Karoa 4

Iesu Ia Mai Bona Hagoadaia Herevadia Ia Mailaia

NAMONA be hari inai negai Dirava ena orea taudia edia kongregesen danu idia hebou taudia iboudiai ese henuai ai torea herevadia idia laloa namonamo. Unai hereva be hadibaia herevadia. “Inai gaudia ibounai do idia vara ena nega” ia mai kahirakahira neganai idia be mai anina bada. (Apokalupo 1:⁠3) Bema unai hadibaia herevadia dekenai ita kamonai namonamo, namo do ita davaria ela bona hanaihanai. Hereva be inai: “Lau Ioane, umui ekalesia orea 7 Asia dekenai inai hereva lau torea inai. Dirava be harihari ia noho, gunaguna ia noho, bona gabeai danu do ia mai. Ia dekena amo harihari bada bona maino do umui abia. Dirava ena helai gabuna badana vairanai idia noho laumadia 7 dekena amo danu hariharibada bona maino do umui abia. Bona Iesu Keriso dekena amo danu.”​—⁠Apokalupo 1:​4, 5a.

² Unai siri lalonai Ioane ese “ekalesia orea 7” ia hereva henidia, bona gabeai ita totona edia ladana ia torea danu. Apokalupo bukana lalonai namba “7” ia hedinarai nega momo. Unai namba be laulau ta; anina be Dirava ena gau bona ena horoa kongregesen edia gau be unai namba amo idia gwauraia neganai, unai gau ibounai idia herevalaia. Lohiabada ena dina lalonai, tano iboudiai dekenai Dirava ena orea taudia edia kongregesen edia namba ia bada daekau ia lao tausen momo. Unai dainai ita diba “ekalesia orea 7,” horoa taudia unai, ia henidia herevadia be mai anina Dirava ena orea taudia iboudiai dekenai danu. (Apokalupo 1:10) Oibe, Ioane ena hereva be mai anina Iehova ena Witness taudia edia kongregesen iboudiai dekenai bona idia danu idia hebou taudia iboudiai dekenai, tanobada ibounai lalonai.

³ “Hariharibada bona maino” be ita ura henia bada, bona edeseni amo idia mai ena badina ita diba neganai, do ita moale! Unai gau ia henia “Tauna” be Atai Herea Lohiabada Iehova, ia be “Noho Hanaihanai King,” “gunaguna amo ela bona hanaihanai” ia noho. (1 Timoteo 1:17; Salamo 90:⁠2) ‘Lauma 7’ idia noho danu. Unai hereva ese Dirava ena gaukara siahuna, eiava lauma helaga, ena gaukara ibounai ia hahedinaraia. Ena heduru amo, lalo-parara bona hahenamo be hari peroveta hereva idia kamonai henia taudia iboudiai dekenai ia henidia. Danu, “Iesu Keriso” ena kara be mai anina bada. Gabeai, Ioane ia gwau: “[Hebogahisi] kara bona hereva momokani dekenai ia honu momokani.” (Ioane 1:14) Unai dainai, Apokalupo bukana ena hereva ginigunadia be Paulo ese Korinto kongregesen ena toretore iharuana lalonai ia torea hereva ginigabena bamona, ia gwau: “Lohiabada Iesu Keriso ena hariharibada, Dirava ena lalokau, bona Lauma Helaga ena hetura be umui ibounai dekenai do idia noho.” (2 Korinto 13:14) Namona be hari inai negai unai hereva be mai anina bada ita ta ta ibounai dekenai danu, hereva momokani ura henia taudia unai!​—⁠Salamo 119:⁠97.

“Dirava Ena Hereva Ia Gwauraia Maoromaoro Tauna”

⁴ Ioane ia diba Iesu ena hairai ese ma gau iboudiai edia hairai ia hereaia, Iehova ena hairai sibona ia hereaia lasi. Ioane ese Iesu be inai bamona ia gwauraia: “Ia be Dirava ena hereva ia gwauraia maoromaoro tauna namona. Ia be mase dekena amo ia toreisi lou vara guna tauna. Ia be tanobada ena king ibounai edia biaguna.” (Apokalupo 1:⁠5b) Guba ena hua bamona, Iesu, Iehova ena Witness Tauna badana, ese ia hamomokania Iehova be Dirava. (Salamo 89:37) Ena kara maoromaoro ia dogoatao ela bona boubou gauna bamona ia mase. Unai murinai, lauma maurina ai ia toreisi lou bena ia doko diba lasi maurina ia abia. Ia be unai bamona maurina abia tauna ginigunana tanobada dekenai. (Kolose 1:18) Hari ia be Iehova ena vairanai ia gini. Ia ese tanobada pavapava iboudiai ia hereadia, bona “Siahu ibounai guba dekenai bona tanobada dekenai” ia abia vadaeni. (Mataio 28:18; Salamo 89:27; 1 Timoteo 6:15) Lagani 1914 lalonai ia be Pavapava ai ia lao tanobada besedia huanai do ia lohia totona.​—⁠Salamo 2:​6-9.

⁵ Ioane ese Lohiabada Iesu Keriso be inai bamona ia hanamoa noho: “Ia ese ita ia lalokau henia, bona iena rarana dekena amo iseda kara dika ia huria ore vadaeni. Ia ese ita ia haboua, vadaeni ita be Basileia ta, bona Tamana Dirava ena boubou helaga karaia taudia ia ese ita ia halaoa vadaeni. Iesu Keriso dekenai be hairai bada bona siahu bada do idia noho ela bona hanaihanai. Amen.” (Apokalupo 1:​5c, 6) Iesu ese sibona ena mauri goevadaena ia henia, ia idia abidadama henia tanobada taudia ese mauri goevadaena do idia abia lou totona. Duahiduahi tauna e, unai mauri oi abia diba danu! (Ioane 3:16) Danu, Iesu be boubou gauna bamona ia mase dainai dala ia kehoa hahenamo idauna ta be horoa Keristen taudia, Ioane bamona taudia, ese do idia abia totona. Iesu ena boubou dainai Dirava ese unai taudia ia gwauraidia maoro vadaeni. Iesu hegeregerena, tanobada maurina ena helaro idia rakatania bona Dirava ena lauma helaga amo unai seri maragi taudia idia vara lou. Edia helaro be, do idia toreisi lou murinai, pavapava bona hahelaga hesiai gaukaradia be Iesu Keriso ida do idia karaia ena Basileia lalonai. (Luka 12:32; Roma 8:18; 1 Petero 2:5; Apokalupo 20:⁠6) Hahenamo badana unai! Unai dainai Ioane be mai ena lalo-goada ida ia gwau, hairai bada bona siahu bada be Iesu ena!

“Ori Latanai Ia Mai Noho”

⁶ Bena, mai moale ida Ioane ia gwau: “Umui itaia, ia be ori latanai ia mai noho. Taunimanima ibounai be momokani do idia itaia. Idia gwadaia taudia ese danu do idia itaia. Tanobada besedia ibounai be ia dainai do idia tai. Inai be momokani! Amen.” (Apokalupo 1:⁠7) Momokani, Ioane ese Iesu ena hereva, nega dokona ia perovetalaia negana ia gwauraia herevana, ia laloa lou. Iesu ia gwau: “Vadaeni Taunimanima ena Natuna ena toana guba dekenai do ia hedinarai. Unai neganai tanobada ena bese ibounai do idia tai, badina be Taunimanima ena Natuna do idia itaia, guba ena ori latanai do ia mai, mai ena siahu bada, bona mai ena hairai danu.” (Mataio 24:​3, 30) Vadaeni, Iesu be Iehova ena hahemaoro aukana be tanobada bese badadia dekenai ia henidia neganai, Iesu ia “mai” unai. Unai dainai tanobada ena toana do ia idau vaitani, bona “tanobada besedia ibounai” ese Iesu ena pavapava siahuna idia abia dae lasi dainai, “Siahu Ibounai Dirava ena badu, siahu dikadika” do idia mamia.​—⁠Apokalupo 19:​11-​21; Salamo 2:​2, 3, 8, 9.

⁷ Adorahi ta ai, idia ida ia noho negana ginigabena unai, Iesu ese ena hahediba taudia ia hamaorodia, ia gwau: “Nega daudau lasi tanobada taudia ese lau do idia itaia lou lasi.” (Ioane 14:19) Vadaeni, edena bamona “taunimanima ibounai be momokani do idia itaia”? Ita gwau diba lasi Iesu ena inai taudia ese do idia itaia momokani edia matana korikori amo, badina aposetolo Paulo ia gwau Iesu be guba dekenai ia daekau murinai, ia be “diaridiari bada dekenai ia noho, bona ia kahirakahira ita lao diba lasi,” bona “ta ese ia idia itaia lasi, bona ta ese vaira neganai do ia itaia diba lasi.” (1 Timoteo 6:16) Ioane ese “itaia” ia torea neganai, anina be ita “lalo-parara,” Dirava ese ia karaia gaudia amo iena kara ita itaia, eiava ia dekenai ita lalo-parara, hegeregerena. (Roma 1:20) Iesu be “ori latanai ia mai noho” anina be matana korikori amo do ita itaia diba lasi, dina be ori murinai ia noho neganai ita itaia diba lasi hegeregerena. Dina lalonai bema ori ese dina idia hunia, ita diba dina ia noho, badina ita be dina ena diari lalonai ita noho. Unai hegeregerena, ena be Lohiabada Iesu ita itaia diba lasi, to do ia hedinarai goevagoeva, “mai lahi siahu bada danu, Dirava ura lasi taudia bona Lohiabada Iesu ena Sivarai Namona idia abia dae lasi taudia dekenai davana metau do ia henidia” neganai. Iesu ese unai taudia danu do ia doridia, ia “do idia itaia” totona.​—⁠2 Tesalonika 1:​6-8; 2:⁠8.

⁸ Iesu “idia gwadaia taudia” danu ese do idia “itaia.” Unai taudia be daidia? Lagani 33 C.E. ai Iesu idia hamasea neganai, Roma tuari taudia ese Iesu idia gwadaia. Unai ala-ala karana ena dika be Iuda taudia dekenai ia noho danu; Pentekoste dinana ai Petero ese unai Iuda taudia haida ia hereva henidia, ia gwau: “Inai Iesu, satauro dekenai umui hamasea tauna, Dirava ese Lohiabada bona Keriso ia halaoa vadaeni.” (Kara 2:​5-​11, 36; Sekaraia 12:10; Ioane 19:37 itaia danu.) Unai Roma taudia bona Iuda taudia be lagani 2,000 bamona gunanai idia mase. Unai dainai Iesu idia “gwadaia” taudia edia anina be hari inai negai Iesu idia inai henia besedia, edia kara be Iesu idia hasatauroa taudia edia kara hegeregerena. Hari, Iesu be inai tanobada dekenai ia noho lasi. To taunimanima ese Iehova ena Witness taudia, Iesu ena sivarai idia harorolaia taudia unai, be idia dagedage henidia neganai, eiava bema taunimanima ese unai kara idia koua lasi to idia abia dae, vadaeni unai inai taudia edia kara be Iesu “gwadaia” karana bamona.​—⁠Mataio 25:​33, 41-​46.

“Alepa Bona Omega”

⁹ Atai Herea Lohiabada Iehova ia boiboi! Hoa karana ta unai! Hari matahanai idia do hedinarai lasi neganai ia hereva be maoro, badina ia be iseda Hadibaia Tauna Hereadaena bona Apokalupo bukana ena Badina! (Isaia 30:20) Iseda Dirava ia gwau: “Harihari ia noho, gunaguna ia noho, bona gabeai do ia mai tauna, Siahu Ibounai Diravana, ia gwau, ‘Lau be Alepa bona Omega, Matamana bona Dokona.’ ” (Apokalupo 1:⁠8) Apokalupo lalonai nega toi Iehova be guba amo ia boiboi. Unai negadia amo ginigunana be unai. (Apokalupo 21:​5-8; 22:​12-​15 itaia danu.) Keristen taudia ginigunadia idia diba namonamo alepa bona omega be Greek gado leta edia leta ginigunana bona ginigabena. Iehova ese unai leta rua amo sibona ia gwauraia neganai, ia hahedinaraia goevagoeva ia vairanai siahu ibounai Diravana ta be lasi, bona ia murinai ta be lasi. Mai ena kwalimu ida Dirava ena siahu hepapahuahulaia karana Ia ese do ia hadokoa ela bona hanaihanai. Ela bona hanaihanai do ia hedinarai ia mo sibona be siahu ibounai Diravana, bona ena havaraia gaudia iboudiai ataiai ia noho bona ia be edia Atai Herea Lohiabada.​—⁠Isaia 46:10; 55:​10, 11 itaia danu.

¹⁰ Ioane ia diba Iehova ese gau ibounai do ia biagua namonamo, unai dainai ia ida hesiai gaukara idia karaia taudia ia hamaorodia, ia gwau: “Lau be umui emui kakana Ioane. Iesu ena murinai lau raka noho dainai, lau be umui danu ita hisihisi noho mai haheauka danu. Badina be iena Basileia taudia ibounai ese hisihisi idia abia noho. Lau ese Dirava ena hereva bona lauegu abidadama Iesu dekenai lau gwauraia hedinarai. Unai dainai, motumotu ta, ladana be Patamo, dekenai lau idia atoa, lau noho.” (Apokalupo 1:⁠9) Sivarai namona dainai tau buruka Ioane be Patamo dibura rumana dekenai idia atoa. Unuseniai ia noho neganai, bona ena tadikaka ida hisihisi ia haheaukalaia neganai, bona do ia mai Basileiana lalonai do ia vareai ena helaro ia naria noho neganai, Ioane ese Apokalupo ena matahanai ginigunana ia itaia. Apokalupo ena matahanai ese iena lalona idia hagoadaia, hari inai negai Ioane oreana taudia ese edia hagugurua dalana idia itaia neganai idia lalo-goada hegeregere. Unai negai ia be dibura rumana lalonai ia noho, to ita diba lasi edena dala amo Ioane ese Apokalupo bukana ia siaia lao kongregesen dekenai. (Apokalupo 1:11; 22:​18, 19) Iehova ena aneru ese unai gaukara idia durua. Unai hegeregerena, hari inai negai Iehova ena kamonai Witness taudia edia gaukara idia taravatua bona idia koua neganai nega momo aneru ese idia naridia, bena Witness taudia be nega korikori ai lauma aniani idia siaia diba edia tadikaka dekenai, lauma aniani idia ura dikadika taudia unai.​—⁠Salamo 34:​6, 7.

¹¹ Iehova ese Ioane ia gaukaralaia kongregesen dekenai Ena hereva do ia siaia totona. Ioane ese unai ia laloa bada! Unai hegeregerena, hari inai negai Ioane oreana taudia ese lauma aniani be Dirava ena orea taudia idia henidia ‘aniani negana korikori ai.’ (Mataio 24:45) Namona be lauma aniani ese oi ia hagoadaia danu, gau hereadaena, mauri hanaihanai, do oi abia totona!​—⁠Aonega Herevadia 3:​13-​18; Ioane 17:⁠3.

[Study Questions]

1. Ioane be daidia dekenai hereva ia torea, bona hari inai negai daidia ese ena hereva idia laloa namonamo be namo?

2. (a) Namba “7” ese dahaka ia laulaulaia? (b) Lohiabada ena dina dekenai, “ekalesia orea 7” dekenai idia siaia herevadia be mai anina daidia dekenai?

3. (a) Ioane ese Apokalupo bukana ia hamatamaia neganai ia gwauraia “hariharibada bona maino” be edeseni amo idia mai? (b) Aposetolo Paulo be dahaka ia hereva, Ioane ena hereva hegeregerena?

4. Ioane ese Iesu Keriso edena bamona ia gwauraia, bona dahaka dainai unai bamona ia gwauraia be maoro?

5. (a) Ioane ese edena bamona Lohiabada Iesu Keriso ia hanamoa noho? (b) Iesu ese sibona ena mauri goevadaena ia henia dainai daidia ese namo idia davaria, bona horoa Keristen taudia be edena dala amo hahenamo idauna idia abia?

6. (a) Ioane ese dahaka ia gwauraia hedinarai, Iesu be “ori latanai ia mai noho” ia gwauraia neganai, bona reana Ioane ese dahaka peroveta herevana, Iesu ese ia gwauraia gauna, ia laloa lou? (b) Iesu ia “mai” ena anina be dahaka, bona tanobada dekenai daidia do idia hisihisi bada?

7. Edena bamona “taunimanima ibounai,” gwau-edeede taudia danu, ese Iesu do idia “itaia”?

8. (a) Lagani 33 C.E. ai, daidia ese Iesu “idia gwadaia,” bona hari inai negai Iesu idia gwadaia taudia be daidia? (b) Ena be hari Iesu be inai tanobada dekenai ia noho lasi, to taunimanima ese edena bamona ia idia ‘gwadaia’ diba?

9. (a) Daika ia boiboi, bona Apokalupo bukana lalonai nega hida ia boiboi? (b) Iehova ese sibona ia gwauraia “Alepa bona Omega” bona “Siahu Ibounai Diravana,” ena anina be dahaka?

10. (a) Ioane ese sibona edena bamona ia gwauraia, bona Ioane be edena gabu ai idia hadiburaia? (b) Daidia edia heduru dainai Ioane ena toretore be kongregesen dekenai ia siaia diba? (c) Hari inai negai lauma aniani be edena dala amo idia henia?

11. Hari inai negai, Ioane oreana taudia ese dahaka idia laloa bada, Ioane ese ia laloa bada gauna hegeregerena?

[Box on page 21]

Hekwakwanai Negadiai Lauma Aniani Abia Dalana

Inai dina gabedia lalodiai, Iehova ena Witness taudia ese dagedage bona hekwakwanai momo idia davaria. Unai dainai gau badana be lauma aniani idia abia, edia abidadama lalonai do idia gini goada totona. Nega momo herea, Iehova ese ena siahu be hoa dalana ai ia hahedinaraia dainai lauma aniani idia abia diba.

Haheitalai ta be inai: Hitler ese Germany ia lohiaia negana lalonai, ena gavamani be mai ena dagedage ida Gima Kohorona magasin ia taravatua. Unai neganai, Witness taudia ese Gima Kohorona magasin momo idia karaia bona idia hariharilaia. Hamburg lalonai Gestapo [pulisi] taudia ese ruma ta idia hamakohia bona idia vareai. Unai ruma lalonai be Gima Kohorona magasin haida idia karaia. Unai ruma be ia maragi, bona gau ta idia hunia momokani diba lasi. Taipraita be seipi ta lalonai idia rakatania, bona printa masini be ruma henunai idia hunia, maho idia atoa gabuna lalonai. Danu, unai maho atoa gabuna murinai, magasin momo idia atoa puse badana lalonai! Momokani, Gestapo taudia ese unai gau idia davaria haraga diba, ani? To dahaka ia vara? Opesa ta ese seipi ia kehoa, to taipraita ia itaia lasi. Ruma biaguna ese ruma ena henuna dekenai ia vara gauna be inai bamona ia gwauraia: “Opesa toi be daiutu ena bogaragina dekenai idia gini, maho atoa gabuna kahirakahira dekenai, bona ia murinai puse badana lalonai Gima Kohorona magasin momo idia noho. To opesa ese idia itaia lasi, hegeregere idia matakepulu bamona.” Unai hoa gauna ia vara dainai, hekwakwanai negadia lalonai unai ruma taudia ese lauma aniani idia henia noho diba.

Lagani 1960 murinai, Nigeria ena provinsi ta, Biafra, bona Nigeria gavamani idia tuari heheni. Nigeria ena tano ese Biafra tanona ia koua hegege, unai dainai Biafra lalonai vareai dalana tamona be peleini ia diho gabuna sibona. Vadaeni, Biafra Witness taudia edia lauma aniani idia abia dalana idia koua gwauraia. Bena, lagani 1968 lalonai, Biafra gavamani taudia ese edia gaukara tauna ta idia abia hidi ia ese mai anina bada gaukarana Europe dekenai do ia karaia totona bona ma gaukara tauna ta idia abia hidi Biafra ena peleini diho gabuna ia naria totona. Unai tatau ruaosi be Iehova ena Witness taudia, bona Biafra bona ma tano iboudiai edia hakapua dalana be idia sibodia ese idia naria. Unai tatau ruaosi idia diba Iehova ese unai dala ia kehoa. Unai dainai, idia gwau idia ura idia heduru, lauma aniani be Biafra dekenai idia mailaia totona. Unai gaukara idia karaia be auka bona dika idia davaria diba. Tuari negana ibounai lalonai unai gaukara idia karaia. Idia ta ia gwau: “Taunimanima sibodia ese unai dala idia kehoa diba lasi.”

[Chart on page 19]

Namba Edia Anina Apokalupo Bukana Lalonai

Namba Anina

Apokalupo bukana lalonai namba haida be laulau lasi, to idia be namba korikoridia. Nega momo, unai namba kahirakahira dekenai idia torea herevadia ese unai idia hamomokania. (Apokalupo 7:​4, 9; 11:​2, 3; 12:​6, 14; 17:​3, 9-​11; 20:​3-5 itaia danu.)