idia tomadiho henia ena badina tamona be, Dirava bona ena lohia dalana idia lalokau henia lasi, to sibodia edia namo idia tahua dainai. Ia gwau, do ia hahisidia neganai iboudiai be sibodia edia ura do idia gavaia. Vadaeni, iena hereva be momokani, eiava?—Iobu 1:6-12; 2:1-6; Apok. 12:10.
HAIDA EDIA KARA
4 Iehova ia gwau lasi ma haida ese Satana do idia badinaia lasi ena gwau-edeede karana lalonai. Eden dekenai ia hahemaoro henia neganai, Dirava ese ‘gaigai ena garana’ ai do idia lao taudia ia gwauraidia. (Gen. 3:15) Farisea taudia bona Iuda Iskariote, Keriso ena mase idia tahua taudia, be unai orea lalonai. Ena be dala maorona idia diba, to mai edia ura danu Iehova bona ena hesiai taudia idia inai henidia. To, taunimanima momo herea be Iehova ena ura idia karaia lasi, badina be idia diba lasi dainai.—Kara 17:29, 30.
5 To abidadama taudia, tatau bona hahine, edia kara be idau vaitani. Dirava dekenai diba idia tahua bona Ia idia badinaia edia Pavapava bamona. Dirava ena hereva idia abia dae. Idia diba idia mauri totona ia idia kamonai henia be namo. Noa be unai bamona tauna. Dirava ese Noa ia hamaoroa, ia gwau: “Mauri gaudia ibounai do lau haorea . . . lagatoi namona ta, au namodia dekenai oi haginia,” bena Noa ese Iehova ena oda ia badinaia. Ena be Noa ese taunimanima oredia ia hadibadia, to edia kara idauidau idia karaia noho, badina be idia laloa gau ta do ia vara lasi. To Noa ese lagatoi badana ia karaia bona Iehova ena dala maoromaorodia ia harorolaidia noho. Bible ia gwau: “Bona Noa be inai bamona ia karaia, Dirava ena hereva ibounai hegeregere.”—Gen. 6:13-22; Heberu 11:7 bona 2 Petro 2:5 danu itaia.
6 Unai kara maoromaoro taudia ese danu kwara dagi idia matauraia bada bona Iehova idia lalokau henia. Idia be Eva bamona lasi, ia ese ena adavana ia gunalaia, bona idia be Adam bamona lasi, ia ese Iehova ena taravatu ia laloa lasi. Sara, Abraham ena adavana, be haheitalai namona ta. Ena hereva dekenai bona ena kudouna lalonai Abraham be ena “lohia.” Danu, ia ese Iehova ia lalokau henia, bona ia be abidadama hahinena. Ia be Abraham danu ‘hanua badana ta [Dirava ena Basileia] idia naria. Unai hanua be mai ena nadi badina aukana bona mai goadana. Unai hanua be Dirava ese iena palani hegeregerena ia karaia, bona ia haginia danu.’—1 Pet. 3:5, 6; Heb. 11:10-16.
7 Abraham ese ena tano korikori ia rakatania bena lagani 430 bamona murinai Mose ese Iehova ena lohia dagina ia abia isi Egypt ena Farao vairanai. Mose ia lalo-manau bona ia laloa ia hereva namonamo diba lasi, to Iehova ia kamonai henia. Iehova ese ia hagoadaia bona ena kakana Aaron ese ia durua dainai, Mose ese Iehova ena hereva Farao dekenai ia henia loulou. Farao ena lalona ia auka. Israel taudia haida ese Mose idia gwau dika henia. To Mose ese Iehova ena oda ibounai ia karaia, bona iena amo Israel taudia Egypt amo ia hamauridia.—Eso. 7:6; 12:50, 51.
8 Iehova idia badinaia taudia be edia lalona dekenai idia gwau lasi buka dekenai idia torea taravatudia sibodia idia badinaia be hegeregere. Potifara ena adavana ese Iosef ia dibagania idia heudahanai totona neganai, Dirava ena taravatu heudahanai dekenai be buka dekenai do idia torea vadaeni lasi. To Iosef ia diba Iehova ese headava dalana Eden dekenai ia haginia, unai dainai ia diba bema tau ta ena adavana danu idia heudahanai, Dirava be do ia badu. Iosef ia ura lasi Egypt taudia ia tohotohodia bona Dirava ena haheauka ia dekenai ia tohoa. Iehova ena dala ia badinaia, badina be Dirava ese taunimanima dekenai ia karaia karadia ia laloa namonamo bena ena diba hegeregerena Dirava ena ura ia badinaia.—Gen. 39:7-12; Salamo 77:11, 12 danu itaia.
9 Iehova idia diba momokani taudia, ena be edia kamonai idia tohoa dikadika, to idia rakatania lasi. Iehova ese Iobu ia heagilaia neganai, Satana ia gwau bema Iobu ena kohu ia haboioa o bema ia hahisia, Dirava do ia rakatania. To Iobu ese Diabolo ena hereva ia hakoikoia; ena be ena hisihisi ibounai ena badina ia diba lasi, to unai bamona ia karaia. (Iobu 2:3, 9, 10) Gabeai, Satana be sibona ena hereva ia hamomokania toho noho dainai, Babulono ena pavapava ia doria Heberu uhau toi ia hagaridia totona. Pavapava ia badu dikadika dainai, ia gwau bema ia haginia kaivakukuna idia tomadiho henia lasi, lahi dekenai do idia mase. Pavapava ena oda idia dadaraia bona Iehova ena taravatu kaivakuku tomadiho henia karana dekenai idia badinaia. Mai edia goada danu pavapava idia hamaoroa Iehova ena hesiai gaukara idia karaia bona ia be edia Atai Herea Pavapavana. Dirava badinaia karana idia laloa bada, mauri idia laloa maragi.—Dan. 3:14-18.
10 Anina be goevadae taudia sibodia ese Iehova idia badinaia diba, a? Kerere ta ia karaia tauna be hegeregere lasi, a? Lasi vaitani! Bible ia gwau Mose be nega haida ia kara kerere. Iehova ese Mose ia badu henia, to ia dadaraia lasi. Aposetolo taudia, ena be edia kara haida be namo herea, to idia be mai edia manoka idauidau. Taunimanima ta ese Dirava ia badinaia totona, namona be ena kudouna amo ia kamonai henia. To Iehova ia diba ita be Adam ena bese taudia dainai ita goevadae lasi, unai dainai bema iena ura be dala ta ai ita dadaraia lasi mai eda ura danu, do ia moale. Bema ita manoka dainai kara dika ita karaia, gau badana be ita helalo-kerehai momokani bona ita karaia loulou lasi. Unai amo ita hahedinaraia Iehova ese ia gwauraia namo gaudia ita ura henidia momokani bona ia gwauraia dika gaudia ita inai henidia momokani. Iesu ena boubou gauna ena dika kokia siahuna bema ita abidadama henia, Dirava ena matana dekenai iseda lalona idia goeva.—Amos 5:15; Kara 3:19; Heb. 9:14.
11 To, reana taunimanima be hegeregere lasi Dirava do idia badinaia goevagoeva, a? Lagani 4,000 lalodiai unai henanadai ena haere be “hunia gauna.” (1 Tim. 3:16) Adam, ena be Dirava ese ia havaraia neganai ia goevadae, to Dirava ia badinaia goevagoeva lasi. Daika be hegeregere? Iena natudia iboudiai be mai edia kara dika dainai idia danu be hegeregere lasi. Iesu Keriso sibona be hegeregere. Iesu ia kwalimu dainai, ia hahedinaraia bema Adam ia ura ia danu be kara maoromaoro ia badinaia goevagoeva diba. Kerere be Dirava ena gaukara lalonai lasi. Unai dainai, Dirava ena taravatu badinaia karana dekenai bona Lohia Badana Iehova lalokau henia karana dekenai Iesu ita tohotohoa be namo.
ITA TA TA EDA HAERE BE DAHAKA?
12 Ita ta ta ibounai be inai hepapahuahu badana amo ita siri diba lasi. Bema ita hereva hedinarai ita gwau Iehova ita badinaia, Satana ese ita ia tuari henia. Dala idauidau amo hahetoho ia havaraia, bona unai bamona do ia karaia noho ela bona ena nega dikana ia ore. Namona be ita gima noho. (1 Pet. 5:8) Iseda kara amo ita hahedinaraia edena kahana dekenai ita gini inai hepapahuahu lalonai.
13 Ena be kamonai lasi karadia be momo tanobada dekenai, to ita gwau lasi unai be gau maragina sibona. Kara maoromaoro ita badinaia totona, namona be Iehova ena dala maorodia ita badinaia, iseda kara iboudiai lalodiai. Inai haheitalai mani oi laloa:
(1) Satana ese hereva koikoi ta amo iseda tubudia ginigunadia ia hakereredia. “Koikoi ibounai edia tamana” ai ia lao. (Ioane 8:44)
Edena dala amo memero kekeni be nega haida edia tamadia bona sinadia idia koidia? Dahaka dainai Keristen memero bona kekeni be unai bamona idia karaia lasi be gau badana? (Her. 6:16-19)
Tau ta be edena bisinesi karadia ia karaia neganai ia hahedinaraia ia be “koikoi ibounai edia tamana” ena, hereva momokani Diravana ena lasi? (Mika 6:11, 12)
Bema sibona eda kara namo ita heagilaia koikoi, to ta ita hadikaia lasi, unai be kerere, eiava? (Sal. 119:163; Kara 5:1-11 danu itaia.)
Bema ta be kara dika rohorohona ia karaia, dahaka dainai hereva koikoi amo unai kara ita hunia toho lasi be gau badana? (Her. 28:13)
(2) Satana ese Eva ena lalona ia ania, ia bona Adam be sibodia edia lalohadai hegeregerena do idia gwau dahaka be namo bona dahaka be dika. Ena hereva idia badinaia neganai idia karaia karana ginigunana be henao. Henao taudia ai idia lao.
Bema ta be ogogami dainai ia henao, o bema ena gau ia henaoa tauna be mai ena kohu momo, henao tauna ia kerere lasi, a? (Her. 6:30, 31; 1 Pet. 4:15)
Bema iseda gabu dekenai taunimanima momo idia henaohenao, eiava ita henaoa gauna be gau maragina sibona, ita henao be kerere bada lasi, a? (Roma 12:2; Ef. 4:28; Luka 16:10)
14 Keriso be lagani 1,000 lalonai do ia lohia neganai, Satana bona ena demoni be guri dobu masemasena lalonai do idia noho. Unai be namo herea! To lagani 1,000 idia ore murinai, nega sisina do idia ruhadia. Satana bona idia badinaia taudia ese “helaga taudia,” Dirava ese ia hanamodia lou bona kara maoromaoro idia badinaia noho taudia, do idia tuari henidia. Satana ese Dirava “ia lalokau henia hanuana,” guba Ierusalem Matamatana, ia tuari henia totona, tanobada dekenai ia havaraia kara maoromaorona do ia haorea toho.—Apok. 20:7-10.
15 Reana unai neganai Satana do ia karaia gunaguna ia karaia bamona; taunimanima do ia koidia bona edia lalona do ia ania, sibodia edia ura idia tahua totona bona idia hekokoroku totona, unai amo do ia veridia Iehova idia dadaraia totona. Bema unai neganai ita noho, ita ta ta be edena bamona do ita karaia? Inai hepapahuahu badana lalonai iseda kudouna ese daika do idia badinaia? Unai neganai taunimanima iboudiai idia goevadae vadaeni; bema ta be kamonai lasi karana ta ia karaia, anina be sibona ena ura dainai ia karaia; unai dainai mase hanaihanai do ia abia. Unai neganai Dirava ita badinaia totona, gau badana be hari ia badinaia karana dekenai ita manada. Namona be Iehova ese ita ia henia haheganidia iboudiai ita badinaia haraga mai eda momokani danu, herevana unai hahegani be Bible amo o ena orea amo idia mai! Unai bamona ita karaia neganai, ita hahedinaraia ita lalokau henia momokani, iseda Lohia Badana hegeregerena.
INAI HEREVALAIA LOU
● Guba taudia iboudiai bona tanobada taudia iboudiai vairadiai ia hedinarai hepapahuahu be dahaka? Ena anina ita dekenai be dahaka?
● Rau 49 dekenai idia hedinarai tatau bona hahine ese Iehova edena bamona idia badinaia namonamo?
● Dahaka dainai dina iboudiai ita naria namonamo be gau badana, iseda kara amo Iehova ita hanamoa totona?
[Study Questions]
1. (a) Eden lalonai Satana ese dahaka ia hepapahuahulaia matamaia? (b) Edena hereva amo unai hepapahuahu ia hamatamaia?
2. Adam bona Eva be dahaka idia karaia be namo bena dika idia davaria lasi?
3. (a) Satana ese Iehova ena lohia siahuna ia hadikaia toho neganai, dahaka samani herevana ma ta ia gwauraia? (b) Ia ese daidia ia samanidia?
4. Dahaka dainai taunimanima momo ese Iehova ena lohia siahuna idia abia isi lasi?
5. (a) Iehova idia badinaia taudia be Eva bamona lasi, to dahaka idia laloa Iehova ena hereva dekenai? (b) Noa be edena bamona ia hamomokania Dirava ia badinaia, bona ena haheitalai ese ita edena bamona ia durua diba?
6. (a) Kara maoromaoro idia badinaia taudia edia kara namodia ma haida be dahaka? (b) Sara ese unai kara namodia edena bamona ia hahedinaraia, bona ena haheitalai ese ita edena bamona ia durua diba?
7. (a) Daika vairanai Mose ese Iehova ena lohia siahuna ia abia isi? (b) Iena haheitalai ese ita edena bamona ia durua diba?
8. (a) Dahaka ese ia hahedinaraia Iehova badinaia karana anina be Dirava ena taravatu buka dekenai idia torea badinaia karana sibona lasi? (b) Inai bamona kamonai ita laloa namonamo neganai, unai ese ita edena bamona ia durua, 1 Ioane 2:15 ita badinaia totona?
9. Dahaka ese ia hahedinaraia loulou Diabolo ena samani herevana Iobu ena negai ia halasia be hereva koikoi?
10. Edena dala amo ita goevadae lasi taunimanima ita hamomokania diba Iehova ita badinaia momokani?
11. (a) Taunimanima bogaragidiai daika sibona ese Dirava ia badinaia goevagoeva, bona unai ese dahaka ia hamomokania? (b) Ia karaia karana ese ita edena bamona ia durua?
12. Dahaka dainai ita be hanaihanai ita naria namonamo be namo, lalohadai maorona Iehova ena lohia siahuna dekenai ita dogoatao totona?
13. (a) Hereva koikoi bona henaohenao be edena bamona idia matamaia, unai dainai ita dadaraia be namo? (b) Inai paragraph ena dokonai idia noho henanadai ese taunimanima edia hekwakwanai gabudia idauidau idia henanadailaia; mani idia ta ta oi haerelaia.
14, 15. (a) Keriso ena lagani 1,000 lohia negana ena dokonai taunimanima iboudiai ese dahaka hahetoho do idia davaria?
(b) Hari inai negai dahaka ita karaia be namo, unai neganai ita kwalimu totona?
[Pictures on page 49]
IEHOVA ENA LOHIA SIAHUNA IDIA ABIA ISI
NOA
SARA
MOSE
IOSEF
IOBU
Edia Haheitalai ese Ita Edena Bamona Ia Durua?