Karoa 2
Baibel Ena Hereva Badana
Baibel Siri Edia Anina Tahua Karana Nega daudau lalonai Baibel idia stadilaia taudia ese Apokalupo bukana ena hereva hehunidia edia anina idia davaria diba lasi. Dirava ia ura negana ai, unai hereva hehunidia do idia hedinarai goevagoeva. To edena bamona, bona edena negai, bona daidia dekenai? Nega korikorina ia mai kahirakahira neganai, Dirava ena lauma helaga sibona ese unai hereva edia anina ia hahedinaraia diba. (Apokalupo 1:3) Dirava ese unai helaga hereva hehunidia be tanobada dekenai ena lalo-goada taudia do ia hadibaia, Dirava ena hahemaoro herevadia do idia harorolaia mai edia goada ida totona. (Mataio 13:10, 11) Ai gwau lasi inai buka ena hereva iboudiai idia goevadae bona ai kerere diba lasi. Lasi, to Iosepa be idaunegai ia hereva hegeregerena, ai gwau: “Nihi ena anina hedinaraia be Dirava mo sibona.” (Genese 40:8) To, danu, aiemai lalohadai be, inai buka lalonai ai torea gaudia iboudiai be Baibel ena hereva ibounai hegeregerena, bona idia hahedinaraia hoa dalana ai hari iseda hekwakwanai momo negana lalonai idia vara gaudia ese Dirava ena peroveta herevana idia hagugurua.
BAIBEL ia gwau: “Kara ta ena dokona ese ena matamana ia hereaia.” (Hadibaia Tauna 7:8) Apokalupo bukana lalonai Iehova ena ura namona ena hagugurua negana ena sivarai ita duahia diba. Unai sivarai be, ena ura badana be mauri gaudia iboudiai edia vairanai ena ladana do ia hahelagaia. Ena peroveta tauna gunana ta ena uduna amo Dirava ia hereva loulou hegeregerena: “Dohore idia diba lau be Iehova.”—Esekiela 25:17; 38:23.
2 Apokalupo bukana ese gau momo edia hagugurua negana ia gwauraia, unai hegeregerena Baibel ena buka ma haida ese unai gau edia matamana ia gwauraia. Unai hereva ibounai ita duahia neganai, henanadai badadia dekenai bona Dirava ena ura ibounai dekenai ita lalo-parara diba. Unai ese iseda lalona ia hagoadaia momokani! Danu, namona be unai hereva dainai ita ura kara haida do ita karaia, bena gabeai do ia mai negana namona lalonai, taunimanima idia naria negana unai, do ita vareai. (Salamo 145:16, 20) Hari, taunimanima iboudiai vairanai henanadai badana ta ia noho bona Dirava ia gwau unai henanadai do ia haerelaia momokani. Unai do ita laloatao totona, Baibel ena sivarai bona ena hereva badana hari ita laloa be maoro.
3 Baibel buka ginigunana, Genese, ese ‘matamaia negana’ ena sivarai ia gwauraia, bona Dirava ese ia karaia gaudia bona tanobada dekenai ia karaia gauna hereadaena, taunimanima, ia sivarailaidia danu. Genese ese Dirava ena peroveta hereva ginigunana danu ia gwauraia. Lagani 6,000 gunanai, Dirava ese unai peroveta herevana ia gwauraia Eden dekenai. Gaigai ta amo, ta ese hahine ginigunana, Eva, ia koia; bena Eva ese ena adavana Adam ia veria idia ruaosi ese Dirava ena taravatu idia utua bona “kara namona bona kara dikana hadibaia au” ena huahua idia ania totona. Dirava ese ia kara dika tauna mai ena adavana ida ia hahemaoro henidia neganai, gaigai dekenai ia gwau: “Lau ese badu oi bona hahine huanai do lau atoa bona oiemu garana bona iena garana huanai. Ia ese emu kwarana do ia haberoa, bona oi ese iena aena geduna do oi haberoa.” (Genese 1:1; 2:17; 3:1-6, 14, 15, NW ) Unai peroveta herevana ese Baibel ena hereva ibounai, Apokalupo ena hereva danu, ena badina ia atoa.
4 Dirava ese unai peroveta herevana ia gwauraia murinai, iseda tubudia ginigunadia be Eden amo ia luludia. Mauri hanaihanai Paradaiso lalonai ena helaro idia haboioa; edia mauri lagani oredia lalodiai Eden murimuri ai do idia noho, tano gagaena dekenai. Mase dekenai idia lao lalonai, mai edia kara dika natudia do idia havaraia. (Genese 3:23–4:1; Roma 5:12) To, Eden dekenai ia gwauraia peroveta herevana ena anina be dahaka? Ia be mai anina daidia dekenai? Ena anina Apokalupo bukana dekenai be dahaka? Hari inai negai ena anina ita dekenai be dahaka? Iehova ese unai peroveta herevana ia do gwauraia lasi neganai idia vara gaudia ese dika idia havaraia. Unai dika amo do ita roho mauri totona, gau badana be unai henanadai edia haere ita diba.
Unai Sivarai Lalonai Idia Vareai Taudia
5 Genese 3:15 ena peroveta herevana be gaigai dekenai ia hereva. Unai gaigai be Eva dekenai ia koikoi, ia gwau Eva be ena gwau-edeede dainai do ia mase lasi to sibona ena ura do ia karaia diba, bona dirava hahinena ta ai do ia lao. Unai gaigai be ena hereva amo ia gwau Iehova be koikoi tauna ta bona bema taunimanima ese Iehova ena lohia siahuna idia dadaraia, sibodia edia noho dalana do idia hanamoa diba. (Genese 3:1-5) Ia hepapahuahu, ia gwau Iehova ese gau iboudiai ia lohiaia be maoro lasi bona Iehova ena ladana namona ia hamiroa. Apokalupo bukana ese ia gwauraia hedinarai, Hahemaoro Tauna maoromaorona, Iehova, ese ena Natuna, Iesu Keriso, ena Basileia lohia siahuna ia gaukaralaia, ena lohia dalana ena maoro ia hahedinaraia bona ena ladana hamiroa gaudia iboudiai ia kokidia totona.—Apokalupo 12:10; 14:7.
6 “Gaigai” ena anina be gaigai korikorina ta sibona, a? Lasi vaitani! Apokalupo bukana lalonai ia hahedinaraia unai gaigai amo ia hereva lauma dikana be daika. Ia be “huala badana, . . . idaunegai gaigaina, bona iena ladana be Diabolo bona Satani. Ia be tanobada taudia ibounai ia koia noho gauna.” Unai “gaigai ese Heva ia koia.”—Apokalupo 12:9; 2 Korinto 11:3.
7 Bena Genese 3:15 ese “hahine” ia gwauraia. Unai hahine be Eva, a? Reana Eva be unai bamona ia laloa. (Genese 4:1 itaia danu.) To Eva be lagani 5,000 bona ma haida gunanai ia mase neganai, dala be lasi ia bona Satana be nega daudau lalonai do idia tuari heheni totona. Danu, Iehova ese ia hereva henia Gaigaina be lauma ta, unai dainai hari hahine danu be lauma edia gabu dekenai ia noho. Apokalupo 12:1, 2 ese unai ia hamomokania; ia hahedinaraia hahine be laulau bamona, Iehova ena kamonai anerudia edia orea guba dekenai ia laulaulaia.—Isaia 54:1, 5, 13 itaia danu.
Garana Rua Idia Tuari Heheni
8 Bena Genese 3:15 ese garana rua ia gwauraia. Namona be unai garana edia anina ita tahua namonamo, badina idia be mai edia anina bada tanobada ibounai dekenai daika ia lohia dalana hamaoromaoroa totona. Unai be mai anina ita ta ta ibounai dekenai, ita maragi eiava ita buruka be herevana. Unai garana rua amo edena ta do oi abia hidi?
9 Garana ginigunana be Gaigai ena garana, o ena bese. Unai be dahaka? Momokani, unai garana taudia haida be Satana ena gwau-edeede lalonai idia vareai laumadia. Gabeai, Satana “mai ena aneru ibounai danu, be idia ese tanobada dekenai idia negea diho.” (Apokalupo 12:9) Satana, eiava Belesebulo, be “lauma dikadia edia biaguna,” unai dainai idia be ena orea lalonai idia noho.—Mareko 3:22; Efeso 6:12.
10 Danu, Iesu be tomadiho gunalaia taudia dekenai ia gwau: “Umui be emui tamana Satani dekena amo umui mai, bona umui ura emui tamana ena ura dikadia do umui karaia.” (Ioane 8:44) Dirava ena Natuna Iesu idia dadaraia dainai, unai tomadiho gunalaia taudia ese idia hahedinaraia idia danu be Satana ena natudia. Idia be Satana ena garana ena kahana, bona ia be edia tamana bamona. Unai dainai iena hesiai gaukara idia karaia. Idia hegeregerena, momo ese Satana ena ura idia karaia, bona Iesu ena hadibaia taudia idia koua toho bona idia dagedage henidia. Idia iboudiai be Satana ena tanobada oreana lalonai idia noho.—Ioane 15:20; 16:33; 17:15 itaia.
Hahine Ena Garana Ia Hedinarai
11 Bena dokonai, Genese 3:15 ena peroveta herevana ese hahine ena garana ia gwauraia. Satana ese ena garana ia havaraia negana lalonai, Iehova ese dala ia hegaegaelaia, ena “hahine,” eiava ena adavana bamona oreana guba dekenai, ese garana do ia havaraia totona. Lagani 4,000 bamona lalodiai, Iehova ese ena ura ia hahedinaraia idia gari henia taudia dekenai, unai garana do ia mai dalana do idia diba totona. (Isaia 46:9, 10) Unai dainai Abraham, Isako, Iakobo, bona ma taunimanima haida ese edia abidadama idia hagoadaia, badina Dirava ena gwauhamata hegeregerena, unai garana be edia tubudia amo do ia vara. (Genese 22:15-18; 26:4; 28:14) Satana bona ena gaukara taudia ese nega momo Iehova ena hesiai taudia idia dagedage henidia, badina edia abidadama dekenai idia gini goada dainai.—Heberu 11:1, 2, 32-38.
12 Vadaeni, lagani 29 C.E. lalonai, tau goevadaena Iesu ese sibona ia henia Dirava dekenai bona Ioridane Sinavaina lalonai ia bapatiso. Unai neganai, Iehova ese Iesu be ena lauma helaga amo ia horoa bona ia gwau: “Inai be lauegu Natuna, egu lalokau, lau moale bada ia dekenai.” (Mataio 3:17) Unai hereva amo ia hedinarai Dirava ese Iesu ia siaia ena lauma oreana guba dekena amo. Danu, Dirava ese ia horoa, guba Basileia lalonai Pavapava ai do ia lao totona. Unai Basileia ese tanobada do ia lohiaia Iehova ena ladana ai. Unai dala amo gavamani, eiava lohia, siahuna ena hepapahuahu do ia hadokoa vaitani. (Apokalupo 11:15) Unai dainai, Iesu be hahine ena garana Tauna ginigunana bona badana, gwauhamata ena Mesia unai.—Galatia 3:16; Daniela 9:25 itaia danu.
13 Hahine ena garana be mai ena lada bada tauna tamona sibona, a? Satana ena garana taudia be edena bamona? Baibel ese ia hahedinaraia Satana ena garana taudia be aneru dikadia momo bona Dirava matauraia lasi tanobada taudia. Unai dainai, ita hoa lasi Dirava ena ura dekenai; ena ura be, kara maoromaoro tanobada taudia 144,000 do ia abidia hidi Mesia Garana, Iesu Keriso ida hahelaga lohia taudia ai do idia lao totona. Apokalupo bukana ese unai taudia ia gwauraia. Ia gwau Diabolo ese Dirava ena hahine, ena orea unai, ia inai henia dainai, “hahine ena natuna oredia, idia do noho taudia, ia tuari henia.”—Apokalupo 12:17; 14:1-4.
14 Baibel lalonai, horoa Keristen taudia ia gwauraidia Iesu ena tadikaka bamona, bona unai dainai edia Tamana be tamona bona edia sinana be tamona. (Heberu 2:11) Edia Tamana be Iehova Dirava. Unai dainai, edia sinana be Dirava ena adavana bamona guba oreana, ena “hahine” unai. Idia be garana ena kahana ma ta ai idia lao, Keriso Iesu be ena kahana ginigunana bona badana. Unai horoa Keristen taudia be Dirava ena orea tanobada dekenai, bona idia be ena guba oreana henunai hesiai gaukara idia karaia, bona idia toreisi lou murinai guba dekenai Keriso Iesu ida do idia noho hebou. (Roma 8:14-17; Galatia 3:16, 29) Ena be mamoe idaudia milion milion, bese iboudiai amo, be unai garana lalonai idia noho lasi, to idia lalo-tamona bona Dirava ena tanobada oreana ida hesiai gaukara idia karaia hebou. Oi be unai mamoe idaudia edia tau ta, a? Bema oibe, emu helaro namona be mauri hanaihanai paradaiso tanobadana lalonai do oi noho.—Ioane 10:16; 17:1-3.
Idia Inai Heheni Ena Sivarai
15 Satana ena garana tanobada dekenai be idaunegai ia hedinarai matamaia. Haheitalai ta be Kain, sinana ena bogana amo ia vara tauna ginigunana. “Ia be Satani ena tau, bona ia ese iena tadina Abela ia alaia mase.” (1 Ioane 3:12) Gabeai, Enok ia gwau: “Lohiabada do ia mai, bona iena aneru helagadia daha momo be ia danu do idia hedinarai. Lohiabada ese taunimanima ibounai do ia kota henia. Ia ese Dirava idia badinaia lasi taudia edia dika davana do ia gwauraia, Dirava idia negea dainai. Ma idia momo ese Dirava idia hereva dika henia vadaeni.” (Iuda 14, 15) Danu, gwau-edeede anerudia ese Satana ena kahana idia abia hidi bona idia be ena garana ena kahana ai idia lao. Idia ese “edia gabu korikori idia rakatania,” bona tanobada tauanina idia karaia, taunimanima edia natu kekenidia do idia adavaia totona. Natudia idia havaraia, idia be goada herea dagedage taudia unai. Unai negai, tanobada be dagedage bona kara dika amo ia honu. Unai dainai, Dirava ese unai taudia ia hadikaia ore Abata lalonai. Kamonai tauna Noa bona ena ruma bese taudia sibodia idia roho mauri. Unai gwau-edeede anerudia—hari Satana ena siahu henunai idia noho—ese edia tanobada hahinedia bona edia natudia idia rakatanidia. Tanobada tauanina idia rakatania, bona guba dekenai idia giroa lou. Unuseniai Dirava ena hahemaoro Satana bona ena garana dekenai idia naria noho. Unai hahemaoro negana be kahirakahira momokani.—Iuda 6; Genese 6:4-12; 7:21-23; 2 Petero 2:4, 5.
16 Nega sisina Abata murinai, dagedage tauna ladana Nimrod be tanobada dekenai ia vara. Baibel ia gwau, ia be “labana tauna mai goada danu Iehova ena vairanai.” Momokani ia be Gaigai ena garana tauna ta. Satana hegeregerena, ia gwau-edeede bona Babel hanuana, eiava Babulono, ia haginia. Unai ia karaia neganai, Dirava ena ura ia gwau-edeede henia; Dirava ia ura taunimanima be tanobada ena kahana iboudiai dekenai do idia noho. Unai taunimanima idia ura Babulono lalonai, kohoro badana ta do idia haginia, “guba dekenai do ia kamokau” totona. Dirava ese edia gaukara ia koua. Edia gado ia haidaua bona unai gabu dekena amo “ia luludia tanobada kahana kahana ibounai dekenai,” to Babulono hanuana ia hadikaia ore lasi.—Genese 9:1; 10:8-12; 11:1-9.
Politikol Oreadia Idia Vara
17 Babulono lalonai taunimanima ese edia kara haida amo Iehova ena lohia siahuna idia dadaraia. Unai kara ta be politikol karana. Taunimanima edia namba ia bada daekau negana lalonai, haida ese Nimrod ena haheitalai idia badinaia bona lohia siahuna idia tahua. Taunimanima haida ese edia bamodia idia biagudia bona idia hahisidia. (Hadibaia Tauna 8:9) Haheitalai ta be, Abraham ena nega lalonai Sinara tanona bona ma tano daudaudia haida edia pavapava ese Sodoma bona Gomora taudia, bona idia noho kahirakahira hanuadia edia taunimanima, idia biagudia. (Genese 14:1-4) Gabeai, mai edia aonega bada ida tuari oreadia bona ma orea haida idia biagua namonamo taudia ese basileia idia haginia, moni bona dagi badadia do idia abia totona. Baibel ese unai basileia haida ia gwauraidia: Aigupito, Asuria, Babulono, Mede-Parasa, Greece, bona Roma.
18 Iehova ese unai politikol oreadia ia haheaukalaidia, bona ena bese taudia be unai tano edia gavamani henunai idia noho neganai, edia hahegani idia badinaia. (Roma 13:1, 2) Nega haida, politikol gavamanidia ese Dirava ena ura idia karaia taudia eiava ena orea taudia idia durudia. (Esera 1:1-4; 7:12-26; Kara 25:11, 12; Apokalupo 12:15, 16) To, politikol taudia momo ese tomadiho momokanina idia dagedage henia, bona idia hahedinaraia idia be Gaigai ena garana taudia haida.—1 Ioane 5:19.
19 Nega momo, taunimanima idia lohia neganai, ita taunimanima dekenai moale idia henia lasi, bona iseda hekwakwanai idia kokia diba lasi. Iehova ese dala ia koua lasi dainai, taunimanima ese gavamani karana idauidau iboudiai idia tohoa vadaeni, to Iehova ese gagevagageva karadia ia lalo-namo henidia lasi, bona gavamani ese taunimanima idia lohiadia kerere neganai ia moale henidia lasi. (Aonega Herevadia 22:22, 23) Apokalupo bukana ese inai tanobada gavamani dagedagedia ia gwauraidia hekokoroku bona dagedage gauna ta bamona.—Apokalupo 13:1, 2.
Mataganigani Bisinesi Taudia
20 Kohu hoihoilaia taudia danu idia hedinarai bona politikol biagudia ida idia gaukara hebou. Idia be kara maoromaoro lasi taudia. Babulono kahirakahira dekenai tano idia geia bona nadi revarevadia idia davaria. Unai revareva ese idia hahedinaraia idaunegai Babulono lalonai haida be edia bisinesi karana amo ogogami bona noho dika taudia edia mauri idia ha-aukaia. Unai nega amo ema bona hari, tanobada hoihoi taudia idia gaukara goada sibodia edia moni abia totona, bona tano momo lalodiai haida sibodia ese moni momo idia abia, to taunimanima momo be idia ogogami momokani. Hari inai negai, hoihoi taudia bona faktori biagua taudia haida ese moni bada herea idia abia, politikol gavamani dekenai tuari gaudia dikadia idia henidia dainai. Unai idia haboua tuari gaudia haida be taunimanima momo idia hamasea diba bona hari taunimanima iboudiai ese unai idia lalohekwarahilaia. Unai mataganigani bisinesi badadia taudia bona unai bamona taudia ma haida danu be Satana ena garana taudia. Idia be “tuari biagudia” bona “tuari taudia” ida toana tamona taudia. Idia be Satana ena tanobada oreana lalonai idia noho bona Dirava bona Keriso idia laloa namona be iboudiai idia hahemaoro henidia bona do idia hadikadia ore.—Apokalupo 19:18.
21 Dirava ese politikol karadia gagevagagevadia bona mataganigani bisinesi karadia dekenai sibodia lasi to taunimanima edia gau ihatoina dekenai danu hahemaoro aukana do ia henia be maoro. Unai gau be dahaka? Apokalupo ese unai gau ia gwauraia dalana dainai reana do oi hoa. Ia be tanobada ibounai dekenai ia noho bona taunimanima momo be unai gau idia diba namonamo.
Babulono Badana
22 Babulono gunana idia haginia neganai, unai be politikol karana sibona lasi. Unai hanua idia haginia neganai Iehova ena lohia siahuna dekenai idia gwau-edeede. Unai dainai, unai kara be mai anina tomadiho karana dekenai. Momokani, idaunegai Babulono be dirava koikoi tomadiho henidia karana ia gunalaia. Ena hahelaga taudia ese Dirava hadikaia herevadia idia hadibaia; hegeregere, idia gwau mase murinai taunimanima edia lauma ia mase lasi bona unai lauma be gari bona hisihisi gabuna dekenai ia lao, demoni ese idia biagua gabuna unai. Unai hahelaga taudia ese taunimanima idia hagoadaia, animal bona dirava tataudia bona dirava hahinedia momo herea do idia tomadiho henidia totona. Gori idia havaraia, tanobada bona tanobada taudia edia vara dalana do idia gwauraia hedinarai totona, bona tomadiho karadia bona boubou karadia mirodia idia karaia, hahine ese natudia momo do idia havaraia totona, tano ese tubutubu gaudia momo do ia havaraia totona, bona tuari lalonai do idia kwalimu totona.
23 Edia gado be idauidau dainai, taunimanima be Babulono amo idia raka siri bona tanobada ibounai dekenai idia lao neganai, edia Babulono tomadiho idia abia lao danu. Unai dainai, Europe, Africa, America, Far East, bona South Seas tanodia edia bese taudia ginigunadia ese Babulono ena tomadiho karadia bona hahediba herevadia momo idia badinaia. Unai tomadiho lalohadai momo idia do noho ema bona hari. Unai dainai, Apokalupo ese tanobada tomadiho basileiana ia gwauraia Babulono Badana. (Apokalupo, karoa 17, 18) Tomadiho koikoi gabudia iboudiai dekenai dagedage hahelaga oreadia, gari kava, kavakava karadia bona sihari kava idia vara. Satana ese tomadiho koikoi ia gaukaralaia badabada unai. Nega ibounai Babulono Badana ese Lohiabada Iehova idia tomadiho henia momokani taudia ia tuari henidia mai ena dagedage ida.
24 Gaigai ena garana ena kahana dika hereana ta be Iuda tomadihona ena taravatu hadibaia taudia bona Farisea taudia. Keristen taudia ginigunadia edia nega lalonai idia ese hahine ena garana ginigunana idia dagedage henia bona ena hamasea karana idia gunalaia. Unai dainai, Gaigai ese ‘ “garana” ena aena geduna ia haberoa’ diba. (Genese 3:15, NW; Ioane 8:39-44; Kara 3:12, 15) Dahaka dainai Baibel ia gwau unai bero be ena aena geduna dekenai sibona? Badina Iesu be inai tanobada dekenai ia noho neganai unai bero ese Iesu ia hahisia nega kwadogi lalonai sibona. Unai bero ia noho hanaihanai lasi, badina Iehova ese Iesu ia hatorea isi lou, ena mase dinana ihatoina dekenai, bona lauma maurina ia henia.—Kara 2:32, 33; 1 Petero 3:18.
25 Hari, Iesu Keriso be mai ena hairai ida Dirava ena imana idibana dekenai ena hesiai gaukara ia karaia, bona Iehova ena inai taudia ia hahemaoro henidia noho. Satana bona ena aneru dekenai kara ta ia karaia vadaeni; ia negedia diho bona edia gaukara ia koua dainai tanobada sibona dekenai idia gaukara diba. Unai badina dainai, hari inai negai tanobada ena hekwakwanai idia bada daekau. (Apokalupo 12:9, 12) To Baibel ese ia perovetalaia vadaeni hegeregerena, Dirava ese ena hahemaoro be Babulono Badana bona Satana ena orea ma iboudiai dekenai ia karaia neganai, Satana ena tanobada garana do ia kokia vaitani. Bena, Dirava ena hahine ena Garana, Iesu Keriso, ese Satana, unai koikoi idaunegai gaigaina, be “kwarana” dekenai do ia haberoa, bona unai anina be do ia hadikaia ore bona taunimanima edia kara dekena amo do ia kokia vaitani.—Roma 16:20.
26 Unai ibounai be edena bamona do ia vara? Baibel buka Apokalupo ese unai ia hahedinaraia. Matahanai amo, toa amo, bona laulau amo unai ia hahedinaraia. Namona be unai peroveta herevana badana ita tahua namonamo mai eda moale ida. Bema Apokalupo ena hereva ita kamonaia bona ita badinaia, moale do ita davaria! Unai bamona ita karaia neganai, Lohiabada Iehova ena ladana do ita hahairaia bona ena hahenamo do ita abia. Mani inai buka ena hereva gabedia oi duahia bona oi ia hadibaia gaudia oi badinaia mai emu aonega ida. Unai dala amo reana hari hagugurua negana dekenai hahemauri do oi davaria.
[Study Questions]
1. Iehova ena ura badana be dahaka?
2. Apokalupo bukana bona Baibel bukadia ma haida danu ese ita idia durua dahaka diba namona do ita abia totona?
3. Dahaka peroveta herevana Genese bukana lalonai ese Apokalupo bona Baibel ibounai edia hereva edia badina ia atoa?
4. (a) Dirava ese unai peroveta herevana ginigunana ia gwauraia murinai, iseda tama sina ginigunadia dekenai dahaka ia vara? (b) Unai peroveta herevana ginigunana dainai dahaka henanadai idia vara, bona badina be dahaka unai henanadai edia haere ita diba be gau badana?
5. Gaigai ese Eva ia koia neganai, unai ena anina be dahaka Dirava ena lohia siahuna bona ena ladana namona dekenai, bona Dirava ese unai hepapahuahu edena dala amo do ia haorea?
6. Apokalupo bukana be edena hereva amo ia hahedinaraia gaigai ena uduna amo daika ese Eva ia hereva henia?
7. Dahaka ese ia hahedinaraia Genese 3:15 ese ia gwauraia hahinena be lauma edia gabu ai ia noho?
8. Badina be dahaka garana rua edia sivarai ena anina ita tahua namonamo be namo?
9. Daidia danu be Gaigai ena garana taudia?
10. Baibel be dahaka hereva amo ia hahedinaraia ma haida danu be Satana ena garana taudia?
11. Lagani handred handred lalodiai, Dirava ese dahaka ia gwauraia hedinarai, hahine ena garana ia hahedinaraia totona?
12. (a) Edena negai bona dahaka ia vara neganai hahine ena garana ena kahana badana ia hedinarai? (b) Dirava ese Iesu ia horoa, dahaka do ia karaia totona?
13, 14. (a) Hahine ena garana be tau badana tamona sibona lasi. Dahaka dainai unai ita hoalaia lasi? (b) Dirava ese taunimanima hida ia abidia hidi garana ena kahana ta ta ai do idia lao totona, bona idia be edena bamona oreana lalonai idia vareai? (c) Ma daidia danu be garana taudia ida hesiai gaukara idia karaia hebou mai edia lalo-tamona?
15. (a) Satana ena garana taudia, aneru bona taunimanima, edia sivarai mani oi gwauraia. (b) Noa ena negai Abata lalonai dahaka ia vara Satana ena garana dekenai?
16. (a) Abata negana murinai, edena dagedage tauna ia hedinarai, bona edena dala amo ia hahedinaraia ia be Satana ena garana tauna ta? (b) Dirava ese edena dala amo Babulono kohorona idia ura haginia taudia ia koudia?
17. Taunimanima edia namba ia bada ia lao neganai, dahaka kara ia bada ia lao, bona unai dainai, dahaka basileia badadia idia vara?
18. (a) Dirava ena orea taudia ese politikol lohia taudia edena bamona idia lalodia? (b) Nega haida politikol oreadia be edena bamona Dirava ena ura idia karaia? (c) Lohia taudia momo be edena dala amo idia hahedinaraia idia be Gaigai ena garana taudia?
19. Apokalupo bukana ese tanobada basileiadia edena bamona ia gwauraidia?
20, 21. “Tuari biagudia” bona “tuari taudia” ida daidia danu ita haboudia tamona, Satana ena garana dikana taudia unai? Dahaka dainai?
22. Idaunegai Babulono ena tomadiho karana be edena bamona?
23. (a) Babulono amo idia raka siri neganai, taunimanima ese dahaka idia abia lao danu? Unai dainai dahaka ia vara? (b) Apokalupo bukana lalonai tanobada tomadiho koikoi basileiana ena ladana be dahaka? (c) Tomadiho koikoi ese dahaka ia tuari henia hanaihanai?
24. (a) Gaigai be edena dala ai hahine ena Garana ia haberoa diba ena “aena geduna” dekenai? (b) Dahaka dainai Baibel ia gwau hahine ena garana ena bero be ena aena geduna sibona dekenai ia abia?
25. (a) Mai hairai tauna Iesu ese Satana bona ena aneru dekediai dahaka ia karaia vadaeni? (b) Satana ena garana tanobada dekenai be edena negai do idia kokia? (c) Dirava ena hahine ena Garana ese Satana, hari gaigai, ena “kwarana” ia haberoa ena anina be dahaka?
26. Badina be dahaka Apokalupo ena peroveta herevana ita tahua namonamo be gau badana?
[Box/Picture on page 13]
Idaunegai bisinesi nadi revarevadia
Buka ta, Ancient Near Eastern Texts, James B. Pritchard ese ia karaia bukana, lalonai idaunegai Babulono tauna Hammurabi ena taravatu kahirakahira 300 be lisi ta dekenai idia torea. Unai taravatu ese idia hahedinaraia, unai negai bisinesi taudia momo idia kara gagevagageva dainai taravatu haida idia atoa be namo. Haheitalai ta be inai: “Siliva eiava golo eiava igui hesiai tauna ta eiava igui hesiai hahinena ta eiava boromakau eiava mamoe eiava doniki eiava ma gau ta bema tau ta ese ia hoia, eiava bema ma tau ta ena natuna eiava ena igui hesiai tauna ese unai gau ta be unai tau dekenai ia henia do ia naria totona, to hamomokania taudia be lasi bona gwauhamata pepadia idia karaia lasi, vadaeni, unai tau be henaohenao tauna ta dainai, idia hamasea be namo.”