Karoa 17

“Umui Lalokau Heheni mai Emui Lalona Ibounai”

TAUNIMANIMA be Iehova ena Witness taudia edia kongregesen heboudia dekenai idia vareai matamata neganai, idia momo idia hoa, lalokau bada ena toana be unuseniai idia itaia dainai. Idia itaia, iseda orea taudia idia hebamo heheni mai edia lalokau danu, bona unai vareai matamata taudia idia abidia dae danu.

² Iseda hebouhebou badadia dekenai idia vareai taudia ese danu idia itaia, kahirakahira hebouhebou taudia iboudiai be kara namo sibona idia karaia. Niuspepa ena toretore tauna ta ese unai bamona hebouhebou ta inai bamona ia torelaia: ‘Taunimanima ta ia kekero lasi. Ta ia boiboi bada lasi. Ta ese ma ta ia doria siri lasi. Hadikaia herevadia be lasi. Hevaseha herevadia dikadia bona hereva mirodia be lasi. Kuku ena kwalahu be lasi. Henaohenao be lasi. Tini be stediam ena rei gabuna dekenai idia negea kava lasi. Edia kara be idau vaitani.’ Inai ibounai be lalokau ena toana, inai bamona lalokau be ‘haida hadikaia ia ura lasi bona sibona ena gau ia tahua lasi.’—⁠1 Kor. 13⁠:4-8.

³ Keristen korikori taudia iboudiai ese lalokau idia hahedinaraia. (Ioane 13⁠:35) Lauma dalanai ita tubu noho lalonai, iseda lalokau ita habadaia be namo. Aposetolo Paulo ia guriguri iena tadikaka edia lalokau “be do ia bada lao noho.” (Fil. 1⁠:9; 1 Tes. 3⁠:12) Petro ese danu ena Keristen turadia ia hamaorodia namona be ‘Keristen taudia ibounai do idia lalokau henia.’ (1 Pet. 2⁠:17) Iseda lalokau dainai namona be hebou dekenai ita lao sibona lasi bona unuseniai ita davaridia taudia be hereva tamona amo ita hanamodia sibona lasi, to dala ita tahua be namo, ita tura henidia momokani totona. Aposetolo Ioane ia hahedinaraia iseda lalokau dainai ita be sibona ita henia boubou gauna ta bamona. Ia gwau: “Lalokau ena toana be inai kara dekena amo do ita diba: Keriso ese ita dainai iena mauri ia atoa diho. Unai dainai ita ese iseda tadikakana dainai iseda mauri ita atoa diho danu be namo.” (1 Ioane 3⁠:16; Ioane 15⁠:12, 13) Ema bona hari ita be unai do ita karaia lasi. To iseda lalona be momokani idia hegeregere iseda tadikaka dainai iseda mauri do ita henia, a? Vadaeni, hari inai nega lalonai ita be edena bamona ita hekwarahi iseda tadikaka durudia totona?

⁴ Namona be iseda kara amo ita hahedinaraia sibona eda gau ita tahua lasi, bona gau badana be iseda tadikaka ita lalokau henidia momokani. Bible ia gwau: “Umui ta ta do umui lalokau henia, tadikaka edia lalokau ta ta dekenai bamona.” (Roma 12⁠:10) Ita ibounai ese taunimanima haida unai bamona ita lalokau henidia. Vadaeni, ma haida danu be unai bamona do ita lalokau henidia diba, a? Inai nega gunana ena dokona ia mai kahirakahira noho lalonai, gau badana be iseda Keristen tadikaka ita tura henidia momokani. Bible ese ita ia hadibaia, inai bamona do ita karaia, ia gwau: “Gau iboudiai edia dokona be kahirakahira.  .  .  .  Gau badana be inai: umui lalokau heheni mai emui lalona ibounai, badina be lalokau ese kara dika momo ia koua.”—⁠1 Pet. 4⁠:7, 8, NW.

⁵ To, momokani, do ita goevadae lasi negana lalonai, nega ta ta iseda kara amo haida do ita habadudia. Idia danu be dala idauidau amo ita do idia kara dika henia. (1 Ioane 1⁠:8) Bema unai bamona hekwakwanai be oi dekenai ia vara, dahaka oi karaia be namo?

HEKWAKWANAI KOKIA DALANA

⁶ Bible ese ita ia hadibaia edena bamona do ita karaia inai gau dekenai. To reana ena sisiba be ita goevadae lasi taunimanima eda ura hegeregerena lasi. (Roma 7⁠:21-23) To herevana, bema unai sisiba ita badinaia toho, ita hahedinaraia ita ura momokani Iehova ita hamoalea, bona iseda lalokau ta ta dekenai do ia bada ia lao.

⁷ Nega haida taunimanima ese dala idia tahua, ia kara dika henidia tauna ena davana idia henia totona. To unai ese unai dika ia habadaia sibona. Bema ta ese ena dika davana ia abia be namo, namona be kara ta ita karaia lasi ia dekenai, to Dirava sibona ese ia henia be namo. (Her. 24⁠:29; Roma 12⁠:17-21) Ma haida ese ia kara dika henidia tauna do idia dadaraia momokani toho reana. To iseda tomadiho orea taudia unai bamona ita kara henidia be maoro lasi. Dirava ese iseda tomadiho ia abia dae totona, namona be iseda tadikaka ita lalokau henidia. (1 Ioane 4⁠:20) Bema ita ura lasi tau ta ita hereva henia, o ia be ita kahirakahira dekenai ia noho neganai bema ita badu, ita be momokani ita gwau diba ita lalokau henia, a? Lasi, ani? Namona be unai hekwakwanai ita kokia toho. Edena dala amo?

⁸ Aposetolo Paulo ese inai gau inai bamona ia sisibalaia, ia gwau: “Bema tau ta ese ena bamona tauna ia maumauraia, ia kara dika henia dainai, namona be unai dika do ia gwauatao. Lohiabada ese umui emui dika ia gwauatao, vadaeni unai bamona do umui karaia danu.” (Kol. 3⁠:13) Oi be unai bamona oi karaia diba a? To bema unai tau be dala idauidau amo oi ia kara dika henia loulou be edena bamona?

⁹ Aposetolo Petro be unai bamona ia henanadai, ia gwau reana namona be ena tadikaka ena kara dika do ia gwauatao ela bona nega 7. Iesu ia haere inai bamona: “Umui lau hamaoroa, nega 7 sibona lasi, to nega 70  x  7.” To dahaka dainai? Parabole ta amo Iesu ese ia hahedinaraia ita eda abitorehai Dirava dekenai be bada herea, to ma taunimanima haida edia abitorehai ita dekenai be maragi herea. (Mat. 18⁠:21-35) Dina ta ta iboudiai ita be dala idauidau amo Dirava ita kara dika henia—⁠nega haida sibona eda ura tahua karana ta amo, nega momo iseda hereva o lalohadai amo o kara namona ita reaia dainai. Reana ita lalo-parara lasi dainai ita diba lasi iseda kara be dika, o reana gau momo ita lalo-hekwarahilaia dainai iseda kara ita naria namonamo lasi. Bema Dirava ia ura, ia ese iseda mauri ia kokia diba, iseda kara dikadia edia davana. (Roma 6⁠:23) To ita ia hebogahisi henia noho. (Sal. 103⁠:10-14) Vadaeni, ita ia oda henia ita be ta ta dekenai unai bamona ita karaia, be maoro. (Mat. 6⁠:14, 15; Ef. 4⁠:1-3) Unai bamona ita karaia neganai, iseda badu ita dogoatao lasi, to ita hahedinaraia ita be mai eda lalokau momokani. Inai bamona lalokau be “haida ese idia kara dika henia, to  .  .  .  edia dika ia laloatao noho lasi.”—⁠1 Kor. 13⁠:4, 5; 1 Pet. 3⁠:8, 9.

¹⁰ Nega haida, iseda tadikaka ta ita badu henia lasi to mamina ita abia ia ese ita ia badu henia. Vadaeni, dahaka ita karaia be namo? Namona be kara haraga ita hereva henia, ia dekenai ita maino karaia lou totona. Bible ia gwau namona be kara ginigunana ita karaia be namo. (Mat. 5⁠:23, 24) Reana unai ita karaia be auka. Unai bamona ita karaia totona, namona be lalokau bona lalo-manau ita hahedinaraia. Unai kara ruaosi oi goadalaia dainai Bible ena sisiba oi badinaia diba, a? Namona be unai gau oi tahua badina be ia be mai anina bada.

¹¹ To reana oiemu hekwakwanai be idau; reana ta ena kara ese oi ia habadua bona ma haida ia habadudia danu. Reana umui ta ese ia hereva henia be namo a? Sedira. Bema mai emu hebogahisi danu iena kerere oi gwauraia hedinarai ia dekenai, reana unai kara do ia hadokoa. To mani sibomu dekenai inai bamona oi henanadai guna: ‘Iena kara amo ia be momokani Bible ena taravatu ia utua a? Eiava reana iena kara lau badulaia badina be lauegu bese taudia edia mauri dalana be idau bona iena bese ena be ma ia idau, a?’ Bema unai bamona, namona be oi naria namonamo, sibomu emu taravatu oi haginia bena unai taravatu hegeregerena tau ta oi gwauraia kerere garina. (Iak. 4⁠:11, 12) Iehova ese taunimanima idauidau mai edia mauri daladia idauidau iboudiai ia abidia dae bona ia haheauka henidia, lauma dalanai idia tubu noho lalonai.

¹² To bema kongregesen tauna ta ese kara dika badana ta ia karaia, namona be iena kara idia tahua namonamo. Daidia ese? Nega momo elda taudia ese. To bema unai kerere be tadikaka rua padadiai ia vara edia bisinesi dekenai, o bema ta ese ena hereva amo ma ta ia hadikaia, vadaeni kerere tauna ese ia kara dika henia tauna sibona ese kerere tauna ia durua toho guna be namo. Reana haida idia laloa unai bamona idia karaia be auka. To Iesu be unai bamona sisiba ia henia, Mataio 18⁠:15-17 dekenai. Bema ta ese ena tadikaka, kerere tauna, ia lalokau henia bona bema ia ura ia danu idia tura heheni noho tadikaka bamona, do ia hereva henia namonamo, ena kudouna veria totona.—⁠Her. 16⁠:23.

¹³ Hekwakwanai ta ia vara neganai, herevana ia bada eiava ia maragi, to Iehova ena lalohadai unai gau dekenai ita tahua be namo. Ia ese kara dikana ta ia moalelaia diba lasi, to kara dika be ita ibounai lalonai ia itaia noho. Iena nega korikori dekenai, kara dika idia karaia loulou bona idia helalo-kerehai lasi taudia be iena orea amo do ia kokidia. To unai bamona ita karaia lasi taudia be edena bamona? Ia ese ita ia haheauka henia bona ia hebogahisi henia noho. Unai kara namodia ia haheitalaia, ita danu be unai bamona ita karaia totona. Unai bamona ita karaia neganai iena lalokau ita hahedinaraia.—⁠Ef. 5⁠:1, 2.

“HABADAIA” DALANA OI TAHUA

¹⁴ Aposetolo Paulo be hua momo lalodiai Korinto ena kongregesen ia hagoadaia noho. Ia hekwarahi bada unai tadikaka durudia totona, bona ia lalokau henidia. To idia haida ese ia idia lalokau henia lasi. Idia maumauraia momo. Ia hamaorodia namona be edia lalokau ia dekenai idia “habadaia.” (2 Kor. 6⁠:11-13; 12⁠:15) Namona be ita ta ta ibounai ese iseda lalokau ma haida dekenai ena bada ita laloa namonamo bona dala ita tahua ita “habadaia” totona.—⁠1 Ioane 3⁠:14; 1 Kor. 13⁠:3.

¹⁵ Kongregesen taudia haida be ita tura henidia momokani be auka a? Bema edia kerere maragidia ita gwauatao, ita ura iseda kerere idia gwauatao hegeregerena, unai amo ita be idia danu do ita turana karaia diba. (Her. 17⁠:9; 19⁠:11) Danu, bema edia kara namodia ita laloa momo, do ita lalo-namo henidia diba. Iehova ese inai tadikaka ia gaukaralaidia dalana be ita laloa vadaeni, a? Inai ese momokani iseda lalokau do ia habadaia idia dekenai.—⁠Luka 6⁠:32, 33, 36.

¹⁶ Momokani, ma haida durudia karana be mai ena hetoana. Reana hebou taudia ta ta iboudiai be nega iboudiai ita hanamodia diba lasi. Reana haida sibodia ita boiridia diba, ita danu idia aniani hebou totona. Haida ita bamodia momo, ma haida be unai bamona lasi. To, iseda lalokau “habadaia” dalana ta ia noho eiava? Pura iboudiai, miniti momo lasi lalodiai, ita be iseda kongregesen tauna ta, ema bona hari ita tura henia lasi tauna, be ita hereva henia diba, ia ita diba totona, a? Reana inai bamona taudia ta be nega ta ta ita boiria be namo, ia be ita danu haroro gaukara lalonai ita gaukara hebou totona, a? Bema ita be momokani ita lalokau heheni mai iseda lalona ibounai danu, dala do ita davaria iseda lalokau ita hahedinaraia totona.

¹⁷ Keristen hebouhebou badadia dekenai ita be mai eda dala idauidau, iseda lalokau do ita “habadaia.” Reana taunimanima momo herea idia hebou. Ita be idia ta ta iboudiai danu ita hedavari heheni diba lasi. To, ena be idia momo ita diba lasi, to iseda kara amo ita hahedinaraia diba edia namo ita tahua guna, sibona eda namo be gabeai. Bona hebouhebou ena laga-ani negadiai ita badinai idia gini o idia helai taudia ita hereva henidia be namo, idia ita diba totona. Vaira negana lalonai, tanobada dekenai do idia noho taudia iboudiai be tadikaka bona taihu bamona do idia noho, idia iboudiai edia Dirava bona Tamana do idia tomadiho henia mai edia lalo-tamona danu. Idia iboudiai mai edia kara idauidau be do ita dibadia neganai do ita moale bada herea! Mai iseda lalona ibounai danu do ita lalokau henidia dainai, do ita ura ita diba idia. Vadaeni, namona be hari ita be unai bamona ita kara henidia matamaia, ani?

INAI HEREVALAIA LOU

● Hekwakwanai be tadikaka o taihu padadiai idia vara neganai, dahaka idia karaia be namo? Badina be dahaka?

● Lauma dalanai ita tubu noho lalonai, iseda lalokau danu be edena dala idauidau amo ia tubu be namo?

● Iseda tura korikoridia sibodia lasi to ma taunimanima haida danu be edena bamona ita lalokau henidia diba mai iseda lalona ibounai danu?

[Study Questions]

1, 2. (a) Nega momo, Iehova ena Witness taudia edia hebou dekenai idia vareai matamata taudia be dahaka idia hoalaia?

(b) Inai kara be edena bamona ia hedinarai iseda hebouhebou dekenai bena idia ese idia itaia bona idia laloa?

3. (a) Iseda lalokau be edena bamona ia lao be namo? (b) Keriso ita tohotohoa totona, edena bamona lalokau ita hahedinaraia toho be namo?

4. (a) Edena dala ma ta amo iseda lalokau do ita habadaia diba reana? (b) Dahaka dainai ita be mai eda lalona ibounai danu ita lalokau heheni be mai anina bada?

5. Hekwakwanai be kongregesen taudia padadiai idia vara neganai, dahaka dainai ita be unai dekenai ita hoa lasi be namo?

6. (a) Dahaka dainai nega haida Bible ena sisiba be iseda ura hegeregerena lasi? (b) To bema ena sisiba ita badinaia, dahaka do ia vara?

7. (a) Bema ta ese ita ia kara dika henia, dahaka dainai ena davana ita henia toho lasi be namo? (b) Dahaka dainai iseda tadikaka, ita ia habadua tauna, ita dadaraia lasi be namo?

8, 9. (a) Bema tadikaka ta ita samania be mai badina, dahaka ita karaia be namo? (b) To bema ita ia kara dika henia loulou vadaeni, be edena bamona? (c) Dahaka dainai inai bamona ita karaia be namo, bona dahaka ese ita do ia durua, inai bamona ita karaia totona?

10. Bema tadikaka ta ia badu ita dekenai, dahaka ita karaia be namo?

11. Bema iseda tadikaka ta ena kara dainai ita badu, dahaka ita karaia be namo?

12. (a) Bema kara dika badana ta be kongregesen lalonai ia vara, daidia ese idia tahua namonamo? (b) To dahaka kara dainai kerere tauna be ia kara dika henia tauna ese kara ta ia karaia guna be namo? Dahaka totona ia karaia?

13. Bema hekwakwanai ta be ita bona tadikaka ta padanai ia vara, dahaka ese ita do ia durua lalohadai maorona unai gau dekenai ita abia totona?

14. (a) Dahaka dainai Paulo ese Korinto taudia ia hamaorodia edia lalokau idia “habadaia” be namo? (b) Bible ena siri, inai paragraph lalonai ai torea, ese edena bamona idia hahedinaraia ita ibounai ese inai kara ita laloa be namo?

15. Ena be reana haida ita ura henidia lasi, to dahaka ese ita ia durua diba ita lalokau henidia totona?

16. Iseda lalokau be edena bamona ita “habadaia” diba iseda kongregesen taudia dekenai?

17. Iseda tadikaka, ita diba lasi taudia, bogaragidiai ita noho neganai, dahaka do ia hahedinaraia ita be mai iseda lalona ibounai danu ita lalokau henidia o lasi?