Karoa 9
Daika ese Ita Ia Hakaua Lao Hahemauri Dekenai?
DIRAVA ese inai tanobada dikana amo bona “hisihisi badana” amo ita ia hamauria totona, namona be Iesu ita abia dae iseda hakaua tauna, bona ita hamomokania ita kamonai henia momokani bona ia murinai ita raka. (Kara 4:12) Iehova ese lagani 1513 B.C.E. ai Israel taudia na Egypt amo ia hamauridia neganai idia vara gaudia ese inai idia hahedinaraia goevagoeva. Hoa dalanai Iehova ese Israel Davara Kakakakana amo ia hakaudia hanai bona Egypt ena tuari oreana ia hadikaia ore. Inai ibounai lalonai, Dirava ese Mose ia hagaukaraia iena orea taudia hakaudia totona.—Iosua 24:5-7; Esodo 3:10.
2 Israel taudia ese Egypt idia rakatania bona Gwauhamata Tanona idia lao henia neganai, Egypt taudia bona idau bese taudia be idia danu idia lao. Mose ia gwau: “Orea idau-idau taudia momo herea danu idia bamoa lao.” (Esodo 12:38) Iehova ese dagedage besena Egypt ia hahisia loulou negadiai, unai taudia ese unai idia itaia bona unai dainai Iehova idia gari henia. Unai hisihisi amo ia hahedinaraia ia mo sibona be Dirava momokani bona Egypt taudia edia dirava koikoidia ese idia hamauridia diba lasi. Unai orea idauidau taudia ese danu “aniani namodia gabuna” ena sivarai idia moalelaia. (Esodo 3:7, 8; 12:12) To idia abia dae momokani Mose be Dirava ese ia abia hidi, Iena bese taudia edia lohia bona hahemauri tauna, a? Nega sisina murinai gau ta ese edia kamonai ia tohoa.—Kara 7:34, 35.
3 Israel, mai unai “orea idau-idau taudia momo herea danu,” be Davara Kakakakana kahirakahira dekenai idia ginidae neganai, Egypt ena king mai ena tuari oreadia ese idia gavadia, idia abidia bona edia hesiai taudia ai ma idia halaodia lou totona. Namona be Mose idia kamonai henia, idia roho mauri totona, badina be Iehova ese Mose ena amo ia hakaudia noho. Iehova ese ori amo edia inai taudia edia dala ia koua, bena davara ia hapararaia bona ia hakororoa. Israel ibounai bona “orea idau-idau taudia momo herea danu” be Mose danu tano kaukauna ai davara idia rakaia hanai. (Esodo 14:9, 19-31) Unai neganai davara ena ranu be haba bamona edia idiba kahanai bona edia lauri kahanai, bona Dirava ena ori be idia ataiai ia noho. Bible ia gwau, unai amo ia ese idia Mose dekenai ia bapatisodia, iena peroveta tauna unai, ia ese ia siaia ia hamauridia totona. (1 Korinto 10:1, 2) Unai hegeregerena, lauma Israel taudia iboudiai, inai tanobada dikana ena dokona amo do idia roho mauri, be edia hahemauri tauna Keriso dekenai idia bapatiso bona edia kara amo idia hahedinaraia idia kamonai henia, be namo. “Orea idau-idau taudia” hari inai negai ese idia bamodia be namo.
4 Iehova ese siahu bada herea iena Natuna Iesu Keriso ia henia vadaeni. Ia ena amo Dirava ese dala ia karaia, “inai hari tanobada ena dika dekena amo ita do ia hamauria totona.” (Galatia 1:3-5; 1 Tesalonika 1:9, 10) Mose ena amo Iehova ese Israel na taravatu ia henidia; unai taravatu idia badinaia neganai namo bada idia davaria, to unai taravatu haida idia utua neganai edia davana be mase. Gabeai, Iesu be peroveta tauna badana ai ia lao, Mose ia hereaia. Iena hahediba herevadia be “mauri hanaihanai herevadia,” bona unai hereva idia dadaraia taudia do idia mase ela bona hanaihanai. Unai dainai, iena hereva ita laloa namonamo be gau badana!—Ioane 6:66-69; 3:36; Kara 3:19-23.
5 Taunimanima haida idia ura lasi ta be edia hakaua tauna ai do ia lao bena do idia kamonai henia. Badina be siahu gaukaralaia kerere karadia momo idia itaia vadaeni. To Iesu ena hereva ese iseda lalona idia hagoadaia. Ita ia hamaoroa, ia gwau: “Tauanina manokamanoka bona gaukara metau taudia ibounai, lau dekenai umui mai, lau ese laga-ani do lau henia umui dekenai. Egu huaia auna be emui pagana dekenai do umui atoa, lau dekenai diba do umui tahua, badina be lau be dagedage lasi bona manau tauna.” (Mataio 11:28-30) Gwauhamata namo hereana unai! Unai hereva idia abia dae bona Iesu idia abidadama henia momokani taudia be do idia lalohisihisi lasi. (Roma 10:11) Noho namo do idia davaria, lalokau tauna ese ia naridia mamoedia edia noho namo hegeregerena.
MAMOE NARIA TAUNA NAMONA
6 Israel besena be mamoe oreana ta bamona, Iehova ena orea unai. Taravatu gwauhamatana ia henidia, unai amo ia hamagudia, idia bona idau besedia mai edia kara dika ia hapararadia. Taravatu ese danu kamonai taudia ia hakaudia lao Mesia dekenai. (Efeso 2:14-16; Galatia 3:24) Iehova ese Mesia, Mamoe Naria Tauna Bamona Pavapavana, ia gwauhamatalaia, ia gwau: “Lau ese mamoe naria tauna tamona, egu hesiai tauna David, na [egu mamoe] edia naria tauna ai do lau halaoa; ia ese do ia ubudia.” (Esekiel 34:23, 31) David, ia mase vadaeni tauna, be Dirava ena bese taudia do ia lohiadia lou lasi. To, Iehova ese mamoe naria tauna bamona pavapavana ta David ena iduhu amo do ia haginia, ia ena amo ena bese taudia do ia naridia. (Ieremia 23:5, 6) Tatau haida idia hedinarai, idia koikoi, sibodia be Mesia idia gwauraia. To lagani 29 C.E. ai Iehova ena hesiai tauna Ioane Bapatiso ese Iesu Keriso ia gwauraia hedinarai Israel ena “mamoe” dekenai, ia hamaorodia Dirava ese ia siaia Mesiana korikorina be ia. Dirava ena Natuna unai, ena mauri be guba amo ia abia diho, Iuda haneulato rami-hebouna ena bogana lalonai ia atoa; unai dala amo ia be King David ena iduhu lalonai ia vara.
7 Nega ta Iesu ia gwau: “Lau be mamoe naria tauna namona inai. Mamoe naria tauna namona ese iena mauri ia atoa diho mamoe totona.” (Ioane 10:11) Ia gwau iena kara be idau, bona mesia koikoidia, idia mai guna taudia, edia kara be idau; ia gwau: “Mamoe edia magu ena iduara dekenai ia vareai lasi, to magu ena iduara ia noho lasi gabuna dekenai ia hanaia kava tauna be henaoa bona dadia tauna. To iduara dekena amo ia raka vareai tauna be mamoe naria tauna. Iduara naria tauna ese iduara ia kehoa unai tau ena, vadaeni mamoe ese iena gadona idia kamonai. Ia ese ena mamoe momokani edia ladana ia hatoa, vadaeni, ia hakaudia murimuri dekenai. Iena mamoe momokani ibounai murimuri dekenai ia hakaudia, edia vairana dekenai ia raka, vadaeni, iena gadona idia diba dainai iena murina dekenai idia raka.”—Ioane 10:1-5, 8.
8 “Iduara naria tauna,” Ioane Bapatiso ese Iesu na Mesia ia gwauraia hedinarai neganai, Taravatu gwauhamatana idia badinaia maoromaoro taudia Iuda maguna lalonai ese Iesu idia abia dae, Iesu ena “mamoe momokani” unai. Magu matamatana dekenai ia hakaudia lao, unai magu anina be gwauhamata matamatana, Iehova ese lauma Israel dekenai ia karaia bona Iesu ena rarana amo ia hamomokania. Unai gwauhamata dainai idia be Abraham ena “garana” ai idia lao, bena Keriso ida mauri be guba dekenai idia abia diba; idia dainai tanobada besedia iboudiai ese hahenamo do idia abidia. (Heberu 8:6; 9:24; 10:19-22; Genese 22:18) Iesu Keriso, Dirava ese mase amo ia hatoreaisi lou bona guba dekenai ia abia daekau lou tauna, be inai gwauhamata matamatana maguna ena “iduara.” Iena Tamana ena palani hegeregerena, taunimanima 144,000 sibodia be inai magu lalonai ia hakaudia vareai—Iuda taudia guna, bena gabeai Samaria taudia bona idau bese taudia. Mamoe Naria Tauna Namona, Iesu, ese ena mamoe ta ta iboudiai ia diba bona edia ladana ia hatoa; iboudiai ia naridia mai ena lalokau danu.—Ioane 10:7, 9; Apokalupo 14:1-3.
9 To, inai “orea maragi” taudia, guba Basileiana do idia abia taudia, sibodia lasi, to ma haida danu be Iesu ese ia naridia. (Luka 12:32) Ia gwau: “Lau be mai egu mamoe idaudia haida danu idia noho. Idia be inai magu lalonai idia noho lasi. Idia danu do lau hakaudia mai, vadaeni egu gadona do idia kamonai, vadaeni orea do ia tamona, naria tauna danu do ia tamona.” (Ioane 10:16) Inai taudia be gwauhamata matamatana lalonai lasi; idia be lauma Israel taudia lasi. Iesu ena rarana ena hamauria siahuna idia abidadama henia dainai, ia ese ia gogodia, Iehova ena palani hegeregerena mauri be tanobada dekenai idia abia totona. Idia momo ese lauma Israel taudia oredia tanobada dekenai idia bamodia, bona idia ida edia Naria Tauna Namona, Keriso idia kamonai henia. “Mamoe idaudia haida” tanobada dekenai idia do mauri noho, be Apokalupo 7:9, 10, 14 ese ia gwauraidia “hutuma bada herea,” edia helaro be hisihisi badana amo do idia roho mauri.
10 Ta be “mamoe idaudia” ta ai ia lao bena Mamoe Naria Tauna Namona ese ia naria bona ia hamauria totona, namona be Iena gadona ia “kamonai” bona ia hahedinaraia ia be ‘orea tamona’ lalonai ia noho, Guba Basileiana do idia abia taudia ida. Oi be unai bamona oi karaia a? Iena gadona oi kamonaia namonamo a?
11 Momokani oi diba Iesu ia gwau: “Lauegu taravatu be inai, umui ta ta umui lalokau henia, lau ese umui lau lalokau henia hegeregerena.” (Ioane 15:12) Vadaeni, lalokau oi hahedinaraia, Iesu ia hahedinaraia hegeregerena a? Emu lalokau dainai sibomu emu namo oi tahua lasi, a? Emu kara bona emu lalona ese idia hahedinaraia oi ese Keristen kongregesen taudia iboudiai bona sibomu emu ruma taudia danu unai bamona oi lalokau henidia, eiava?
12 Aposetolo Paulo ia gwau, bema Iesu ena gadona ita “kamonai” momokani bona bema ia ese ita ia hadibaia, iseda mauri gunana do ita kokia bona “mauri matamata” do ita atoa, dabua matamata ita atoa bamona, bona Iehova ena kara namodia do ita hahedinaraia. (Efeso 4:17-24; Kolose 3:8-14) Bible oi stadilaia neganai, oi davaria emu mauri oi haidaua be namo Dirava oi hamoalea totona. Vadaeni, unai oi laloa namonamo bona emu mauri oi haidaua noho, a? Iesu ena oda ta be Dirava ena Basileia ena sivarai namona be do idia harorolaia hari inai nega lalonai—unai gaukara oi laloa bona dala oi tahua oi karaia totona, a? Dirava ena hariharibada oi dekenai be oi laloa bada dainai, oi ura bada unai bamona oi karaia, a?—Mataio 24:14.
13 Namona be ita naria namonamo, iseda kudou ese ita idia koia garina. Taunimanima milion momo idia gwau Iesu Keriso idia abidadama henia, bona reana iena hahediba herevadia haida idia gwauraia diba, to idia ura henia herevadia sibodia idia badinaia. Reana idia haida ese kara dika rohorohodia idia karaia lasi. Paradaiso sivaraina be reana idia moalelaia, bona Keristen taravatudia be edia mauri lalodiai idia badinaia toho mai edia momokani danu taudia edia hebamo idia moalelaia reana. To bema ita ura do ita roho mauri bena “tanobada matamatana” do ita noholaia, namona be Iesu ena hereva iboudiai ita kamonai henia. Namona be ita lalo-parara ita be sibona eda raka dalana ita abia hidi namonamo diba lasi. Namona be Dirava ena Natuna, Iehova ese Iena orea taudia edia Hahemauri Tauna ai ia halaoa tauna, ita kamonai henia, bona iena aena gabudiai ita raka namonamo be namo.—Ieremia 10:23; Mataio 7:21-27; 1 Petro 2:21.
[Study Questions]
1. (a) “Hisihisi badana” amo ita roho mauri totona, daika ita kamonai henia be namo? (b) Dirava ese Mose ia hagaukaraia dalana ese inai edena bamona ia hahedinaraia?
2. (a) “Orea idau-idau taudia momo herea” be daidia? (b) Dahaka dainai idia ura Israel taudia idia bamodia? (c) Nega sisina murinai dahaka hahetoho idia davaria?
3. (a) Dahaka dainai Mose idia kamonai henia be gau badana? (b) ‘Mose dekenai idia bapatiso’ anina be dahaka? (c) Dahaka dainai unai be mai anina bada lauma Israel taudia dekenai?
4. Iehova ese Keriso ia henia siahuna ena bada be edena bamona?
5. Dahaka dainai ita ura Iesu ita kamonai henia?
6. (a) Dahaka dainai Israel besena be mamoe hegeregeredia magu ta lalonai? (b) Iehova ese naria tauna ta unai “mamoe” edia, edena bamona ia gwauhamatalaia, bona ena gwauhamata be edena bamona ia hamomokania?
7. (a) “Mamoe naria tauna namona,” Iesu be edena bamona ia hahedinaraia “mamoe” ia lalokau henidia bada? (b) Iena kara be edena bamona ia idau, mesia koikoidia edia hegeregeredia lasi?
8. (a) Iesu ese kamonai Iuda taudia edena “magu” matamatana lalonai ia hakaudia vareai? (b) Taunimanima hida be inai magu lalonai ia hakaudia vareai?
9. Iesu ena “mamoe idaudia” be daidia, bona edena negai ia gogodia?
10. Ta be edena dala amo “mamoe idaudia” ta ai ia lao?
11. Dahaka ese ia hahedinaraia Iesu ena hereva Ioane 15:12 dekenai ita “kamonai” henia momokani?
12. (a) Bema momokani Iesu ese ita ia hadibaia, iseda kara be edena bamona do ita haidaua? (b) Bible dekenai ita stadilaia gaudia be edena bamona ita karalaia be namo?
13. (a) Bema ita naria namonamo lasi, iseda kudou ese ita edena bamona idia koia readia? (b) Vadaeni, Keriso murinai edena bamona ita raka be namo?